ຈຸດປະສົງການຈັດງານ ເພື່ອເຊີດຊູ ແລະ ປົກປັກຮັກສາ ບົດບາດຂອງຊຸມຊົນຜູ້ຜະລິດ ແລະ ຜູ້ຊົງຄຸນວຸດທິດ້ານພູມປັນຍາລາວ, ສົ່ງເສີມການອະນຸລັກພູມປັນຍາທ້ອງຖິ່ນ, ສີມືຫັດຖະກຳ ແລະ ຜະລິດຕະພັນທີ່ເປັນເອກະລັກຂອງລາວ ບໍ່ໃຫ້ສູນຫາຍ, ເພື່ອຊຸກຍູ້ ແລະ ພັດທະນາ, ເປີດໂອກາດໃຫ້ ຜູ້ປະກອບການ, ນັກປະດິດຄິດຄົ້ນ, ນະວັດຕະກຳ ແລະ ຜະລິດຕະພັນຈາກພູມປັນຍາ ມາຈັດສະແດງ ແລະ ຈຳໜ່າຍ, ເພື່ອສ້າງເຄືອຂ່າຍເວທີການຄ້າ, ສ້າງເວທີພົບປະແລກປ່ຽນບົດຮຽນ ແລະ ຈັບຄູ່ທຸລະກິດ ລະຫວ່າງ ຜູ້ຜະລິດ ແລະ ຜູ້ບໍລິໂພກ ທັງພາຍໃນ ແລະ ຕ່າງປະເທດ.
 |
ທ່ານ ນາງ ອຸສາວະດີ ໄຊສະສິດ ກ່າວວ່າ: , "ພູມປັນຍາລາວ" ແມ່ນຊັບສິນທາງປັນຍາອັນລ້ຳຄ່າ ທີ່ຖືກສ້າງສັນ, ສະສົມ ແລະ ຖ່າຍທອດກັນມາຈາກຮຸ່ນສູ່ຮຸ່ນ. ມັນບໍ່ພຽງແຕ່ສະທ້ອນເຖິງ ເອກະລັກ, ວັດທະນະທຳ ແລະ ວິຖີຊີວິດອັນງົດງາມຂອງຊາດລາວເຮົາເທົ່ານັ້ນ, ແຕ່ຍັງເປັນທ່າແຮງບົ່ມຊ້ອນອັນສຳຄັນໃນການຂັບເຄື່ອນເສດຖະກິດ, ການຄ້າ, ການທ່ອງທ່ຽວ ແລະ ການພັດທະນາແບບຍືນຍົງ ບໍ່ແມ່ນພຽງແຕ່ວັດຖຸສິ່ງຂອງ ຫຼື ສິ່ງເກົ່າແກ່ທີ່ສືບທອດກັນມາເທົ່ານັ້ນ ແຕ່ມັນຄືອົງຄວາມຮູ້, ທັກສະ, ປະສົບການ ແລະ ວິຖີຊີວິດທີ່ບັນພະບູລຸດລາວໄດ້ສັ່ງສົມ, ຄົ້ນຄິດ ແລະ ຖ່າຍທອດກັນມາຫຼາຍຊົ່ວອາຍຸຄົນ.
ຄຸນຄ່າພູມປັນຍາລາວ ເປັນມໍລະດົກທີ່ປະສົມປະສານພຸທສາສນາ, ສິລປະ, ວັດທະນະທຳພື້ນເມືອງ, ພາສາບູຮານ, ຄວາມເຊື່ອ ແລະ ປະຫວັດສາດຖ້ອງຖິ່ນ, ບໍ່ໄດ້ຢູ່ພຽງແຕ່ວັດຖຸ ແຕ່ຍັງຢູ່ໃນຄວາມໝາຍ ເລື່ອງລາວຄວາມເປັນຈິງ ແລະ ຄວາມຜູກພັນກັບຊຸມຊົນເຊື້ອຊາດລາວ, ສິລະປະພື້ນເມືອງລາວ ສາມາດພັດທະນາເປັນສິນຄ້າວັດທະນະທຳ ແລະ ຂອງສະສົມທີ່ມີມູນຄ່າໄດ້, ຖ້າມີການອະນຸລັກ, ຮັບຮອງ ແລະ ການເລົ່າເລື່ອງທີ່ດີ ພູມປັນຍາລາວ ສາມາດກາຍເປັນພະລັງທີ່ດຶງດູດນັກທ່ອງທ່ຽວ ແລະ ສ້າງພາບພົດທີ່ດີໃຫ້ແກ່ຊາດ. ລາວເຮົາໄດ້ພັດທະນາມໍລະດົກທາງວັດທະນະທຳເປັນລະບົບ (ມີຊຸມຊົນຜູ້ຜະລິດເປັນເຈົ້າຂອງຜົນງານ, ມີນັກສຶກສາ, ຄູ-ອາຈານ ແລະ ນັກຄົ້ນຄວ້າ ເປັນຜູ້ສະສົມ ແລະ ວິເຄາະຂໍ້ມູນ ແລະ ມີກົມຊັບສິນທາງປັນຍາ ພາຍໃຕ້ກະຊວງອຸດສະຫະກຳ ແລະການຄ້າ ເປັນຜູ້ປົກປ້ອງຄຸ້ມຄອງ) ເພື່ອສ້າງລາຍຮັບ, ຮັກສາເອກະລັກຂອງຊາດ ແລະ ເພີ່ມບົດບາດຂອງລາວໃນເວທີສາກົນ.
ທ່ານນາງ ວຽງສະຫວັນ ພະມີສິດ ກ່າວວ່າ: ພາຍໃນງານ, ບັນດາຜູ້ເຂົ້າຮ່ວມ ຈະໄດ້ຄວາມຮູ້ດ້ານການເງິນ-ການອອມຄໍາ(ເສວະນາ), ການສົ່ງເສີມກັດຖະກໍາ ເຄື່ອງປະດັບ, ຜົນງານລວດລາຍຂອງລາວ, ແຟຊັນ ປະສົມປະສານກັບຜ້າໄໝ ສະນັ້ນ ຮ້ານຄໍາພູວົງ ຈຶ່ງຂໍເປັນສ່ວນໜຶ່ງໃນການອະນຸລັກ ພັດທະນາ ແລະ ສົ່ງເສີມພູມປັນຍາລາວ ເພື່ອຊຸກດັນ ໃຫ້ກັດຖະກໍາລາວ ກ້າວສູ່ລະດັບສູງ.
ງານຄຸນຄ່າພູມປັນຍາລາວຄັ້ງທີ 1 ຈະຈັດຂຶ້ນໃນວັນທີ 9-13 ກັນຍານີ້, ທີ່ ສູນວາງສະແດງສິນຄ້າ ລາວ-ໄອເຕັກ (ຕຶກເກົ່າ). (ຂ່າວ: ແສງຈັນ)
ຄໍາເຫັນ