 |
ກອງປະຊຸມຄັ້ງນີ້, ເປັນການຄົ້ນຄວ້າບັນດາເນື້ອໃນສໍາຄັນໃຫ້ມີຄວາມລະອຽດຈະແຈ້ງໂດຍສະເພາະການຕົກລົງບັນຫາສໍາຄັນພື້ນຖານຂອງທ້ອງຖິ່ນກ່ອນທີ່ຈະນໍາເຂົ້າພິຈາລະນາ, ຮັບຮອງໃນກອງປະຊຸມສະໄໝສາມັນ ເທື່ອທີ 9 ຂອງສະພາປະຊາຊົນແຂວງ. ກອງປະຊຸມຄັ້ງນີ້, ໄດ້ຮັບຟັງການລາຍງານໂດຍສັງເຂບ ແລະ ສົນທະນາແລກປ່ຽນຄໍາຄິດເຫັນໃສ່ບາງເນື້ອໃນເປັນຕົ້ນ: ບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງໄລຍະ 6 ເດືອນຕົ້ນປີ ແລະ ທິດທາງແຜນການ 6 ທ້າຍປີ 2025, ຕິດພັນກັບການແກ້ໄຂຄວາມທຸກຍາກຂອງປະຊາຊົນ; ການສ້າງ ແລະ ປັບປຸງນິຕິກໍາໃຕ້ກົດໝາຍຈໍານວນ 2 ສະບັບຄື: ຮ່າງຂໍ້ຕົກລົງຂອງທ່ານເຈົ້າແຂວງໆສະຫວັນນະເຂດວ່າດ້ວຍການສະກັດກັ້ນ ແລະ ແກ້ໄຂບັນຫາຢາເສບຕິດໃນສະຖານທີ່ສຶກສາພາຍໃນແຂວງ (ສ້າງໃໝ່) ແລະ ຮ່າງຂໍ້ຕົກລົງຂອງທ່ານເຈົ້າແຂວງສະຫວັນນະເຂດວ່າດ້ວຍການຄຸ້ມຄອງແຜນຜັງນະຄອນໄກສອນພົມວິຫານ ແລະ ເມືອງອຸທຸມພອນແຂວງສະຫວັນນະເຂດ (ສ້າງໃໝ່).
ໃນໂອກາດນີ້, ປະທານກອງປະຊຸມໄດ້ຮຽກຮ້ອງໃຫ້ບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13 ແລະ ສະມາຊິກສະພາປະຊາຊົນແຂວງ, ຈົ່ງພ້ອມກັນຍົກສູງຄວາມຮັບຜິດຊອບໜ້າທີ່ການເມືອງສຸມທຸກສະຕິປັນຍາຄວາມຮູ້ຄວາມສາມາດເຂົ້າໃນການຄົ້ນຄວ້າ ແລະ ປະກອບຄຳຄິດເຫັນຢ່າງເລິກເຊິ່ງ, ຖີ່ຖ້ວນ, ສົນທະນາແລກປ່ຽນຄໍາຄິດ-ຄຳເຫັນເຊິ່ງກັນ ແລະ ກັນ, ຍົກໃຫ້ເຫັນດ້ວຍຫຼັກການ, ລັກສະນະສ້າງສັນ, ຈະແຈ້ງ ແລະ ເຂົ້າໃຈງ່າຍ.
ພ້ອມນີ້ ພາກສ່ວນທີ່ກ່ຽວຂ້ອງຈົ່ງໄດ້ເອົາໃຈໃສ່ໃນການຕິດຕາມກອງປະຊຸມ, ກະກຽມມີຄໍາເຫັນແລະ ອະທິບາຍຊີ້ແຈງຕໍ່ການແລກປ່ຽນຮັບປະກັນຄວາມເປັນເອກະພາບຕໍ່ບັນດາເນື້ອໃນໃຫ້ມີລັກສະນະວິຊາການ ແລະ ຮັບປະກັນສາມາດຊຸກຍູ້ການປະຕິບັດພາລະບົດບາດຂອງແຕ່ລະພາກສ່ວນໃຫ້ຖືກຕ້ອງແລະ ສອດຄ່ອງຕາມກົດໝາຍ. ທັງນີ້ກໍເພື່ອຍົກສູງທາງດ້ານເນື້ອໃນຕ່າງໆໃຫ້ມີຄຸນນະພາບ, ສົມບູນ, ຄົບຖ້ວນ, ຮັດກຸມ, ສອດຄ່ອງກັບສະພາບຄວາມເປັນຈິງຂອງທ້ອງຖິ່ນເວົ້າລວມເວົ້າສະເພາະຕິດພັນກັບການຂະຫຍາຍຕົວຂອງເສດຖະກິດ-ສັງຄົມຂອງແຂວງໃນປັດຈຸບັນອີກດ້ວຍ.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ