ຍົກລະດັບຊີວິດການເປັນຢູ່ຂອງປະຊາຊົນແຂວງວຽງຈັນໃຫ້ດີຂຶ້ນເທື່ອລະກ້າວ

 ຄື 1 ໃນ 6 ເປົ້າໝາຍໃນການພັດທະນາເສດຖະກິດ-ສັງຄົມຂອງແຂວງວຽງຈັນ ຊຶ່ງໃນໄລຍະຜ່ານມາອົງການປົກຄອງແຂວງວຽງຈັນ ໄດ້ສຸມໃສ່ຫຼາຍວຽກງານ ເພື່ອຍົກລະດັບຊີວິດການເປັນຢູ່ຂອງປະຊາຊົນຊາວແຂວງວຽງຈັນໃຫ້ດີຂຶ້ນເທື່ອລະກ້າວ. ໃນໄລຍະ 6 ເດືອນ ຕົ້ນປີ 2024 ແຂວງວຽງຈັນ ໄດ້ເອົາໃຈໃສ່ຈັດຕັ້ງປະຕິບັດຫຼາຍວຽກງານ ທັງການພັດທະນາຊົນນະບົດ ແລະ ລຶບລ້າງຄວາມທຸກຍາກ, ຄອບຄົວວັດທະນະທໍາ ແລະ ບ້ານວັດທະນະທໍາ ຕິດພັນກັບວຽກງານ 3 ສ້າງ ແລະ ເຕົ້າໂຮມຄວາມສາມັກຄີປະຊາຊົນບັນດາເຜົ່າ.
ໄລຍະ 6 ເດືອນ ຕົ້ນປີນີ້, ແຂວງວຽງຈັນ ໄດ້ເອົາໃຈໃສ່ຊຸກຍູ້ວຽກພັດທະນາຊົນນະບົດ ແລະ ລຶບລ້າງຄວາມທຸກຍາກ ເຮັດໃຫ້ທົ່ວແຂວງຍັງມີຄອບຄົວທຸກຍາກ 3.720 ຄອບຄົວເທົ່າກັບ 4,72% ຂອງຄອບຄົວທັງໝົດ; ໄດ້ປະເມີນການສ້າງບ້ານພັດທະນາຢູ່ເມືອງແມດ 4 ບ້ານ ສາມາດປະຕິບັດໄດ້ຕາມມາດຖານເງື່ອນໄຂ ດໍາລັດ 348/ລບ ແລະ ຢູ່ໃນຂັ້ນຕອນສະເໜີຮັບຮອງເປັນບ້ານພັດທະນາ, ມາຮອດປັດຈຸບັນມີບ້ານພັດທະນາ 163 ບ້ານ, ເທົ່າກັບ 38% ຂອງບ້ານທັງໝົດ ແລະ ມີຄອບຄົວພັດທະນາ 63.454 ຄອບຄົວ, ເທົ່າກັບ 80,59% ຂອງຄອບຄົວທັງໝົດ, ມີບ້ານວັດທະນາທຳທັງໝົດ 413 ບ້ານ, ກວມເອົາ 96,49% ຂອງບ້ານທັງໝົດ ແລະ ມີຄອບຄົວວັດທະນະທໍາ 72.095 ຄອບຄົວ, ກວມເອົາ 75,82% ຂອງຄອບຄົວທົ່ວແຂວງ. ຫັນເອົາພະນັກງານລົງກໍ່ສ້າງຮາກຖານການເມືອງ ປະຈໍາຈຸດສຸມຂອງແຂວງ 29 ສະຫາຍຍິງ 3 ສະຫາຍ, ໃນນີ້: ຂັ້ນແຂວງ 13 ສະຫາຍ ແລະ ຂັ້ນເມືອງ 16 ສະຫາຍ.
 ພ້ອມດຽວກັນນີ້, ແຂວງວຽງຈັນ ກໍສາມາດປະຕິບັດ ການສ້າງແຂວງເປັນຫົວໜ່ວຍຍຸດທະສາດ 7 ດ້ານ 66 ຕົວຊີ້ວັດ ບັນລຸ 80% ຂຶ້ນໄປ ມີ 5 ດ້ານ 43 ຕົວຊີ້ວັດ, ຍັງບໍ່ບັນລຸ 2 ດ້ານ 23 ຕົວຊີ້ວັດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ມີ 5 ດ້ານ 47 ຕົວຊີ້ວັດບັນລຸ 80% ຂຶ້ນໄປທັງ 5 ດ້ານ 47 ຕົວຊີ້ວັດ ມີ 4 ເມືອງ (ໂພນໂຮງ, ທຸລະຄົມ, ໝື່ນ, ຊະນະຄາມ) ຍັງບໍ່ບັນລຸ 7 ເມືອງ, ທົ່ວແຂວງ ມີ 428 ບ້ານ, ສ້າງບ້ານເປັນຫົວໝ່ວຍພັດທະນາ 4 ດ້ານ, 30 ຕົວຊີ້ວັດ ບັນລຸ 80% ຂຶ້ນໄປທັງ 4 ດ້ານ 30 ຕົວຊີ້ວັດ ມີ 258 ບ້ານ, ຍັງບໍ່ບັນລຸ 170 ບ້ານ.
 ແຂວງວຽງຈັນ, ຍັງໄດ້ເອົາໃຈໃສ່ເຕົ້າໂຮມຄວາມສາມັກຄີປະຊາຊົນບັນດາເຜົ່າ, ປຸກລະດົມເຮັດໜ້າທີ່ປົກປັກຮັກສາ ແລະ ສ້າງສາພັດທະນາ; ພ້ອມກັນນັ້ນ, ກໍຍັງໄດ້ຈັດຕັ້ງປະຕິບັດຂໍ້ແຂ່ງຂັນຊາວໜຸ່ມ 4 ບຸກ ຊຶ່ງໃນຕົ້ນປີ 2024 ໄດ້ປະກາດ 4 ບຸກ ແລະ ມອບທຸງໄຊນາມມະຍົດປີ 2023 ໃຫ້ 2 ພາກສ່ວນຄື: ພະແນກພະລັງງານ ແລະ ບໍ່ແຮ່ແຂວງ, ຊາວໝຸ່ມເມືອງວັງວຽງ; ມອບຫຼຽນກາລະນຶກຊາວໜຸ່ມ 65 ປີ ໃຫ້ຄະນະຊາວໜຸ່ມເມືອງ ແລະ ໜ່ວຍຮາກຖານຊາວໜຸ່ມ, ເປີດຂະບວນການແຂ່ງຂັນ 3 ດີ 4 ຮູ້ ຂອງເຍົາວະຊົນ ໄດ້ 243 ກອງ, ມອບໃບຢັ້ງຢືນເປັນເຍົາວະຊົນທັນວາ 13.690ຄົນ, ສ້າງຂະບວນການຕອນຮັບກອງປະຊຸມໃຫຍ່ຂັ້ນຂອງຕົນ. ພ້ອມນີ້, ກໍເອົາໃຈໃສ່ສຶກສາອົບຮົມການເມືອງແນວຄິດ, ຍົກລະດັບຄວາມຮູ້ຄວາມສາມາດໃຫ້ແກ່ສະມາຊິກແມ່ຍິງທຸກຂັ້ນ, ສາມາດເປີດກອງປະຊຸມໃຫຍ່ສະຫະພັນແມ່ຍິງ ຄ່ຽງຄູ່ກັນນັ້ນ ກໍຈັດຕັ້ງປະຕິບັດຂໍ້ແຂ່ງຂັນ 3 ດີ ຕິດພັນກັບຂໍ້ແຂ່ງຂັນຮັກຊາດ-ພັດທະນາ ແລະ ວຽກງານ 3 ສ້າງ, ສາມາດຮັບຮອງເອົາໜ່ວຍສະຫະພັນແມ່ຍິງ 3 ດີຂັ້ນແຂວງໄດ້ 5 ໜ່ວຍ ແລະ 1 ຮາກຖານ, ເມືອງໄດ້ 1ເມືອງ, ພ້ອມທັງເຜີຍແຜ່ເນື້ອໃນຂໍ້ແຂ່ງຂັນ3 ດີ ໄດ້ 5 ຄັ້ງ, ມີຜູ້ເຂົ້າຮ່ວມ 315 ຄົນຍິງ 280 ຄົນ.
ເພື່ອຍົກລະດັບຊີວິດການເປັນຢູ່ຂອງປະຊາຊົນຊາວແຂວງວຽງຈັນ ໃຫ້ດີຂຶ້ນເທື່ອລະກ້າວ ຕາມທິດມີກິນມີໃຊ້; ສະນັ້ນ, ໃນໄລຍະ 6 ເດືອນທ້າຍປີ ແຂວງວຽງຈັນ ໄດ້ສືບຕໍ່ພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນໃຫ້ທົ່ວເຖິງ ຕາມທິດ 3 ສ້າງ; ສືບຕໍ່ຕິດຕາມກວດກາ ແລະ ປະເມີນຕາມມາດຖານພົ້ນທຸກຂອງຄອບຄົວທຸກຍາກໃຫ້ຫຼຸດລົງ 1.400 ຄອບຄົວ, ໃຫ້ຍັງເຫຼືອ 2.320 ຄອບຄົວ, ສ້າງບ້ານພັດທະນາ ແລະ ຄອບຄົວພັດທະນາ ໃຫ້ໄດ້ຕາມແຜນການທີ່ກໍານົດໄວ້; ສືບຕໍ່ສ້າງບ້ານວັດທະນະທຳໃຫ້ບັນລຸ 5 ບ້ານ ແລະ ຄອບຄົວວັດທະນະທຳໃຫ້ໄດ້ 1.900 ຄອບຄົວ ພ້ອມທັງສືບຕໍ່ຕິດຕາມຊຸກຍູ້ປະເມີນຄືນບ້ານວັດທະນະທຳ ທີ່ປະຕິບັດໄດ້ແລ້ວໃຫ້ຮັກສານາມມະຍົດ ແລະ ກາຍເປັນເມືອງວັດທະນະທຳ; ສືບຕໍ່ສ້າງບ້ານໃຫຍ່ໃຫ້ກາຍເປັນຕົວເມືອງໃນຊົນນະບົດໃຫ້ໄດ້ 1 ຈຸດສຸມ (ທົ່ວແຂວງມີ 7 ຈຸດສຸມ) ເພື່ອສ້າງເປັນຕົວແບບໃຫ້ແກ່ຈຸດສຸມອື່ນໆ. ພ້ອມດຽວກັນ, ກໍສືບຕໍ່ຫັນເອົາພະນັກງານລົງກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແກ້ໄຂຄວາມທຸກຍາກ ແລະ ເຮັດວຽກງານ 3 ສ້າງຢ່າງແຂງແຮງ, ຕິດພັນກັບການກະກຽມກອງປະຊຸມໃຫຍ່3 ຂັ້ນຂອງພັກ; ຕິດຕາມຊຸກຍູ້ອົງການຈັດຕັ້ງມະຫາຊົນໃນການສ້າງຂະບວນການຂໍ້ແຂ່ງຂັນຕ່າງໆ ແລະ ກະກຽມເປີດກອງປະຊຸມໃຫຍ່ໃຫ້ໄດ້ດໍາເນີນຕາມແຜນການທີ່ວາງໄວ້ຕາມຂັ້ນຂອງຕົນ.
ບັນດາຂໍ້ມູນຂ້າງເທິງ, ໄດ້ຖືກເຜີຍແຜ່ໃນກອງປະຊຸມສະໄໝສາມັນ ເທື່ອ 7 ຊຸດທີ II ຂອງສະພາປະຊາຊົນແຂວງວຽງຈັນ ທີ່ໄດ້ຈັດຂຶ້ນໃນລະຫວ່າງວັນທີ 31 ກໍລະກົດ ຫາ 2 ສິງຫາ 2024.