 |
ສະຫາຍ ຄູນສີ ແສງດາລາ ຮອງເລຂາພັກເມືອງ ໄດ້ຜ່ານຮ່າງລາຍງານການເມືອງ, ຕີລາຄາຜົນສຳເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ ຂອງອົງຄະນະພັກເມືອງ ຄັ້ງທີ່ຜ່ານມາ. ຊຶ່ງຄະນະບໍລິຫານງານພັກເມືອງ ໄດ້ເປັນເຈົ້າການຄົ້ນຄວ້າ-ເຊື່ອມຊຶມ ກຳແໜ້ນບັນດາເນື້ອໃນຈິດໃຈ ແລະ ບັນດາຄາດໝາຍສູ້ຊົນ ໃນມະຕິກອງປະຊຸມໃຫຍ່ຄັ້ງທີ XIII ຂອງອົງຄະນະພັກເມືອງທີ່ວາງອອກ ເພື່ອເຜີຍແຜ່ໃຫ້ແກ່ ສະມາຊິກພັກ-ພະນັກງານ ແລະ ປະຊາຊົນ ໄດ້ຮັບຮູ້ເຂົ້າໃຈ, ຕື່ນຕົວປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາບ້ານເມືອງນັບມື້ນັບດີຂຶ້ນ ພ້ອມທັງໄດ້ສ້າງໂຄງການດຳເນີນງານ ແລະ ໄດ້ຫັນມາເປັນ 6 ເປົ້າໝາຍ 24 ວຽກຈຸດສຸມ 8 ແຜນງານ, ມີ 30 ໂຄງການບູລິມະສິດ, ມີ 63 ໂຄງການຍ່ອຍ ເພື່ອນໍາພາ-ຊີ້ນຳ ແຕ່ລະຂົງເຂດ, ກຸ່ມບ້ານ ແລະ ບ້ານໃຫຍ່ຂຶ້ນກັບເມືອງ ໂດຍໄດ້ກຳໜົດທິດທາງລະອຽດແລະ ໄດ້ແບ່ງງານ,ແບ່ງຄວາມຮັບຜິດຊອບ ເພື່ອນໍາໄປຈັດຕັ້ງປະຕິບັດໃນທຸກຂົງເຂດວຽກງານຢ່າງກວ້າງຂວາງ, ທັງມີການຊຸກຍູ້, ຕິດຕາມ, ກວດກາ, ສະຫຼຸບຖອດຖອນບົດຮຽນແຕ່ລະໄລຍະ. ຜ່ານການຈັດຕັ້ງປະຕິບັດໄດ້ຮັບຜົນສຳເລັດ ເຮັດໃຫ້ສັງຄົມມີຄວາມສະຫງົບ, ຊີວິດການເປັນຢູ່ຂອງປະຊາຊົນບັນດາເຜົ່າມີການປ່ຽນແປງຢ່າງຕັ້ງໜ້າ,ເຮັດໃຫ້ເສດຖະກິດຂອງເມືອງມີການຂະຫຍາຍຕົວໃນລະດັບ 5.51% ຕໍ່ປີ, ລວມມູນຄ່າຜົນຜະລິດ ບັນລຸ 1,014 ຕື້ກີບ, ສະເລ່ຍລາຍຮັບ ເທົ່າກັບ 27 ລ້ານກີບ ຫຼື ເທົ່າກັບ 1,259 ໂດລາສະຫະລັດຕໍ່ຄົນຕໍ່ປີ, ລື່ນແຜນ 26.75% ຖ້າທຽບໃສ່ແຜນ 5 ປີ, ໄດ້ຫັນເອົາພະນັກງານນຳພາ-ຄຸ້ມຄອງ ລົງກໍ່ສ້າງຮາກຖານການເມືອງ, ຕິດພັນກັບການສ້າງບ້ານເປັນຫົວໜ່ວຍພັດທະນາຕາມ 4 ເນື້ອໃນ 4 ຄາດໝາຍ, ຕາມທິດ 3 ສ້າງ, ໄດ້ກຳນົດຈຸດສຸມການສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍຢູ່ຊົນນະບົດ, ມີການປັບປຸງກົງຈັກການຈັດຕັ້ງພັກ ຢູ່ຂັ້ນບ້ານມີຄວາມປອດໃສ, ເຂັ້ມແຂງ, ໜັກແໜ້ນ, ຊຸກຍູ້ສົ່ງເສີມດ້ານການຜະລິດເປັນສິນຄ້າ ເຮັດໃຫ້ປະຊາຊົນມີຊິວິດການເປັນຢູ່ດີຂຶ້ນເປັນກ້າວໆ, ກອງທຶນພັດທະນາຂັ້ນບ້ານທີ່ສ້າງຕັ້ງຂຶ້ນແລ້ວແມ່ນໄດ້ຄຸ້ມຄອງຢ່າງເປັນລະບົບ ແລະ ເຄື່ອນໄຫວຢ່າງຕໍ່ເນື່ອງ, ແກ້ໄຂຄອບຄົວທຸກຍາກ ແລະ ບ້ານທຸກຍາກໄດ້ຕາມຄາດໝາຍ, ໄດ້ປະເມີນຄອບຄົວພົ້ນທຸກກວມ 84.81% ບ້ານພົ້ນທຸກໄດ້ລື່ນແຜນ, ເອົາໃຈໃສ່ສ້າງຄອບຄົວພັດທະນາ, ບ້ານພັດທະນາຢ່າງຕໍ່ເນື່ອງ.
ກອງປະຊຸມໃຫຍ່ຄັ້ງນີ້, ຈະໄດ້ພ້ອມກັນຕີລາຄາເຖິງຜົນສໍາເລັດການຈັດຕັ້ງແນວທາງຂອງພັກ, ມະຕິກອງປະຊຸມໃຫຍ່ຄັ້ງທີ XIII ຂອງອົງຄະນະພັກເມືອງໃນໄລຍະ 5 ປີຜ່ານມາ ແລະ ຈະໄດ້ຄົ້ນຄວ້າເປັນເອກະພາບຕົກລົງຮັບຮອງເອົາທິດທາງລວມ, ຄາດໝາຍສູ້ຊົນ, ວຽກງານຈຸດສຸມໃນ 5 ປີຕໍ່ໜ້າ (2025-2029), ຮັບຟັງການປະກອບຄໍາເຫັນຈາກຕາງໜ້າບັນດາຂົງເຂດຕ່າງໆ, ກຸ່ມການຜະລິດພາຍໃນເມືອງ ແລະ ຈະໄດ້ປ່ອນບັດຄັດເລືອກເອົາຄະນະບໍລິຫານງານພັກເມືອງຍົມມະລາດຊຸດໃໝ່ ພ້ອມທັງປ່ອນບັດເລືອກເອົາຜູ້ແທນສົມບູນ, ສຳຮອງ ໄປຮ່ວມກອງປະຊຸມໃຫຍ່ຄັ້ງທີ XI ຜູ້ແທນອົງຄະນະພັກແຂວງຄໍາມ່ວນ ທີ່ຈະໄຂຂຶ້ນໃນຕໍ່ໜ້ານີ້.
(ຂ່າວ-ພາບ: ກອງຄໍາ)
ຄໍາເຫັນ