ຍົກລະດັບທິດສະດີການເມືອງຂັ້ນຕົ້ນຊຸດທີ IIໃຫ້ສະມາຊິກພັກ-ພະນັກງານ ຫ້ອງວ່າການສູນກາງພັກ

ພິທີເປີດຊຸດຮຽນທິດສະດີການເມືອງຂັ້ນຕົ້ນລະບົບ 3 ເດືອນ ຊຸດທີ II ໃຫ້ແກ່ສະມາຊິກພັກ-ພະນັກງານຫ້ອງວ່າການສູນກາງພັກໄດ້ເປີດຂຶ້ນໃນວັນທີທີ 2ຕຸລາ ນີ້ ທີ່ຫ້ອງວ່າການສູນກາງພັກ ໂດຍການເປັນປະທານຮ່ວມຂອງ ສະຫາຍ ຄຳຜາ ພິມມະສອນ ຮອງເລຂາຄະນະພັກ ຮອງຫົວໜ້າຫ້ອງວ່າການສູນກາງພັກ, ສະຫາຍ ດາວສະຫວັນ ເຄືອມີໄຊ ຄະນະປະຈຳພັກ ຮອງຫົວໜ້າສະຖາບັນການເມືອງ ແລະການປົກຄອງແຫ່ງຊາດ ຊຶ່ງມີຄະນະພັກ, ຄະນະກົມ, ຄະນະຮັບຜິດຊອບ ແລະ ສະມາຊິກພັກ-ພະນັກງານລັດຖະກອນວິຊາການ ທີ່ນອນໃນແຜນກໍ່ສ້າງ-ບຳລຸງພະນັກງານຂອງຫ້ອງວ່າການສູນກາງພັກ ທາງດ້ານທິດສະດີການເມືອງ ແລະ ວິຊາສະເພາະ ປີ2022-2023 ເຂົ້າຮ່ວມ
    ການເປີດຊຸດຝຶກອົບຮົມທິດສະດີຂັ້ນຕົ້ນ ໃຫ້ແກ່ພະນັກງານຂອງຫ້ອງວ່າການສູນກາງພັກນີ້ແມ່ນເພື່ອສ້າງຄວາມຮັບຮູ້, ຄວາມເຂົ້າໃຈເປັນເອກະພາບ ກ່ຽວກັບພື້ນຖານທາງດ້ານທິດສະດີການເມືອງໃຫ້ແກ່ສະມາຊິພັກ-ພະນັກງານ ພາຍໃນຫ້ອງວ່າການສູນກາງພັກ ໃຫ້ມີຄວາມເຂົ້າໃຈຄວາມຮູ້ພື້ນຖານທິດສະດີການເມືອງ, ມີທັດສະນະຫຼັກໝັ້ນການເມືອງ, ຍົກສູງຄວາມສາມາດໃນການວິເຄາະ ວິໄຈບັນຫາຢ່າງມີວິທະຍາສາດ, ຮູ້ນໍາໃຊ້ວິທີວິທະຍາເຂົ້າໃນການນໍາພາ-ຄຸ້ມຄອງ, ວິທີການຝຶກຝົນຫຼໍ່ຫຼອມບຸກຄະລິກຂະພາບຂອງພະນັກງານ ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ວຽກງານ ພາຍໃນຫ້ອງວ່າການສູນກາງພັກ,ໃຫ້ກຳໄດ້ທິດສະດີ ມາກ-ເລນິນ, ແນວຄິດ ໄກສອນ ພົມວິຫານ, ມູນເຊື້ອ ແລະ ປະຫວັດສາດ ຂອງພັກ, ຂອງຊາດ, ແນວທາງນະໂຍບາຍຂອງພັກ, ກົດໝາຍຂອງລັດໄດ້ຮັບການຄົ້ນຄວ້າ, ເຊື່ອມຊຶມເຂົ້າສູ່ວຽກງານຕົວຈິງ, ທັງເປັນພື້ນຖານໃຫ້ແກ່ສະມາຊິກພັກ-ພະນັກງານ ໃນການຍົກລະດັບຄວາມຮູ້ກ່ຽວກັບທັດສະນະຂອງພັກ, ນະໂຍບາຍຂອງລັດຢ່າງເລິກເຊິ່ງ, ມີຫຼັກໝັ້ນຢ່າງໜັກແໜ້ນ,ຄຸນສົມບັດສິນທຳປະຕິວັດດີ, ຈິດໃຈຮັກຊາດ, ຮັບໃຊ້ປະຊາຊົນຢ່າງແທ້ຈິງ, ເຮັດໃຫ້ສະມາຊິກພັກ-ພະນັກງານ ພາຍໃນຫ້ອງວ່າການສູນກາງພັກຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ປະຫວັດຄວາມເປັນມາ ແລະ ການເຕີບໃຫຍ່ຂະຫຍາຍຕົວຂອງຫ້ອງວ່າການສູນກາງພັກ, ພາລະບົດບາດ, ໜ້າທີ່ ແລະ ຂອບເຂດສິດຂອງຫ້ອງວ່າການສູນກາງພັກ.
ການເປີດການຮຽນທິດສະດີການເມືອງໃນຄັ້ງນີ້ ແມ່ນຈະໄດ້ຄົ້ນຄວ້າຮ່ຳຮຽນ ປະກອບດ້ວຍ10ວິຊາ ເຊັ່ນ: ກຸ່ມວິຊາປັດຊະຍາມາກ-ເລນິນ, ກຸ່ມວິຊາເສດຖະສາດການເມືອງມາກ-ເລນິນ, ກຸ່ມວິຊາລັດທິສັງຄົມນິຍົມວິທະຍາສາດ, ກຸ່ມວິຊາ ແນວຄິດ ໄກສອນ ພົມວິຫານ, ວິຊາທິດສະດີລັດ ແລະ ກົດໝາຍ, ວິຊາການເມືອງວິທະຍາ, ວິຊາການຄຸ້ມຄອງບໍລິຫານລັດ, ວິຊາເຕັກນິກການບໍລິຫານ, ກຸ່ມວິຊາ ປະຫວັດສາດພັກ ແລະ ກໍ່ສ້າງພັກ ນອກນີ້ຍັງມີເນື້ອໃນບົດຮຽນກ່ຽວກັບວຽກງານຂອງຫ້ອງວ່າການສູນກາງພັກ ປະກອບມີ 8 ຫົວຂໍ້ຄື:ພາລະບົດບາດຂອງຫ້ອງວ່າການສູນກາງພັກ,ໂຄງປະກອບການຈັດຕັ້ງຂອງຫ້ອງວ່າການສູນກາງພັກ ແລະ ພາລະບົດບາດ, ໜ້າທີ່ຂອງບັນດາກົມ, ມູນເຊື້ອຂອງຫ້ອງວ່າການສູນກາງພັກ, ຈັນຍາບັນ-ຈັນຍາທຳຂອງພະນັກງານ-ລັດຖະກອນ, ພິທີການ ແລະ ມາລະຍາດຂອງພະນັກງານ, ການສ້າງແຜນການ, ແຜນງານ ແລະ ໂຄງການ, ວິທີການສະຫຼຸບ, ປະເມີນຜົນ ແລະ ລາຍງານວຽກງານຂອງຫ້ອງວ່າການສູນກາງພັກ, ບັນດາເອກະສານຕ່າງໆຂອງພັກ ທີ່ຕິດພັນກັບພາລະບົດບາດຂອງຫ້ອງວ່າ ການສູນກາງພັກ.
(ຂ່າວ:ຫ້ອງວ່າການສູນກາງພັກ-ພາບ:ສຸກສະຫວັນ)