ນວ ໄດ້ຮັບໃບຢັ້ງຢືນ ແລະ ຮັບຮອງເອົາເປັນຫົວໜ່ວຍຍຸດທະສາດ

ພິທີມອບໃບຢັ້ງຢືນ ນະຄອນຫຼວງວຽງຈັນ (ນວ) ເປັນຫົວໜ່ວຍຍຸດທະສາດ ໄດ້ຈັດຂຶ້ນໃນວັນທີ 20 ຕຸລາ ຜ່ານມາ ທີ່ສຳນັກງານອົງການປົກຄອງ ນວ ພາຍໃຕ້ການເປັນປະທານ, ຂຶ້ນມອບໃບຢັ້ງຢືນ ແລະ ໂອ້ລົມໂດຍ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແລະ ທ່ານ ອາດສະພັງທອງ ສີພັນດອນ ເຈົ້າຄອງ ນວ ຂຶ້ນຮັບ; ມີບັນດາທ່ານການນໍາຂັ້ນສູງຂອງບັນດາກະຊວງກ່ຽວຂ້ອງ ພ້ອມດ້ວຍການນໍາຂອງອົງການປົກຄອງ ນວ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ທ່ານ ພູວົງ ວົງຄໍາຊາວ ຮອງເຈົ້າຄອງ ນວ ໄດ້ຂຶ້ນລາຍງານການຈັດຕັ້ງປະຕິບັດວຽກງານ 3 ສ້າງ ໃນໄລຍະປີ 2016 – 2020 ໃຫ້ຮູ້ວ່າ: ນວ ໄດ້ປະຕິບັດຕາມທິດນໍາ, ມະຕິຂອງສູນກາງພັກ, ບົດແນະນໍາກ່ຽວກັບການປະເມີນຜົນການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາ, ສະເພາະຂັັ້ນນະຄອນຫຼວງວຽງຈັນ ກໍໍໄດ້ອອກຂໍ້ຕົກລົງ ວ່າດ້ວຍການແຕ່ງຕັັ້ງຄະນະກໍາມະການປະເມີນ ແລະ ບົດແນະນໍາວ່າດ້ວຍທິດທາງ, ເປົ້າໝາຍ, ມາດຕະການເພື່ອເປັນທິດທາງໃຫ້ແກ່ການຈັດຕັັ້ງປະຕິບັດ, ສິ່ງສໍາຄັນແມ່ນໄດ້ຈັດຕັັ້ງເຜີຍແຜ່, ເຊື່ອມຊຶມ ແລະ ຈັດຕັັ້ງການປະເມີນຕາມພາລະບົດບາດ, ຄວາມຮັບຜິດຊອບຂອງບັນດາຂະແໜງການ, ເມືອງ, ຕາມເນື້ອໃນສ້າງແຂວງນະຄອນຫຼວງວຽງຈັນເປັນຫົວໜ່ວຍຍຸດທະສາດໃນ 7 ດ້ານ, 66 ຕົວຊີ້ບອກ ດັ່ງນີ້:
ຍຸດທະສາດດ້ານການກໍ່ສ້າງພັກ-ພະນັກງານລວມມີ 7 ຕົວຊີ້ບອກ, ບັນລຸ 6 ຕົວຊີ້ບອກ, ເທົ່າກັບ 85,71%, ບໍ່ບັນລຸ 1 ຕົວຊີ້ບອກ, ເທົ່າກັບ 14,29%; ຍຸດທະສາດດ້ານການປົກຄອງ ແລະ ບໍລິຫານລັດລວມມີ 10 ຕົວຊີ້ບອກ, ບັນລຸ 9 ຕົວຊີ້ບອກ ເທົ່າກັບ 90%, ບໍ່ບັນລຸ 1 ຕົວຊີ້ບອກ, ເທົ່າກັບ 10%; ຍຸດທະສາດໃນການຊຸກດັນການຂະຫຍາຍຕົວເສດຖະກິດແຫ່ງຊາດ ລວມມີ 9 ຕົວຊີ້ບອກ, ບັນລຸ 8 ຕົວຊີ້ບອກ ເທົ່າກັບ 88,88 %, ບໍ່ບັນລຸ 1 ຕົວຊີ້ບອກ, ເທົ່າກັບ 11,12 %; ຍຸດທະສາດດ້ານການເງິນຂອງ ນວ ສາມາດບັນລຸ 6 ຕົວຊີ້ບອກ, ເທົ່າກັບ 100%; ຍຸດທະສາດດ້ານການຄຸຸ້ມຄອງຂຸດຄົ້ນ ແລະ ນໍາໃຊ້ແຫຼ່ງຊັບພະຍາກອນທໍາມະຊາດ, ຊັບສິນ ແລະ ການຮັກສາສິ່ງແວດລ້ອມ: 13 ຕົວຊີ້ບອກ, ບັນລຸ 11 ຕົວຊີ້ບອກ ເທົ່າກັບ 84,61%, ບໍ່ບັນລຸ 2 ຕົວຊີ້ບອກເທົ່າກັບ 15,39%; ຍຸດທະສາດການຄຸຸ້ມຄອງວັດທະນະທໍາ-ສັງຄົມ ແລະ ການພັດທະນາຊັບພະຍາກອນມະນຸດ ມີ 16 ຕົວຊີ້ບອກ ບັນລຸ 15 ຕົວຊີ້ບອກ, ເທົ່າກັບ 93,75% ), ບໍ່ບັນລຸ 1 ຕົວຊີ້ບອກ, ເທົ່າກັບ 6,25%; ຍຸດທະສາດດ້ານການປ້ອງກັນຊາດ-ປ້ອງກັນຄວາມສະຫງົບ ບັນລຸ 4 ຕົວຊີ້ບອກ ເທົ່າກັບ 80%, ບໍ່ບັນລຸ 1 ຕົວຊີ້ບອກ, ເທົ່າກັບ 20%.
ໂດຍລວມແລ້ວ, ການສ້າງ ນວ ເປັນຫົວໜ່ວຍຍຸດທະສາດ ຕາມ 7 ດ້ານ, 66 ຕົວຊີ້ບອກ: ບັນ ລຸ 60 ຕົວຊີ້ວັດ ເທົ່າກັບ 90, 90%, ບໍ່ບັນລຸ 6 ຕົວຊີ້ບອກເທົ່າກັບ 9,1%. ພ້ອມດຽວກັນນີ້, ກໍໄດ້ສ້າງເມືອງ ທີ່ຄົບມາດຖານເງື່ອນໄຂເປັນຫົວໜ່ວຍເຂັ້ມແຂງຮອບດ້ານ ຕາມ 5 ດ້ານ 47 ຕົວຊີ້ບອກ ບັນລຸໄດ້ 8 ເມືອງ, ເທົ່າກັບ 88,89%, ບໍ່ບັນລຸ 1 ເມືອງ, ເທົ່າກັບ 11,11% ແລະ ສ້າງບ້ານເປັນຫົວໜ່ວຍພັດທະນາ ຊຶ່ງ ນວ ມີ 481 ບ້ານ, ບ້ານທີ່ບັນລຸຕາມ 4 ດ້ານ, 30 ຕົວຊີ້ບອກ, ມີ 437 ບ້ານ, ເທົ່າກັບ 90,85%, ບໍ່ບັນ 44 ບ້ານ, ເທົ່າກັບ 9,14%. ນອກນີ້, ທ່ານຮອງເຈົ້າຄອງ ນວ ກໍຍັງໄດ້ຍົກໃຫ້ເຫັນດ້ານດີ, ຂໍ້ຄົງຄ້າງ, ວິທີແກ້ໄຂ ແລະ ບົດຮຽນທີ່ຖອດຖອນໄດ້ ພ້ອມທັງໃຫ້ຮູ້ 6 ທິດທາງແຜນການວຽດຈຸດສຸມຮອດປີ 2025.
ໃນພິທີ, ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ກໍໄດ້ຂຶ້ນຜ່ານຂໍ້ຕົກລົງຂອງນາຍົກ ລັດຖະມົນຕີ ເລກທີ 66/ນຍ, ລົງວັນທີ 12/05/2023 ວ່າດ້ວຍການຢັ້ງຢືນ ແລະ ຮັບຮອງເອົາ ນວ ເປັນຫົວໜ່ວຍຍຸດທະສາດ ໃນປີ 2020. ຈາກນັ້ນ, ກໍໄດ້ມີການມອບ-ຮັບ ໃບຢັ້ງຢືນດັ່ງກ່າວ.
ໃນໂອກາດນີ້, ທ່ານ ກິແກ້ວ ໄຂຄໍາພິທູນ ໄດ້ກ່າວໂອ້ລົມໂດຍສະແດງຄວາມຊົມເຊີຍ, ປິຕິຍິນດີ ແລະ ຕີລາຄາສູງຕໍ່ຄະນະພັກ, ອົງການປົກຄອງ ນວ ທີ່ໄດ້ເອົາໃຈໃສ່ ນໍາພາ-ຊີ້ນໍາ ການຈັດຕັ້ງປະຕິບັດ 3 ສ້າງ ຕາມມະຕິກອງປະຊຸມໃຫຍ່ ຄັ້ງທີ IX, XI ຂອງພັກ ຈົນສາມາດຍາດໄດ້ຜົນສຳເລັດ ແລະ ໄດ້ຮັບນາມມະຍົດທີ່ສູງສົ່ງດັ່ງກ່າວ ແລະ ພ້ອມດຽວກັນນີ້ກໍໄດ້ເນັ້ນໜັກໃຫ້ຄະນະພັກ, ອົງການປົກຄອງ ນວ ທຸກຂັ້ນ ຕ້ອງເປັນເຈົ້າການຍົກສູງຄວາມຮັບຜິດຊອບ ພ້ອມກັນສຸມທຸກຄວາມພະຍາຍາມ ເຂົ້າໃນການຈັດຕັ້ງປະຕິບັດວຽກງານທີ່ຢູ່ໃນຄວາມຮັບຜິດຊອບຂອງຕົນ ປະຕິບັດໃຫ້ສອດຄ່ອງກັບທິດນາ 3 ສ້າງ ເປັນຕົ້ນຄື:
1). ໃນຖານະເປັນຫົວໜ່ວຍຍຸດທະສາດ ຕ້ອງໄດ້ສືບຕໍ່ເພີ່ມທະວີຄວາມເປັນເຈົ້າການປຸກລະດົມທຸກພາກສ່ວນ ທັງພາກລັດ, ເອກະຊົນ ແລະ ປະຊາຊົນ ທຸກຊັ້ນຄົນ ຂຸດຄົ້ນທຸກທ່າແຮງທີ່ມີ ພັດທະນາທ້ອງຖິ່ນຂອງຕົນເຂົ້າໃນທຸກໆດ້ານ ທັງດ້ານການເມືອງ-ການປົກຄອງ, ດ້ານເສດຖະກິດ ແລະ ຫົວໜ່ວຍຍຸດທະສາດດ້ານການເງິນ, ດ້ານວັດທະນະທໍາ-ສັງຄົມ ແລະ ດ້ານປ້ອງກັນຊາດ-ປ້ອງກັນຄວາມສະຫງົບ.
2). ຕິດຕາມ ແລະ ສືບຕໍ່ແບ່ງຂັ້ນຄຸ້ມຄອງ ລະຫວ່າງເມືອງ ແລະ ບ້ານຢ່າງເໝາະສົມ ຊຶ່ງ ນວ ໃນຖານະເປັນອົງການປົກຄອງຂັ້ນສູງສຸດຢູ່ທ້ອງຖິ່ນ ຕ້ອງເຮັດໜ້າທີ່ຕິດຕາມກວດກາການແບ່ງຂັ້ນຄຸ້ມຄອງ ທີ່ກະຊວງ-ອົງການຂັ້ນສູນກາງ ໄດ້ແບ່ງໃຫ້ທ້ອງຖິ່ນແຕ່ລະຂັ້ນ ຢ່າງຈະແຈ້ງ ລະຫວ່າງຂັ້ນນະຄອນຫຼວງ, ຂັ້ນເມືອງ ແລະ ຂັ້ນບ້ານ ໃຫ້ສາມາດຈດຕັ້ງປະຕິບັດຢ່າງມີປະສິດທິພາບ.
3). ຕິດຕາມ, ຊຸກຍູ້ ແລະ ຊີ້ນໍາເມືອງ ໃນການສ້າງບ້ານພັດທະນາ ຕາມ 4 ເນື້ອໃນ 4 ຄາດ
ໝາຍ ຕາມທິດ 3 ສ້າງຢ່າງແຂງແຮງ ໃຫ້ລະບົບການເມືອງເຂັ້ມແຂງ, ຊາວບ້ານໄດ້ຮັບການສຶກສາອົບຮົມແນວຄິດ-ການເມືອງ, ບ້ານມີພື້ນຖານໂຄງລ່າງ ຫຼື ພື້ນຖານວັດຖຸເຕັກນິກຮັບໃຊ້ການຜະລິດ ແລະ ຊີວິດການເປັນຢູ່ໃນລະດັບທີ່ສາມາດຮັບປະກັນໃຫ້ຊາວບ້ານໄດ້ເປັນປົກກະຕິ, ບ້ານມີຄວາມສະຫງົບ ເປັນລະບຽບຮຽບຮ້ອຍ.
ທັງນີ້, ກໍເພື່ອສືບຕໍ່ນໍາເອົາພາລະຫກິດປົກປັກຮັກສາ ແລະ ສ້າງສາປະເທດຊາດຂອງພວກເຮົາ ກ້າວຂຶ້ນສູ່ຈຸດໝາຍສັງຄົມນິຍົມ, ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງ, ເສດຖະກິດມີການຂະຫຍາຍຕົວຕໍ່ເນື່ອງ ສັງຄົມມີຄວາມສາມັກຄີປອງດອງ, ປະຊາທິປະໄຕ, ຍຸຕິທໍາ, ສີວິໄລ ແລະ ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການຍົກລະດັບໃຫ້ດີຂຶ້ນເປັນກ້າວໆ.
(ຂ່າວ-ພາບ: ສຸກສະຫວັນ)