ຜົນການສໍາຫຼວດຂອງ BOK, ທີ່ດໍາເນີນໃນລະຫວ່າງວັນທີ 19 ພຶດສະພາ ຫາ 17 ມິຖຸນາ ໃນບັນດາພະນັກງານ ຈຳນວນ 5,512 ຄົນ ທີ່ມີອາຍຸລະຫວ່າງ 15 ຫາ 64 ປີ, ພົບວ່າ 51.8% ຂອງພະນັກງານ ສ ເກົາຫຼີ ໃຊ້ GenAI ໃນບ່ອນເຮັດວຽກ, ໃນຂະນະທີ່ 17.1% ລະບຸວ່າໃຊ້ AI ເຮັດວຽກເປັນປະຈຳ.
ບົດລາຍງານຍັງເປີດເຜີຍວ່າ: ອັດຕາສ່ວນຂອງຜູ້ໃຊ້ AI ເຮັດວຽກໃນ ສ ເກົາຫຼີ ແມ່ນສູງກວ່າໃນ ສະຫະລັດ ອາເມຣິກາ ເກືອບ 2 ເທົ່າ. ນອກຈາກນີ້, ໄລຍະເວລາສະເລ່ຍໃນການໃຊ້ AI ຕໍ່ອາທິດແມ່ນສູງກວ່າດ້ວຍ, ໂດຍຊາວ ສ ເກົາ ໃຊ້ AI ໂດຍສະເລ່ຍ 5-7 ຊົ່ວໂມງ, ເມື່ອທຽບກັບ 0.5-2 ຊົ່ວໂມງສໍາລັບພະນັກງານໃນ ສະຫະລັດ ອາເມຣິກາ.
ຜົນການສໍາຫຼວດສະແດງໃຫ້ເຫັນວ່າ: ຜູ້ຊາຍ ສ ເກົາຫຼີໃຊ້ AI ຫຼາຍກວ່າແມ່ຍິງ. ໃນຂະນະທີ່ອັດຕາການໃຊ້ AI ໃນກຸ່ມຜູ້ທີ່ມີອາຍຸ 18-29 ປີແມ່ນສູງກວ່າ ເມື່ອທຽບກັບກຸ່ມອາຍຸ 50-64 ປີ ແລະ ໃນກຸ່ມຜູ້ໃຊ້ທີ່ມີລະດັບປະລິນຍາໂທສູງກວ່າຜູ້ທີ່ມີລະດັບປະລິນຍາຕີ.
ເມື່ອພິຈາລະນາເປັນແຕ່ລະອາຊີບແລ້ວພົບວ່າ: ອາຊີບທີ່ມີໃບອະນຸຍາດເຊັ່ນ: ແພດໝໍ ແລະ ທະນາຍຄວາມເປັນຜູ້ໃຊ້ AI ຫຼາຍທີ່ສຸດ, ໂດຍມີອັດຕາການນໍາໃຊ້ 69.2%, ຮອງລົງມາແມ່ນຜູ້ຈັດການ ຢູ່ທີ່ 65.4% ແລະພະນັກງານຫ້ອງການຢູ່ທີ່ 63,1%.
ບົດລາຍງານຍັງຊີ້ໃຫ້ເຫັນວ່າ: GenAI ຊ່ວຍຫຼຸດຊົ່ວໂມງການເຮັດວຽກລົງໂດຍສະເລ່ຍ 3.8% ຫຼື 1.5 ຊົ່ວໂມງຕໍ່ອາທິດເຮັດວຽກ 40 ຊົ່ວໂມງ.
ນອກຈາກນັ້ນ, BOK ຄາດວ່າ AI ຈະປະກອບສ່ວນປະມານ 1% ໃຫ້ແກ່ການເຕີບໂຕຂອງ GDP ທີ່ 3.9% ລະຫວ່າງໄຕມາດ 4/2022 ເຖິງໄຕມາດ 2/2025.
ຄໍາເຫັນ