ຂ່າວລະບຸວ່າ: ທີມສຳຫຼວດຂອງຍີ່ປຸ່ນເປີດເຜີຍໃນວັນທີ 21 ມິຖຸນາ ຜ່ານມາວ່າ, ພວກເຂົາພົບແຮ່ທາດແມນການີສໂນດູນ (Manganese Nodules) ປະລິມານ 200 ລ້ານກວ່າໂຕນ ທີ່ກົ້ນທະເລ ນອກຝັ່ງທະເລເກາະມິນາມິໂຕຣິ ທາງຕາເວັນອອກຂອງປະເທດ ແລະ ຢູ່ພາຍໃນເຂດເສດຖະກິດສະເພາະຂອງຍີ່ປຸ່ນ. ທີມສຳຫຼວດດັ່ງກ່າວ ຊຶ່ງປະກອບດ້ວຍມູນນິທິນິບປອນ (Nippon Foundation) ແລະ ມະຫາວິທະຍາໄລໂຕກຽວ ວາງແຜນຈະເລີ່ມການທົດລອງຂຸດຄົ້ນແຮ່ທາດດັ່ງກ່າວ ໃນປີ 2025, ໂດຍມີເປົ້າໝາຍຈະເຮັດເປັນທຸລະກິດຮ່ວມມືກັບພາກເອກະຊົນ. ແຮ່ທາດດັ່ງກ່າວປະກອບດ້ວຍໂລຫະຫາຍາກເຊັ່ນ: ໂຄບອລ ແລະ ນິເກິລ.
ທ່ານ ຍາສຸຮີໂຣະ ຄາໂຕະ ສາດສະດາຈານ ຜູ້ຊ່ຽວຊານດ້ານຊັບພະຍາກອນວິທະຍາຂອງມະຫາວິທະຍາໄລໂຕກຽວ ກ່າວໃນງານຖະແຫຼງຂ່າວວ່າ: ຊັບພະຍາກອນເຫຼົ່ານີ້ ສຳຄັນຫຼາຍຕໍ່ຄວາມ ໝັ້ນຄົງທາງເສດຖະກິດ ພວກເຮົາມີເປົ້າໝາຍຈະຂຸດໃຫ້ໄດ້ປີລະ 3 ລ້ານໂຕນ ຄວບຄູ່ໄປກັບການພັດທະນາ ໂດຍຫຼຸດຜົນກະທົບຕໍ່ສິ່ງແວດລ້ອມທາງທະເລໃຫ້ນ້ອຍທີ່ສຸດ. ທັງນີ້, ການສຳຫຼວດພື້ນດິນກົ້ນທະເລຫຼາຍກວ່າ 100 ຈຸດ ລະຫວ່າງເດືອນເມສາ ເຖິງ ເດືອນມິຖຸນາປີນີ້ ໂດຍໃຊ້ເຮືອດຳນໍ້າຄວບຄຸມໄລຍະໄກໃນຄວາມເລິກ 5.200 – 5.700 ແມັດ, ຢືນຢັນການຄົ້ນພົບແຫຼ່ງແຮ່ທາດແມນການີສໂນດູລ ປະລິມານ 230 ລ້ານກວ່າໂຕນ ໃນພື້ນທີ່ປະມານ 10.000 ກິໂລຕາແມັດ.
ຕາມການວິເຄາະຕົວຢ່າງທີ່ເກັບມາໄດ້ ທີມສຳຫຼວດປະເມີນວ່າ ແຮ່ທາດນີ້ປະກອບດ້ວຍໂຄບອລ ປະມານ 610.000 ໂຕນ ພຽງພໍສຳລັບການບໍລິໂພກຂອງຍີ່ປຸ່ນອີກປະມານ 71 ປີ ແລະ ມີ ນິກເກິລ 740.000 ໂຕນ ທຽບເທົ່າກັບປະລິມານການໃຊ້ງານໃນຍີ່ປຸ່ນເຖິງ 11 ປີ.
ຄໍາເຫັນ