ໄດ້ຈັດກອງປະຊຸມສໍາມະນາ ພາຍໃຕ້ຫົວຂໍ້: “ຍົກສູງປະສິດທິພາບໃນວຽກງານຄຸ້ມຄອງ ແລະ ພັດທະນາບຸກຄະລາກອນ ຂອງກະຊວງການຕ່າງປະເທດ ແລະ ຂະແໜງການຕ່າງປະເທດ” ຂຶ້ນ ໂດຍການເປັນປະທານຂອງ ທ່ານ ໄມທອງ ທຳມະວົງສາ ຮອງລັດຖະມົນຕີກະຊວງການຕ່າງປະເທດ.
 |
ກອງປະຊຸມຄັ້ງນີ້, ມີຄະນະກົມ, ຄະນະພະແນກ ແລະ ວິຊາການ ຕາງໜ້າຈາກຫ້ອງການ, ບັນດາກົມ, ຫ້ອງການຄະນະກຳມະການຊາຍແດນແຫ່ງຊາດ, ຫ້ອງການບໍລິການສະຖານທູດ, ສະຖາບັນການຕ່າງປະເທດ ກະຊວງການຕ່າງປະເທດ, ກະຊວງປ້ອງກັນປະເທດ, ກະຊວງສຶກສາທິການ ແລະ ກິລາ, ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງອຸດສາຫະກຳ ແລະ ການຄ້າ, ກະຊວງແຜນການ ແລະ ການລົງທຶນ, ກະຊວງແຮງງານ ແລະ ສະຫວັດດີການສັງຄົມ, ພະແນກການຕ່າງປະເທດແຂວງວຽງຈັນ ແລະ ຜູ້ຕາງໜ້າຈາກ ສະຖາບັນລາວ-ອົດສະຕຣາລີ ແລະ ສະຖານເອກອັກຄະລັດຖະທູດ ອົດສະຕຣາລີ ປະຈຳ ສປປ ລາວ ເຂົ້າຮ່ວມ ເພື່ອແນ່ໃສ່ຍົກສູງປະສິດທິພາບໃນວຽກງານຄຸ້ມຄອງ ແລະ ພັດທະນາບຸກຄະລາກອນ ພາຍໃນການຄຸ້ມຄອງນໍາພາຂອງບັນດາພາກສ່ວນດັ່ງກ່າວ.
 |
ໃນໂອກາດດັ່ງກ່າວ, ທ່ານ ໄມທອງ ທຳມະວົງສາ ໄດ້ກ່າວເປີດກອງປະຊຸມຢ່າງເປັນທາງການ ໂດຍໄດ້ຊີ້ໃຫ້ເຫັນເຖິງຄວາມໝາຍ, ຄວາມສໍາຄັນຂອງການຍົກສູງປະສິດທິພາບໃນວຽກງານຄຸ້ມຄອງ ແລະ ພັດທະນາບຸກຄະລາກອນ ຂອງ ກະຊວງການຕ່າງປະເທດ ແລະ ຂະແໜງການຕ່າງປະເທດ ໃນໄລຍະໃໝ່ ແລະ ການຫັນເປັນທັນສະໄໝ, ພ້ອມທັງຮຽກຮ້ອງໃຫ້ຜູ້ເຂົ້າຮ່ວມກອງປະຊຸມ ຍົກສູງຄວາມຮັບຜິດຊອບ, ຄົ້ນຄວ້າ ປະກອບຄຳຄິດ, ຄຳເຫັນຢ່າງເລິກເຊິ່ງຕໍ່ບັນດາເນື້ອໃນຂອງກອງປະຊຸມ ເພື່ອແລກປ່ຽນບົດຮຽນ ແລະ ກຳນົດທິດທາງໃນຕໍ່ໜ້າ ເພື່ອຮັບປະກັນໃນການປະຕິບັດໜ້າທີ່ການເມືອງ, ການຕ່າງປະເທດ. ພ້ອມດຽວກັນນີ້, ທ່ານ ນາງ ເຄດ ກູດຟຣຸດ (Ms. Kate Goodfruit) ເລຂາໂທ ຕາງໜ້າໃຫ້ສະຖານເອກອັກຄະລັດຖະທູດ ອົດສະຕຣາລີ ປະຈໍາ ສປປ ລາວ ໄດ້ໃຫ້ກຽດເຂົ້່າຮ່ວມ ແລະ ມີຄຳເຫັນ ຊຶ່ງໄດ້ຍົກໃຫ້ເຫັນເຖິງຄວາມໝາຍໝັ້ນ ແລະ ສາຍພົວພັນທາງການທູດ ຕະຫຼອດ 73 ປີຜ່ານມາ ລະຫວ່າງ ສອງ ລັດຖະບານ ກໍຄື ສປປ ລາວ ແລະ ອົດສະຕຣາລີ ໃນການສືບຕໍ່ສົ່ງເສີມ ແລະ ສະໜັບສະໜູນດ້ານການພັດທະນາຊັບພະຍາກອນມະນຸດ ຂອງ ສປປ ລາວ ເພື່ອປະກອບສ່ວນເຂົ້າໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງ ສປປ ລາວ; ການພັດທະນາຊັບພະຍາກອນມະນຸດ ແມ່ນເປັນໜຶ່ງໃນບຸລິມະສິດຂອງ ລັດຖະບານ ອົດສະຕຣາລີ, ຜ່ານການຈັດຕັ້ງປະຕິບັດໂຄງການຂອງ ສະຖາບັນລາວ-ອົດສະຕຣາລີ (LAI) ເພື່ອພັດທະນາຊັບພະຍາກອນມະນຸດແບບຍືນຍົງ ໃນຫຼາຍຂົງເຂດ ເພື່ອໃຫ້ສອດຄ່ອງກັບຍຸດທະສາດການພັດທະນາແຫ່ງຊາດ.
 |
ກອງປະຊຸມຍັງໄດ້ພ້ອມກັນປະກອບຄໍາເຫັນ, ແລກປ່ຽນບົດຮຽນນໍາກັນຢ່າງກົງໄປກົງມາ ໃນຫົວຂໍ້ທີ່ສຳຄັນຕິດພັນກັບວຽກງານຄຸ້ມຄອງ ແລະ ພັດທະນາບຸກຄະລາກອນ ເຊັ່ນ: ການຄັດເລືອກ, ການບັນຈຸ, ສັບຊ້ອນ, ພາວະຄວາມເປັນຜູ້ນໍາ; ການສ້າງແຮງຈູງໃຈ ແລະ ການຮັກສາບຸກຄະລາກອນໃນການຈັດຕັ້ງ; ຍຸດທະສາດ, ກົນໃກການສ້າງຂີດຄວາມສາມາດດ້ານຕ່າງໆ ແລະ ແຜນພັດທະນາບຸກຄະລາກອນ ໂດຍຫັນເປັນທັນສະໄໝ, ລວມທັງກົນໄກການປະສານງານ, ປະສົບການໃນການເຄື່ອນໄຫວວຽກງານການທູດ.
(ຂ່າວ-ພາບ: ຕປທ)
ຄໍາເຫັນ