ສະຫາຍ ອາດສະພັງທອງ ສີພັນດອນ ໄດ້ຍົກໃຫ້ເຫັນວ່າ: ກອງປະຊຸມໃຫຍ່ຄັ້ງນີ້, ແມ່ນເຫດການທາງປະຫວັດສາດທີ່ສຳຄັນຢ່າງຍິ່ງ ໃນການສັງລວມ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະ 5 ປີ ຜ່ານມາ; ພ້ອມກັນນັ້ນ, ກອງປະຊຸມໄດ້ຮັບຮອງເອົາເອກະສານສໍາຄັນ 4 ສະບັບ ເປັນຕົ້ນ: ຮ່າງໂຄງການການເມືອງ ສະບັບທີ III ຂອງພັກ, ຮ່າງລາຍງານການເມືອງຂອງຄະນະບໍລິຫານງານສູນກາພັກ ສະໄໝທີ XI, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X (2026-2030) ແລະ ຮ່າງກົດລະບຽບຂອງພັກ ສະບັບປັບປຸງ ເພື່ອເປັນບ່ອນອີງໃນການກ້າວໄປຂ້າງໜ້າຢ່າງໝັ້ນຄົງ.
 |
ສະຫາຍ ຮອງເລຂາຄະນະພັກ ເຈົ້າຄອງ ນວ ກ່າວຕື່ມວ່າ: ໃນຖານະທີ່ ນວ ເປັນຫົວໃຈ ແລະ ເປັນໜ້າເປັນຕາຂອງປະເທດ ໄດ້ຢືນຢັນເຖິງຄວາມມຸ່ງໝັ້ນທີ່ຈະນຳເອົາເນື້ອໃນຈິດໃຈ ຂອງກອງປະຊຸມໃຫຍ່ຄັ້ງນີ້ ນໍາໄປຜັນຂະຫຍາຍໃຫ້ປະກົດຜົນເປັນຈິງ ໂດຍສະເພາະແມ່ນ ດ້ານເສດຖະກິດ ສຸມໃສ່ການສ້າງເສດຖະກິດເອກະລາດເປັນເຈົ້າຕົນເອງ ໃຫ້ເຂັ້ມແຂງ ໂດຍຕັ້ງເປົ້າໝາຍການຂະຫຍາຍຕົວຂອງ GDP ໃຫ້ໄດ້ໃນລະດັບ 8% ຂຶ້ນໄປ, ດ້ານພື້ນຖານໂຄງລ່າງ ກໍຈະພັດທະນາຕົວເມືອງ ໃຫ້ມີຄວາມທັນສະໄໝ ແລະ ສີວິໄລ; ດ້ານສັງຄົມ ຈະສົ່ງເສີມການທ່ອງທ່ຽວ, ການຄ້າ-ການລົງທຶນ ແລະ ການອະນຸລັກວັດທະນະທຳ-ຮີດຄອງປະເພນີອັນດີງາມຂອງຊາດ.
ໃນໂອກາດນີ້, ສະຫາຍ ອາດສະພັງທອງ ສີພັນດອນ ໄດ້ຮຽກຮ້ອງມາຍັງສະມາຊິກພັກ, ພະນັກງານ-ລັດຖະກອນ, ທະຫານ-ຕຳຫຼວດ ແລະ ຊາວ ນວ ທຸກຊັ້ນຄົນ ຈົ່ງພ້ອມກັນຍົກສູງຄວາມເປັນເຈົ້າການ ແລະ ສາມັກຄີເປັນປຶກແຜ່ນ ເພື່ອຮັບຕ້ອນຜົນສຳເລັດຂອງກອງປະຊຸມໃຫຍ່ຄັ້ງນີ້ ແລະ ພ້ອມກັນຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XII ຂອງພັກ ໃຫ້ກາຍເປັນຜົນງານຕົວຈິງ ໃນທຸກຂົງເຂດວຽກງານ ເພື່ອສ້າງສາ ນວ ໃຫ້ກາຍເປັນຕົວເມືອງທີ່ໜ້າຢູ່ ແລະ ພັດທະນາຢ່າງຍືນຍົງ.
(ຂ່າວ-ພາບ: ຍູພິນທອງ)
ຄໍາເຫັນ