ຍົກລະດັບຄວາມຮູ້ ການນໍາໃຊ້ລະບົບຄຸ້ມຄອງລາຍຮັບສ່ວຍສາອາກອນ

ການຝຶກອົບຮົມດັ່ງກ່າວ ນອນຢູ່ໃນໂຄງການປັບປຸງ ການຄຸ້ມຄອງການເງິນແຫ່ງລັດໄລຍະ 3 ໂດຍການສະໜັບສະໜູນຈາກກະຊວງການຕ່າງປະເທດ ແລະ ການຄ້າອົສຕຣາລີ ແລະ ສະຫະພາບເອີຣົບ.

ສໍາລັບແຜນການຝຶກອົບຮົມລະບົບ TaxRIS ໃນປີ 2026 ຕາມແຜນແມ່ນຈະຈັດເປັນ 8 ຊຸດ. ສຳລັບ ຊຸດທີ 1 ໄດ້ຝຶກອົບຮົມໃຫ້ພະນັກງານສ່ວຍສາອາກອນຂັ້ນເມືອງ ແລະ ນະຄອນຈຳນວນ 20 ເມືອງ ຈາກແຂວງສະຫວັນນະເຂດ 15 ເມືອງ ແລະ ແຂວງອັດຕະປື 5 ເມືອງ ລວມທັງໝົດ 40 ຄົນ.

ທ່ານ ອານຸວົງ ບົວພັນ ກ່າວວ່າ: ອີງໃສ່ສະພາບເງື່ອນໄຂໃນປັດຈຸບັນ ການປັບປຸງກົດໝາຍບາງສະບັບ ໃນແຕ່ລະໄລຍະ, ການຫັນເອົາວຽກງານເກັບລາຍຮັບຊັບສິນເຂົ້າໃນລະບົບ TaxRIS, ການປັບປຸງກົນໄກ ການແຈ້ງ-ມອບໃຫ້ມີຄວາມສະດວກ, ການຍົກລະດັບລະບົບໃຫ້ສາມາດເກັບກໍາຂໍ້ມູນໄດ້ກວ້າງຂວາງຂຶ້ນກວ່າເກົ່າ ເພື່ອນໍາໃຊ້ໃນການວິເຄາະ-ວິໄຈ, ການເຊື່ອມຕໍ່ລະບົບຕ່າງໆ ທັງພາຍນອກ ແລະ ກົມກອງ ພາຍໃນກະຊວງການເງິນເຊື່ອມກັບລະບົບ TaxRIS; ລະບົບ TaxRIS ຈຶ່ງໄດ້ຮັບການປັບປຸງ, ປ່ຽນແປງ ແລະ ຍົກລະດັບຂຶ້ນຕື່ມ ເພື່ອສາມາດຮອງຮັບກັບສະພາບເງື່ອນໄຂຕ່າງໆ ເພື່ອໃຫ້ມີຄວາມສອດຄ່ອງ ຕາມສະພາບການຈັດເກັບລາຍຮັບແຕ່ລະໄລຍະ.

ຊຸດອົບຮົມຄັ້ງນີ້, ແນໃສ່ສ້າງຜູ້ຊຳນານງານ, ຜູ້ທີ່ນຳໃຊ້ຕົວຈິງ ທີ່ຈະເປັນຂົວຕໍ່ໃນການຜັນຂະຫຍາຍບັນ ດາບົດຮຽນຕ່າງໆ ຂອງນັກວິທະຍາກອນເປັນເວລາ 5 ວັນ. ຊຶ່ງສຳມະນາກອນໄດ້ຮຽນຮູ້ ລົງເລິກກ່ຽວກັບຈຸດທີ່ໄດ້ມີການປັບປຸງ ຫຼື ອັບເດດຂໍ້ມູນ: ການປັບປຸງຂໍ້ມູນຜູ້ເສຍອາກອນ; ການໂອນຫົວໜ່ວຍ; ການເບິ່ງສະຖິຕິ; ການອອກໃບແຈ້ງມອບອາກອນມູນຄ່າເພີ່ມ; ການອອກໃບແຈ້ງມອບລາຍຮັບຊັບສິນ (ຟອມ N); ການອອກໃບແຈ້ງມອບອາກອນປະເພດອື່ນໆ (ຟອມ M ທີ່ມີການປັບປຸງ ກົນໄກການປ້ອນຂໍ້ມູນເພີ່ມເຕີມ); ການເບິ່ງບົດລາຍງານຈາກແຕ່ລະໂມດູນ; ການດັດແກ້ ແລະ ຍົກເລິກໃບແຈ້ງ; ການຍົກເລິກຄ່າປັບໄໝຕ່າງໆ; ລວມທັງ ການອອກບົດບັນທຶກກວດກາ ແລະ ການດຶງເອົາຂໍ້ມູນຈາກລະບົບ ເພື່ອກວດກາໄລ່ລຽງຕ່າງໆ.

ຊຸດອົບຮົມຄັ້ງນີ້, ຫວັງວ່າສຳມະນາກອນຈະເອົາໃຈໃສ່ດ້ວຍຄວາມຮັບຜິດຊອບສູງ ໃນການຄົ້ນຄວ້າຮໍ່າຮຽນ, ເຊື່ອມຊຶມ ພ້ອມກັບສົນທະນາ ແລກປ່ຽນບົດຮຽນໃນແຕ່ລະບັນຫາ ກັບນັກວິທະຍາກອນຢ່າງເລິກເຊິ່ງ ເພື່ອ ເກັບກ່ຽວເອົາບົດຮຽນໄປນໍາໃຊ້ ແລະ ສາມາດຖ່າຍທອດຄວາມຮູ້ຕໍ່ໃຫ້ໄດ້ໝາກຜົນທີ່ສຸດ ແລະ ເຮັດໃຫ້ວຽກງານບໍລິການຜູ້ເສຍອາກອນເຂັ້ມແຂງຂຶ້ນເປັນກ້າວໆໄປ.

ຂ່າວ: ກະຊວງການເງິນ