ພິທີເປີດງານວາງສະແດງຮູບແຕ້ມຝາຜະໜັງບັນດາວັດໃນສັດຕະວັດທີ 19 ຢູ່ແຂວງສະຫວັນນະເຂດ ພາຍໃຕ້ທຶນຊ່ວຍເຫຼືອຂອງທ່ານເອກອັກຄະລັດຖະທູດອາເມລິກາປະຈຳ ສປປ ລາວ ໄດ້ຈັດຂຶ້ນທີ່ຄຸ້ມຕົວເມືອງເກົ່າ (ຕໍ່ໜ້າຫໍພິພິທະພັນແຂວງ) ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ປະສົງສິນ ຈະເລີນສຸກ ເຈົ້ານະຄອນໄກສອນ ພົມວິຫານ, ມີທ່ານ ໂພສີສ້ອຍ ກຸທິລາດ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງ, ມີຕົວແທນຈາກກົງສູນໃຫຍ່ ສສ ຫວຽດນາມ, ກົງສູນໄທປະຈຳແຂວງສະຫວັນນະເຂດເຂົ້າຮ່ວມ.
ທ່ານນາງ ສຸນັນທາ ກັນລະຍາ ປະທານສະມາຄົມສົ່ງເສີມການອະນຸລັກສິລະປະວັນນະຄະດີ (ສອສວ) ກ່າວວ່າ: ການຈັດງານຄັ້ງນີ້ເພື່ອອະນຸລັກວັດທະນະທຳ AFCP 2022 ຊຶ່ງເລີ່ມແຕ່ວັນທີ 26 ຕຸລາ 2022 ໄປຈົນເຖິງທ້າຍເດືອນທັນວານີ້, ຜ່ານມາທາງສະມາຄົມໄດ້ຈັດງານວາງສະແດງຮູບແຕ້ມມາແລ້ວທີ່ວັດບ້ານຕາແຫຼວ-ບ້ານທວດເມືອງຈຳພອນ, ທີ່ວັດບ້ານໜອງບົວທ່າ ເມືອງສອງຄອນ. ສຳລັບໂຄງການດັ່ງກ່າວສະຖານບູຮານເປົ້າໝາຍລວມມີ: ວັດເກົ່າຕາແຫຼວ-ວັດບ້ານທວດ ເມືອງຈຳພອນ, ວັດບ້ານໜອງບົວທ່າ ເມືອງສອງຄອນ ພາຍໃຕ້ການເປັນເຈົ້າການ ແລະ ໃຫ້ທິດຊີ້ນຳຂອງພະແນກ ຖວທ ແຂວງຮ່ວມກັບສອງເມືອງດັ່ງກ່າວ. ໂຄງການນີ້ຈັດຂຶ້ນເພື່ອປູກຈິດສຳນຶກກ່ຽວກັບການອະນຸລັກ, ຮັກສາມໍລະດົກວັດທະນະທຳໃຫ້ແກ່ປະຊາຊົນໃນທ້ອງຖິ່ນ ໂດຍສະເພາະຄົນຮຸ່ນໃໝ່, ສ້າງແຮງຈູງໃຈໃຫ້ປະຊາຊົນຮູ້ຈັກນຳໃຊ້ ແລະ ອະນຸລັກມໍລະດົກວັດທະນະທຳຂອງຕົນແບບຍືນຍົງ ທັງເປັນການເຝິກຝົນໃຫ້ນັກສິລະປະໃນ ສປປ ລາວ ໄດ້ຮຽນຮູ້ເຕັກນິກການແຕ້ມຮູບຝາຜະໜັງແບບດັ້ງເດີມ ເພື່ອເປັນການເກັບກຳຂໍ້ມູນທາງດ້ານວັດທະ ນະທຳທ້ອງຖິ່ນ ເພື່ອການອະນຸລັກໃນພາຍພາກໜ້າ. ຮູບແຕ້ມຝາຜະໜັງທີ່ນຳມາວາງສະແດງໃນຄັ້ງນີ້ມີປະມານ 50 ກວ່າຮູບ ໂດຍສິລະປິນທີ່ມາຈາກໂຮງຮຽນວິຈິດສິນແຫ່ງຊາດຮ່ວມກັບບັນດາອາຈານຈາກສະຖາບັນວິຈິດສິນແຂວງ.
ຂ່າວ: ແຂວງສະຫວັນນະເຂດ
ຄໍາເຫັນ