ໜຶ່ງແລວໜຶ່ງເສັ້ນທາງ ພິສູດໃຫ້ເຫັນໝາກຜົນເປັນຮູບປະທໍາ ສະໜັບສະໜຸນໂດຍກົງແກ່ ສປປ ລາວ

ໂດຍ: ສ.ບຸດປະຊາ
    ຜົນສຳເລັດແບບກ້າວກະໂດດ ຂອງການຈັດຕັ້ງປະຕິບັດຂໍ້ລິເລີ່ມ; “ໜຶ່ງແລວໜຶ່ງເສັ້ນທາງ” ຂອງສະຫາຍ ສີ ຈິ້ນຜິງ ເລຂາທິການໃຫຍ່ ຄະນະກຳມະການສູນກາງພັກກອມມູນິດຈີນ ປະທານປະເທດແຫ່ງ ສປ ຈີນ ໃນຕະຫຼອດ 10 ປີຜ່ານມາ, ໄດ້ມີຫຼາຍໝາກຜົນທີ່ເປັນຮູບປະທໍາ ໂດຍສະເພາະ ໃນກອງປະຊຸມ ໜຶ່ງແລວໜຶ່ງເສັ້ນທາງ ເພື່ອການຮ່ວມມືສາກົນ ຄັ້ງທີ 3 ພາຍໃຕ້ຫົວຂໍ້; “ການຮ່ວມມືໜຶ່ງແລວໜຶ່ງເສັ້ນທາງ ທີ່ມີຄຸນນະພາບ: ຮ່ວມກັນພັດທະນາ ແລະ ຄວາມຈະເລີນຮຸ່ງເຮືອງຮ່ວມກັນ”, ໃນວັນທີ 18 ຕຸລາຜ່ານມາ, ໄດ້ຍົກໃຫ້ເຫັນຢ່າງຈະແຈ້ງ ຊຶ່ງ ສປປ ລາວ ກໍໄດ້ຕີລາຄາສູງ ແລະ ຢັ້ງຢືນເຖິງຜົນສໍາເລັດ ໃນການຈັດຕັ້ງປະຕິບັດ ຂໍ້ລິເລີ່ມດັ່ງກ່າວ, ໄດ້ພິສູດໃຫ້ເຫັນໝາກຜົນເປັນຮູບປະທໍາ ທີ່ປະເທດກຳລັງພັດທະນາ ລວມທັງ ສປປ ລາວ ສາມາດສໍາພັດໄດ້ຕົວຈິງ.
    ຈຸດສຳຄັນນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ກໍໄດ້ມີວາລະກ່າວປາໄສ ແລະ ຕີລາຄາສູງ ພ້ອມທັງຍົກໃຫ້ເຫັນ  ໝາກຜົນ ທີ່ເປັນຮູບປະທໍາ. ໜຶ່ງແລວໜຶ່ງເສັ້ນທາງ ໄດ້ສ້າງເງື່ອນໄຂທີ່ເອື້ອຍອໍານວຍໃຫ້ແກ່ການພັດທະນາໃນຫຼາຍດ້ານ, ອັນພົ້ນເດັ່ນ ແມ່ນການພັດທະນາພື້ນຖານໂຄງລ່າງ ເຊື່ອມໂຍງ-ເຊື່ອມຈອດ ໃຫ້ເຫັນຢ່າງເປັນຮູບປະທໍາ. ນີ້ໄດ້ກາຍເປັນການຊຸກຍູ້, ສົ່ງເສີມ ແລະ ຂະຫຍາຍການຮ່ວມມືດ້ານເສດຖະກິດ, ການຄ້າ, ການລົງທຶນ ຕະຫຼອດຮອດການຖ່າຍທອດເຕັກໂນໂລຊີ ທີ່ກ້າວໜ້າ, ການແລກປ່ຽນວັດທະນະທໍາ-ສັງຄົມ ກໍຄືການໄປມາຫາສູ່ກັນລະຫວ່າງປະຊາຊົນ ກັບ ປະຊາຊົນ, ເປັນການສົ່ງເສີມອຸດສາຫະກຳການທ່ອງທ່ຽວ, ສ້າງຄວາມໄວ້ເນື້ອເຊື່ອໃຈ ແລະ ຄວາມເຊື່ອໝັ້ນ ຊຶ່ງກັນ ແລະ ກັນ ໃຫ້ນັບມື້ເລິກເຊິ່ງຍິ່ງຂຶ້ນ.
    ສະຫາຍ ປະທານປະເທດ ໄດ້ຕີລາຄາສູງວ່າ: ການຈັດຕັ້ງປະຕິບັດຂໍ້ລິເລີ່ມ ໜຶ່ງແລວໜຶ່ງເສັ້ນທາງ ໄດ້ພິສູດໃຫ້ເຫັນໝາກຜົນເປັນຮູບປະທໍາ ທີ່ປະເທດກຳລັງພັດທະນາ ລວມທັງ ສປປ ລາວ ສາມາດສຳພັດໄດ້ຕົວຈິງເຊັ່ນ: ໂຄງການທາງລົດໄຟ ລາວ-ຈີນ, ໂຄງການທາງດ່ວນພາຍໃນປະເທດ, ໂຄງການພັດທະນາ ແລວເສດຖະກິດ ລາວ-ຈີນ, ການຄ້າໃນຂົງເຂດກະສິກຳ, ພະລັງງານສະອາດ ແລະ ອື່ນໆ. ນີ້ເປັນພຽງແຕ່ຜົນສຳເລັດສ່ວນໜຶ່ງຂອງການຈັດຕັ້ງປະຕິບັດຂໍ້ລິເລີ່ມ ໜຶ່ງແລວໜຶ່ງເສັ້ນທາງ ທີ່ສາມາດບັນລຸໄດ້ ໃນໄລຍະ 10 ປີ ຂອງການປະຕິບັດຂໍ້ລິເລີ່ມດັ່ງກ່າວຢູ່ ສປປ ລາວ ເວົ້າສະເພາະ. ທັງໝົດນີ້, ແມ່ນສອດຄອງກັບຫົວຂໍ້ຂອງກອງປະຊຸມ ໜຶ່ງແລວໜຶ່ງເສັ້ນທາງ ເພື່ອການຮ່ວມມືສາກົນ ຄັ້ງທີ 3 ທີ່ວ່າ: “ການຮ່ວມມື ທີ່ມີຄຸນນະພາບສູງ ກອບໜຶ່ງແລວໜຶ່ງເສັ້ນທາງ”, ແນໃສ່ບັນລຸການພັດທະນາ ແລະ ການຈະເລີບເຕີບໄຕຮ່ວມກັນ.
    ຕໍ່ໜ້າສະພາບການຂອງພາກພື້ນ ແລະ ສາກົນ ທີ່ມີຄວາມແກ້ງແຍ້ງກັນສູງ ຊຶ່ງສາມາດນໍາໄປສູ່ການປະທະກັນດ້ານກຳລັງ ຊຶ່ງຈະເຮັດໃຫ້ສະພາບເສດຖະກິດຂອງໂລກຖົດຖອຍ, ບັ່ນທອນໂອກາດຂອງສັງຄົມໂລກ ໃນການພັດທະນາ ແລະ ສ້າງຄວາມກ້າວໜ້ານັ້ນ, ການຮ່ວມມືກັນດ້ວຍຄວາມຈິງໃຈ ແລະ ສ້າງສັນ ເປັນສິ່ງທີ່ຕ້ອງສົ່ງເສີມຢ່າງຈິງຈັງ. ຕໍ່ກັບບັນຫານີ້,  ສະຫາຍ ທອງລຸນ ສີສຸລິດ ຜູ້ນໍາສູງສຸດຂອງປະເທດເຮົາ ເຫັນວ່າ: 10 ປີຜ່ານມາ, ຂໍ້ລິເລີ່ມ ໜຶ່ງແລວໜຶ່ງເສັ້ນທາງ ໄດ້ມີບົດບາດສຳຄັນ ໃນການສົ່ງເສີມການຮ່ວມມືດ້ານການພັດທະນາ, ກົນໄກການຮ່ວມມືຫຼາຍຝ່າຍ ໃນລະດັບສາກົນ ແລະ ພາກພື້ນຢ່າງມີປະສິດທິຜົນ. ບົນຈິດໃຈດັ່ງກ່າວ, ສະຫາຍ ປະທານປະເທດ ໄດ້ຖືໂອກາດນີ້, ສະແດງຄວາມຊົມເຊີຍຢ່າງຈິງໃຈ ມາຍັງລັດຖະບານຈີນ ໂດຍສະເພາະ ສະຫາຍ ສີ ຈິ້ນຜິງ ທີ່ມີຂໍ້ລິເລີ່ມທີ່ດີເລີດນີ້ ແລະ ເປັນຜູ້ທີ່ມີບົດບາດນໍາໜ້າໃນການສົ່ງເສີ່ມ ແລະ ປົກປ້ອງຜົນປະໂຫຍດລວມຂອງປະເທດກຳລັງພັດທະນາ ກໍຄືຫຼັກການຮ່ວມມືຫຼາຍຝ່າຍ. ສປປ ລາວ, ສະໜັບສະໜູນສຸດຂີດຕໍ່ຂໍ້ລິເລີ່ມໃໝ່ຂອງ ສປ ຈີນ ເປັນຕົ້ນ ຂໍ້ລິເລີ່ມການພັດທະນາທົ່ວໂລກ (GDI), ຂໍ້ລິເລີ່ມຄວາມໝັ້ນຄົງທົ່ວໂລກ (GSI) ແລະ ຂໍ້ລິເລີ່ມອາລິຍະທໍາທົ່ວໂລກ (GCI). ນີ້ຈະເປັນການປະກອບສ່ວນບໍ່ສະເພາະແຕ່ໃນການຊຸກຍູ້ສົ່ງເສີມການຈັດຕັ້ງປະຕິບັດຂໍ້ລິເລີ່ມ ໜຶ່ງແລວໜຶ່ງເສັ້ນທາງ ເທົ່ານັ້ນ, ແຕ່ຍັງຈະເປັນກົນໄກ ໃນການສົ່ງເສີມຄວາມເຂົ້າໃຈ ແລະ ຄວາມເຊື່ອໝັ້ນ ຊຶ່ງກັນ ແລະ ກັນ ລະຫວ່າງ ປະຊາຊາດໃນໂລກ ກໍຄືສົ່ງເສີ່ມສັນຕິພາບ ແລະ ຄວາມໝັ້ນຄົງສາກົນ. 
    ລັດຖະບານແຫ່ງ ສປປ ລາວ ໄດ້ໃຫ້ການສະໜັບສະໜູນຂໍ້ລິເລີ່ມ ໜຶ່ງແລວໜຶ່ງເສັ້ນທາງ ແຕ່ຫົວທີ ໂດຍໄດ້ໃຫ້ຄວາມສຳຄັນຕໍ່ການເຊື່ອມໂຍງ-ເຊື່ອມຈອດ, ເອົາໃຈໃສ່ປັບປຸງ ແລະ ຍົກລະດັບພື້ນ ຖານໂຄງລ່າງດ້ານຄົມມະນາຄົມ ແລະ ຂົນສົ່ງ ຢ່າງຮອບດ້ານ ທັງທາງບົກ, ທາງນໍ້າ ແລະ ທາງອາກາດ. ອັນພົ້ນເດັ່ນ, ແມ່ນໂຄງການຮ່ວມມືເສັ້ນທາງລົດໄຟ ລາວ-ຈີນ ຊຶ່ງເປັນໂຄງການຍຸດທະສາດທີ່ສຳຄັນ ຕໍ່ການປະຕິບັດຂໍ້ລິເລີ່ມໜຶ່ງແລວໜຶ່ງເສັ້ນທາງ, ທັງເປັນການສະໜັບສະໜູນໂດຍກົງໃຫ້ແກ່ ສປປ ລາວ ໃນການ “ຫັນປະເທດທີ່ບໍ່ມີຊາຍແດນຕິດທະເລ ໄປສູ່ປະເທດເຊື່ອມໂຍງ-ເຊື່ອມຈອດ ໃນພາກພື້ນ” ໃຫ້ເປັນຮູບປະທໍາ. ໂຄງການນີ້, ໄດ້ເປີດກວ້າງການຮ່ວມມື, ສົ່ງເສີມການລົງທຶນ, ການຂົນສົ່ງໂດຍສານ ແລະ ສິນຄ້າ, ການທ່ອງທ່ຽວພາຍໃນ ແລະ ລະຫວ່າງປະເທດ ເພື່ອສ້າງເງື່ອນໄຂໃໝ່ ໃຫ້ແກ່ການພັດທະນາຂອງ ສປປ ລາວ. ເປັນການສົ່ງເສີມ ແລະ ອຳນວຍຄວາມສະດວກທາງດ້ານການຂົນສົ່ງກັບບັນດາປະເທດໃນພາກພື້ນ ແລະ ເຊື່ອມໂຍງກັບບັນດາປະເທດໂລກ.
    ປັດຈຸບັນ, ລົດໄຟ ລາວ-ຈີນ ໃຫ້ບໍລິການນັກທ່ອງທ່ຽວ, ຜູ້ໂດຍສານປະມານ 5.000 – 6.000 ຄົນ/ວັນ ແລະ ໃນໄລຍະທໍາອິດໄດ້ໃຫ້ບໍລິການຂົນສົ່ງສິນຄ້າຜ່ານແດນ ປະມານ 10.000 – 12.000 ໂຕນ/ວັນ, ຄາດວ່າຈະເພີ່ມຂຶ້ນອີກຫຼາຍເທົ່າໃນອະນາຄົດ. ພ້ອມດຽວກັນນີ້, ສປປ ລາວ ຍັງໄດ້ພັດທະນາພື້ນຖານໂຄງລ່າງ ສິ່ງອໍານວຍຄວາມສະດວກ ໃຫ້ແກ່ການຂົນສົ່ງຜ່ານແດນ ເປັນຕົ້ນ ໄດ້ພັດທະນາທ່າບົກ (Dry-port) ເພື່ອເປັນເຂດບໍລິການເຊື່ອມຕໍ່ພາຍໃນປະເທດ ແລະ ລະຫວ່າງປະເທດ. ການເຊື່ອມຈອດເສດຖະກິດໂລກ ແບບເປີດກວ້າງ ແມ່ນເປັນທ່າແຮງພື້ນຖານຂອງຄວາມກ້າວໜ້າ ແລະ ຄວາມຈະເລີນຮຸ່ງເຮືອງ ຊຶ່ງຈະນໍາພາບັນດາປະເທດຕ່າງໆໃນທົ່ວໂລກ ກ້າວໄປສູ່ການພັດທະນາທີ່ກົມກຽວ ແລະ ຍືນຍົງ. ບົນພື້ນຖານຈິດໃນດັ່ງກ່າວ, ສປປ ລາວ ຍິນດີສະໜັບສະໜູນ 8 ແຜນປະຕິບັດງານ ທີ່ສະຫາຍ ສີ ຈິ້ນຜິງ ໄດ້ສະເໜີໃນກອງປະຊຸມ “ໜຶ່ງແລວໜຶ່ງເສັ້ນທາງ” ເພື່ອການຮ່ວມມືສາກົນ ຄັ້ງທີ 3, ເພື່ອຊຸກຍູ້ການຮ່ວມມື ໜຶ່ງແລວໜຶ່ງເສັ້ນທາງ ໃຫ້ມີຄຸນນະພາບສູງຂຶ້ນ. ສປປ ລາວ, ກໍພ້ອມແລ້ວທີ່ຈະຮ່ວມມືກັບປະເທດດເພື່ອນມິດ ໃນການປະຕິບັດໂຄງການຕ່າງໆ ຕາມຄວາມສາມາດຂອງຕົນ.
    ທັງໝົດນັ້ນ, ກໍແມ່ນຈຸດໝາຍໜຶ່ງທີ່ສໍາຄັນຂອງ ສປປ ລາວ ໃນການຮ່ວມມືຈັດຕັ້ງປະຕິບັດຂໍ້ລິເລີ່ມ ໜຶ່ງແລວໜຶ່ງເສັ້ນທາງ ທີ່ມີຜົນສຳເລັດ ຊຶ່ງແມ່ນໝາກຜົນທີ່ເປັນຮູບປະທໍາ ສະໜັບສະໜູນໂດຍກົງ ໃຫ້ແກ່ ສປປ ລາວ ໃຫ້ມີບາດກ້າວພັດທະນາແບບກ້າວກະໂດດ ຂ້າມຜ່ານຂີດຈໍາກັດຈາກການເປັນປະເທດ ທີ່ບໍ່ມີຊາຍແດນຕິດກັບທະເລ ໄປສູ່ປະເທດເຊື່ອມໂຍງ-ເຊື່ອມຈອດ ໃນພາກພື້ນ ທີ່ເປັນຮູບປະທໍາ, ສ້າງຜົນປະໂຫຍດຕົວຈິງມາສູ່ປະຊາຊົນ, ມາສູ່ປະເທດຊາດ. ພ້ອມສືບຕໍ່ສະໜັບສະໜູນ ຮ່ວມມືຈັດຕັ້ງປະຕິບັດ 8 ປະຕິບັດງານຮ່ວມມືກັບປະເທດຕ່າງໆໃນຕໍ່ໜ້າ ເພື່ອຊຸກຍູ້ການຮ່ວມມື ໜຶ່ງແລວໜຶ່ງເສັ້ນທາງ ໃຫ້ມີຄຸນນະພາບສູງຂຶ້ນ ຈະເປັນແຮງໜຸນສຳຄັນໃຫ້ແກ່ການພັດທະນາເສຖະກິດ-ສັງຄົມຂອງ ສປປ ລາວ.