ຂ່າວຕ່າງປະເທດລາຍງານ ໃນວັນທີ 5 ສິງຫາ ຜ່ານມາວ່າ: ຄະນະກຳມະການທີ່ປຶກສາກະຊວງແຮງງານ ຂອງຍີ່ປຸ່ນ ໄດ້ມີມະຕິໃນວັນທີ 4 ສິງຫາ ຜ່ານມາ ປັບຂຶ້ນຄ່າແຮງງານຂັ້ນຕ່ຳຕໍ່ຊົ່ວໂມງໂດຍສະເລ່ຍທົ່ວປະເທດ 63 ເຢນ ຫຼື 6% ສູ່ລະດັບສູງສຸດແບບບໍ່ເຄີຍມີມາກ່ອນ ທີ່ 1,118 ເຢນ (7.6 ໂດລາ) ສຳລັບປີງົບປະມານ 2025, ທ່າມກາງຄ່າຄອງຊີບທີ່ເພີ່ມຂຶ້ນ.
ຂ່າວລະບຸວ່າ: ເຖິງວ່າການປັບຂຶ້ນຄັ້ງນີ້ແມ່ນໄວທີ່ສຸດເມື່ອທຽບໃສ່ປີກາຍ ນັບຕັ້ງແຕ່ມີການເກັບກຳຂໍ້ມູນໃນປີ 2002, ແຕ່ຍັງບໍ່ເຖິງລະດັບສະເລ່ຍທີ່ລັດຖະບານຕ້ອງການຕໍ່ປີທີ່ 7.3% ຊຶ່ງເປັນອັດຕາທີ່ຈໍາເປັນຕໍ່ການບັນລຸເປົ້າໝາຍຄ່າແຮງງານຂັ້ນຕໍ່າສະເລ່ຍທົ່ວປະເທດ ທີ່ 1,500 ເຢນ ໃນທ້າຍທົດສະວັດນີ້.
ສຳນັກຂ່າວກຽວໂດ ລາຍງານວ່າ: ການຕັດສິນໃຈດັ່ງກ່າວ ຊຶ່ງໄດ້ບັນລຸຫຼັງຈາກການປຶກສາຫາລືກັນຫຼາຍຄັ້ງຂອງຄະນະກໍາມະການພາຍໃຕ້ກະຊວງສາທາລະນະສຸກ, ແຮງງານ ແລະ ສະຫວັດດີການ ຖືເປັນການເປີດທາງໃຫ້ທຸກແຂວງໃນຍີ່ປຸ່ນ ທັງ 47 ແຂວງມີຄ່າແຮງງານຂັ້ນຕໍ່າເກີນ 1,000 ເຢນ ພາຍໃນປີງົບປະມານ 2025 ຊຶ່ງຈະສິ້ນສຸດໃນເດືອນມີນາ ປີໜ້າ.
ທ່ານ ອິຊິບະ ຊິເງະຣຸ ນາຍົກລັດຖະມົນຕີຍີ່ປຸ່ນ ຊຶ່ງກ່ອນໜ້ານີ້ໄດ້ຮຽກຮ້ອງບັນດາວິສາຫະກິດຂຶ້ນຄ່າຈ້າງ ໄດ້ສະໜັບສະໜູນມະຕິສະບັບຫຼ້າສຸດ ໂດຍລະບຸວ່າ: ການເຕີບໂຕຂອງຄ່າຈ້າງແມ່ນຫົວໃຈຫຼັກຂອງຍຸດທະສາດການເຕີບໂຕທາງເສດຖະກິດຂອງຍີ່ປຸ່ນ. ການເພີ່ມຄ່າຈ້າງຈະຊ່ວຍຟື້ນຟູເສດຖະກິດ ແລະ ຊ່ວຍໃຫ້ທຸລະກິດເຕີບໂຕ ຊຶ່ງຈະນໍາໄປສູ່ວົງຈອນໃນທາງບວກທີ່ຄົນງານໄດ້ຮັບຄ່າຈ້າງໃນລະດັບທີ່ເໝາະສົມ. ທ່ານ ອິຊິບະ ກ່າວຕໍ່ນັກຂ່າວ ພ້ອມທັງລະບຸເຖິງເປົ້າໝາຍຂອງຄ່າແຮງງານຂັ້ນຕໍ່າ 1,500 ເຢນ ວ່າ: ເປັນເປົ້າໝາຍທີ່ສາມາດບັນລຸໄດ້.
ເຖິງວ່າຈະມີຄວາມພະຍາຍາມເພີ່ມຄ່າຈ້າງ, ແຕ່ຄ່າແຮງງານຂັ້ນຕໍ່າຂອງຍີ່ປຸ່ນຍັງຕໍ່າກວ່າປະເທດເສດຖະກິດຫຼັກ ອື່ນໆ ແລະ ຍັງມີຊ່ອງຫວ່າງລະຫວ່າງແຂວງຫຼາຍເຖິງປະມານ 200 ເຢນ. ໂດຍນະຄອນຫຼວງໂຕກຽວເປັນເຂດທີ່ມີຄ່າແຮງງານສູງສຸດ, ໃນຂະນະທີ່ແຂວງອາກິຕະ ແມ່ນຢູ່ໃນລະດັບຕໍ່າສຸດ. ປັດຈຸບັນ, ອັດຕາສະເລ່ຍທົ່ວປະເທດ ແມ່ນ 1,055 ເຢນ.
ທັງນີ້, ໃນປະເທດຍີ່ປຸ່ນ, ລັດຖະບານຈະກໍານົດກ່ຽວກັບຄ່າແຮງງານຂັ້ນຕໍ່າປະຈໍາປີສໍາລັບແຕ່ລະແຂວງ. ຫຼັງຈາກນັ້ນ, ຄະນະກໍາມະການລະດັບແຂວງຈະປະຊຸມເພື່ອພິຈາລະນາອັດຕາທີ່ເໝາະສົມໃນແຕ່ລະເຂດນັບແຕ່ຕົ້ນເດືອນສິງຫາ ກ່ອນທີ່ຈະມີຜົນບັງຄັບໃຊ້ໃນລະດູໃບໄມ້ຫຼົ່ນ.
ຄໍາເຫັນ