 |
ເຂົ້າຮ່ວມໃນພິທີເປີດງານມີ ທ່ານ ສຸລິຍາ ແກ້ວພິລາວົງ ຮອງເລຂາຄະນະບໍລິຫານງານ ສຊປລ, ທ່ານ ຄຳບິສ ຄາບີຣີ (Kambiz Kabiri) ຜູ້ຮັກສາການແທນຫົວໜ້າອົງການ UNFPA ປະຈຳ ສປປ ລາວ, ພ້ອມດ້ວຍຕົວແທນພາກລັດ, ຄູ່ຮ່ວມພັດທະນາ, ອົງການສາກົນ, ພາກເອກະຊົນ, ສະຖາບັນການສຶກສາ, ສະມາຄົມ, ສື່ມວນຊົນ ແລະ ຕົວແທນເຍົາວະຊົນ-ໄວໜຸ່ມເຂົ້າຮ່ວມ.
ຫົວຂໍ້ຂອງງານປີນີ້ເນັ້ນໃຫ້ເຫັນວ່າ: ເຖິງວ່າ ໄວໜຸ່ມຈະດຳລົງຊີວິດຢູ່ໃນສະພາບແວດລ້ອມ ແລະ ບໍລິບົດທີ່ແຕກຕ່າງກັນແຕ່ພວກເຂົາຍັງມີຄວາມມຸ່ງຫວັງຮ່ວມກັນເຊັ່ນ: ການໄດ້ຮັບການສຶກສາທີ່ມີຄຸນນະ ພາບ, ມີວຽກເຮັດງານທຳທີ່ໝັ້ນຄົງ, ມີສຸຂະພາບດີ, ມີໂອກາດທີ່ເທົ່າທຽມ ແລະ ມີສ່ວນຮ່ວມຢ່າງມີຄວາມໝາຍໃນການກຳນົດອະນາຄົດຂອງຕົນເອງ.
 |
ພາຍໃນງານຜູ້ເຂົ້າຮ່ວມຍັງມີຕົວແທນໄວໜຸ່ມ ແລະ ພາກສ່ວນຕ່າງໆໂດຍໃຫ້ຄວາມສຳຄັນຕໍ່ສຽງຂອງໄວໜຸ່ມທຸກກຸ່ມລວມທັງແມ່ຍິງ ແລະ ເດັກຍິງ, ໄວໜຸ່ມຜູ້ພິການ, ໄວໜຸ່ມຈາກກຸ່ມຫຼາກຫຼາຍ, ໄວໜຸ່ມຊົນເຜົ່າຕະຫຼອດຮອດໄວໜຸ່ມທີ່ອາໄສຢູ່ເຂດຊົນນະບົດ ແລະ ຫ່າງໄກ.
ທ່ານ ສຸລິຍາ ແກ້ວພິລາວົງ ກ່າວວ່າ: “ເຍົາວະຊົນ ແລະ ໄວໜຸ່ມແມ່ນກຳລັງແຮງສຳຄັນຂອງການພັດທະນາປະເທດເພາະເປັນຜູ້ນຳເອົາຄວາມຄິດສ້າງສັນ, ພະລັງແຮງ ແລະ ມຸມມອງໃໝ່ໆມາສູ່ຄອບຄົວ, ຊຸມຊົນ ແລະ ສັງຄົມ. ພ້ອມຢືນຢັນວ່າ ສຊປລ ຈະສືບຕໍ່ຮ່ວມມືກັບໄວໜຸ່ມ ແລະ ຄູ່ຮ່ວມງານເພື່ອຮັບຟັງສຽງ, ສົ່ງເສີມສັກກະຍະພາບ ແລະ ສ້າງໂອກາດໃຫ້ໄວໜຸ່ມໄດ້ມີສ່ວນຮ່ວມໃນການສ້າງອະນາຄົດຂອງຊາດ.”; ສຳລັບກິດຈະກຳພາຍໃນງານປະກອບມີການສະແດງລະຄອນເວທີແບບມີສ່ວນຮ່ວມທີ່ສ້າງແລະສະແດງໂດຍໄວໜຸ່ມ, ສະທ້ອນບັນຫາດ້ານການສຶກສາ, ການຈ້າງງານ, ການເຂົ້າເຖິງດິຈິຕອນ, ການຮັບມືກັບການປ່ຽນແປງສະພາບດິນຟ້າອາກາດແລະສຸຂະພາບຈິດ. ນອກນັ້ນຍັງມີເວທີສົນທະ ນາລະຫວ່າງເຍົາວະຊົນ-ໄວໜຸ່ມກັບຜູ້ກຳນົດນະໂຍບາຍ ແລະ ຜູ້ບໍລິຫານເພື່ອແລກປ່ຽນມຸມມອງ ແລະ ສະເໜີປະເດັນທີ່ສຳຄັນຕໍ່ຊີວິດ ແລະ ອະນາຄົດຂອງໄວໜຸ່ມ; ພ້ອມກັນນີ້ຍັງມີການທົບທວນຜົນການສົນ ທະນາເຍົາວະຊົນອາຊຽນປີ 2024 ທີ່ຈັດຂຶ້ນຢູ່ແຂວງຫຼວງພະບາງ, ພ້ອມທັງລາຍງານຄວາມຄືບໜ້າໃນການຜັກດັນຍຸດທະສາດການພັດທະນາໄວໜຸ່ມ ແລະ ເຍົາວະຊົນສົກປີ 2021–2030.
ທ່ານ ຄຳບິສ ຄາບີຣີ ກ່າວວ່າ: “ການເຮັດໃຫ້ຄວາມມຸ່ງຫວັງຂອງໄວໜຸ່ມເປັນຈິງຕ້ອງກ້າວໄປພ້ອມກັນທັງສອງຝ່າຍ. ດ້ານໜຶ່ງ, ໄວໜຸ່ມຕ້ອງມີຄວາມຫ້າວຫັນ. ພວກເຂົາຕ້ອງມີຄວາມກ້າຫານ, ມີຝັນທີ່ຍິ່ງໃຫຍ່, ສົ່ງສຽງຂອງພວກເຂົາອອກມາ, ຮຽນຮູ້ທັກສະໃໝ່ໆ ແລະ ເປັນເຈົ້າການໃນຊີວິດ ແລະ ຊຸມຊົນຂອງພວກເຈົ້າເອງ. ອີກດ້ານໜຶ່ງ, ລັດຖະບານ ແລະ ສະຖາບັນຕ່າງໆຕ້ອງສະໜອງສະພາບແວດລ້ອມທີ່ເອື້ອອຳນວຍ, ສົ່ງເສີມ ແລະ ຈະຕ້ອງຮັບປະກັນວ່າເດັກຍິງທຸກຄົນສາມາດຮຽນຕໍ່ຢູ່ໂຮງຮຽນ ແລະ ຕັດສິນໃຈຢ່າງມີອິດສະຫຼະວ່າຈະແຕ່ງງານເມື່ອໃດ ແລະ ຈະແຕ່ງງານ ຫຼື ບໍ່; ເຍົາວະຊົນສາມາດເຂົ້າເຖິງຂໍ້ມູນຂ່າວສານດ້ານສຸຂະພາບ ແລະ ສຸຂະພາບຈະເລີນພັນ ແລະ ເພດສຶກສາຢ່າງຖືກຕ້ອງໂດຍບໍ່ຕ້ອງມີຄວາມຢ້ານກົວຫຼືການຕັດສິນ; ແລະ ໄວໜຸ່ມພິການສາມາດມີສ່ວນຮ່ວມໃນການເຮັດວຽກ ແລະ ຊີວິດສາທາລະນະຢ່າງເທົ່າທຽມກັນ.”
ກິດຈະກຳຫຼັກອີກອັນໜຶ່ງແມ່ນງານວາງສະແດງວຽກງານການສຶກສາຈາກອົງການຈັດຕັ້ງທີ່ນຳພາໂດຍຊາວໜຸ່ມ, ໜ່ວຍງານລັດຖະບານ, ຄູ່ຮ່ວມພັດທະນາ, ສະຖາບັນການສຶກສາ, ອົງການຈັດຕັ້ງສັງຄົມແລະ ພາກສວ່ນເອກະຊົນ. ສິ່ງນີ້ຊ່ວຍໃຫ້ຜູ້ເຂົ້າຮ່ວມສາມາດແລກປ່ຽນຂໍ້ມູນ, ຮຽນຮູ້ກ່ຽວກັບການບໍລິການທີ່ມີຢູ່, ຄົ້ນຫາໂຄງການໃໝ່ໆ, ແລະ ສະແດງແນວຄວາມຄິດ ແລະ ວິທີແກ້ໄຂບັນຫາທີ່ນຳພາໂດຍຊາວໜຸ່ມ.
 |
ງານຄັ້ງນີ້ຍັງໄດ້ຮັບການສະໜັບສະໜູນຜ່ານກິດຈະກຳກ່ອນ ແລະ ຫຼັງງານລວມທັງກິດຈະກຳອອນລາຍຜ່ານສື່ສັງຄົມ ແລະ ກິດຈະກຳທີ່ນຳໂດຍໄວໜຸ່ມໃນຫຼາຍແຂວງໂດຍໄດ້ຮັບການສະໜັບສະໜູນຈາກ UNFPA; ການຈັດງານຄັ້ງນີ້ສະທ້ອນເຖິງບົດບາດ ແລະ ສັກກະຍະພາບຂອງເຍົາວະຊົນ ແລະ ໄວໜຸ່ມລາວໃນການເປັນຜູ້ນຳ, ສ້າງນະວັດຕະກຳ, ພັດທະນາຊຸມຊົນ, ຮັບມືກັບບັນຫາສະພາບດິນຟ້າອາກາດແລະ ສ້າງອາຊີບ. ສຊປລ ແລະ UNFPA ພ້ອມດ້ວຍພາກສ່ວນຮ່ວມມືຈະສືບຕໍ່ຮ່ວມມືກັບໄວໜຸ່ມເພື່ອຂະຫຍາຍໂອກາດທີ່ກວມລວມ ແລະ ໃຫ້ໄວໜຸ່ມທຸກຄົນໄດ້ຮັບການຍອມຮັບໃນຖານະທັງຜູ້ຮັບຜົນປະໂຫຍດ, ຄູ່ຮ່ວມງານ ແລະ ຜູ້ນຳໃນການພັດທະນາ.
(ຂ່າວ: UNFPA)
ຄໍາເຫັນ