ຍທຂ ເອົາໃຈໃສ່ສົ່ງເສີມວຽກງານຂົນສົ່ງໃຫ້ເຕີບໃຫຍ່ເຂັ້ມແຂງຢ່າງຕໍ່ເນື່ອງ

ໂດຍ: ວັນເພັງ
ປີ 2023 ຜ່ານມາ,ວຽກງານຂົນສົ່ງ ເປັນໜຶ່ງວຽກງານສຳຄັນທີ່ພັກ-ລັດ ກໍຄືກະຊວງໂຍທາທິການ ແລະ ຂົນສົ່ງ (ຍທຂ) ໄດ້ເອົາໃຈໃສ່ສົ່ງເສີມວຽກງານດັ່ງກ່າວໃຫ້ມີການເຕີບໃຫຍ່ເຂັ້ມແຂງຢ່າງຕໍ່ເນື່ອງຕາມຄາດໝາຍທີ່ວາງໄວ້.ໃນຂະນະທີ່, ວຽກງານການສ້ອມແປງ, ຍົກລະດັບແລະກໍ່ສ້າງໂຄງລ່າງພື້ນຖານມີຜົນສຳເລັດເປັນຢ່າງດີ.
ທ່ານ ລັນ ແສງອາພອນ ຮອງລັດຖະມົນຕີກະຊວງ ຍທຂ ໄດ້ລາຍງານການຈັດຕັ້ງປະຕິບັດວຽກງານພົ້ນເດັ່ນປະຈໍາປີ 2023, ສະຫຼຸບກາງສະໄໝການຈັດຕັ້ງປະຕິບັດແຜນພັດທະນາ 5 ປີ (2021-2025), ທິດທາງແຜນການປີ 2024 ແລະທ້າຍສະໄໝຮອດປີ 2025 ຂອງກະຊວງຍທຂຕິດພັນກັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນຕໍ່ກອງປະຊຸມວຽກງານ ຍທຂທົ່ວປະເທດປະຈຳປີ 2023 ເມື່ອບໍ່ດົນມານີ້ໂດຍຫຍໍ້ວ່າ:ວຽກງານການຂົນສົ່ງ ເປັນປັດໄຈໜຶ່ງທີ່ປະກອບສ່ວນໃນການເຕີບໂຕທາງດ້ານເສດຖະກິດໂດຍສະເພາະການຂົນສົ່ງສິນຄ້າ ແລະ ໂດຍສານພາຍໃນ ແລະ ຂ້າມແດນ ຊຶ່ງຄາດໝາຍທີ່ວາງໄວ້ໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025) ເຮັດໃຫ້ການຂົນສົ່ງທາງບົກຂະຫຍາຍຕົວ 7% ຕໍ່ປີ, ທາງນໍ້າຂະຫຍາຍຕົວ 5% ຕໍ່ປີ, ທາງອາກາດຂະຫຍາຍຕົວ 12% ຕໍ່ປີ ແລະ ທາງລົດໄຟຂະຫຍາຍຕົວ 7% ຕໍ່ປີ.ເພື່ອເປັນການສົ່ງເສີມວຽກງານການຂົນສົ່ງໃຫ້ມີການຂະຫຍາຍຕົວຕາມຄາດໝາຍທີ່ວາງໄວ້. ກະຊວງ ຍທຂ ໄດ້ເອົາໃຈໃສ່ໃນການສ້ອມແປງ, ຍົກລະດັບ ແລະ ກໍ່ສ້າງໂຄງລ່າງພື້ນຖານເພື່ອເຊື່ອມໂຍງ ເຊື່ອມຈອດພາຍໃນ, ພາກພື້ນ ແລະ ສາກົນ. ຄຽງຄູ່ກັນນັ້ນ,ກໍໄດ້ເອົາໃຈໃສ່ໃນການສ້າງ-ປັບປຸງກົດໝາຍ, ນິຕິກໍາແລະ ລະບຽບການເພື່ອອໍານວຍຄວາມສະດວກໃຫ້ແກ່ວຽກງານຂົນສົ່ງ. ອັນພົ້ນເດັ່ນການເພີ່ມຂຶ້ນຢ່າງກ້າວກະໂດດຂອງການຂົນສົ່ງທາງລົດໄຟລາວ-ຈີນ ພາຍຫຼັງທີ່ເປີດນໍາໃຊ້ເສັ້ນທາງລົດໄຟລາວ-ຈີນ ຂົນສົ່ງສິນຄ້າເພີ່ມຂຶ້ນຈາກ 0,4 ພັນໂຕນ (ປີ 2020) ມາເປັນ 2.722 ພັນໂຕນ (ປີ 2023) ແລະ ຂົນສົ່ງໂດຍສານແຕ່ເລີ່ມເປີດບໍລິການທາງລົດໄຟລາວ-ຈີນຮອດທ້າຍປີ 2023 ມີຜູ້ຊົມໃຊ້ແລ້ວ 4.032 ລ້ານເທື່ອຄົນ; ຂົນສົ່ງທາງບົກສະເລ່ຍເພີ່ມຂຶ້ນ 6,42% ຕໍ່ປີ (ຍັງບໍ່ໄດ້ 7%), ຂົນສົ່ງທາງນໍ້າສະເລ່ຍເພີ່ມຂຶ້ນ 18,22% ຕໍ່ປີ (ກາຍ 5%) ແລະ ຂົນສົ່ງທາງອາກາດສະເລ່ຍເພີ່ມຂຶ້ນ 10,49% ຕໍ່ປີ (ຍັງບໍ່ໄດ້ 12%). ໃນນັ້ນ, ວຽກງານທີ່ພົ້ນເດັ່ນໃນປີ 2023 ເປັນຕົ້ນໄດ້ສໍາເລັດການຍົກລະດັບເສັ້ນທາງເລກທີ 13 ເໜືອນະຄອນຫຼວງວຽງຈັນສີເກີດ-ໂພນໂຮງ ແລະ ທາງເລກທີ 11ໄລຍະແຕ່ສົ້ນຂົວນໍ້າສັງ-ບ້ານໂນນສະຫວັນ-ບ້ານຄົກເຂົ້າດໍ; ສຸມໃສ່ຈັດຕັ້ງປະຕິບັດການກໍ່ສ້າງຂົວຂ້າມນໍ້າຂອງ 2 ແຫ່ງຄື: ຂົວຂ້າມນໍ້າຂອງລາວ-ໄທແຫ່ງທີ V (ປາກຊັນ-ບຶງການ) ປະຕິບັດໄດ້ 88,07% (ເດືອນກຸມພາ 2024) ແລະ ໂຄງການກໍ່ສ້າງຂົວຂ້າມນ້ຳຂອງກ້ອນຕື້ນ-ຫ້ວຍແກ້ວ ແຂວງບໍ່ແກ້ວປະຕິບັດໄດ້ 88,39% (ເດືອນກຸມພາ 2024) ລວມທັງວຽກບູລະນະຮັກສາ ແລະ ສ້ອມແປງເສັ້ນທາງຫຼວງແຫ່ງຊາດ ແລະ ທາງຫຼວງທ້ອງຖິ່ນມີຄວາມຄືບໜ້າສົມຄວນ.
    ທ່ານລັນແສງອາພອນລາຍງານໃຫ້ຮູ້ຕື່ມອີກວ່າ: ສຳລັບແຜນການປີ 2024 ແລະ ທ້າຍສະໄໝຮອດປີ 2025 ຈະສືບຕໍ່ເຮັດໃຫ້ເສດຖະກິດແຫ່ງຊາດຂະຫຍາຍຕົວຢ່າງຕໍ່ເນື່ອງ, ມີຄຸນນະພາບ, ໝັ້ນທ່ຽງ ແລະ ຍືນຍົງ ໂດຍສະເພາະການບໍລິການຂົນສົ່ງສິນຄ້າໂດຍສານໃຫ້ສາມາດບັນລຸຕາມຄາດໝາຍທີ່ວາງໄວ້ຄື: ການຂົນສົ່ງທາງບົກຂະຫຍາຍຕົວ 7% ຕໍ່ປີ, ທາງນໍ້າຂະຫຍາຍຕົວ 5% ຕໍ່ປີ, ທາງອາກາດຂະຫຍາຍຕົວ 12% ຕໍ່ປີ ແລະ ທາງລົດໄຟຂະຫຍາຍຕົວ 7% ຕໍ່ປີ; ສືບຕໍ່ສ້າງໂຄງລ່າງ-ພື້ນຖານໃຫ້ມີຄວາມເຂັ້ມແຂງ, ກາລະໂອກາດທີ່ຕັ້ງ, ເຂົ້າຮ່ວມຂະບວນການຮ່ວມມື ແລະ ການເຊື່ອມໂຍງກັບພາກພື້ນ ແລະ ສາກົນ ເປັນຕົ້ນກໍ່ສ້າງ-ຍົກລະດັບ-ຟື້ນຟູ ແລະ ບູລະນະສ້ອມແປງໂຄງລ່າງພື້ນຖານຄົມມະນາຄົມຂົນສົ່ງທາງບົກ ທີ່ເປັນຕາໜ່າງນອນໃນບັນດາແລວເສດຖະກິດ
ຕາມມາດຕະຖານຂອງ ASEAN ໃຫ້ໄດ້ 1.700ກິໂລແມັດ (ກມ) ໂດຍການສູ້ຊົນຈັດຕັ້ງປະຕິບັດບັນດາໂຄງການ ທາງເລກທີ 13 ໃຕ້ ແຕ່ ກມ 71- ກມ 346, ທາງເລກ 13ເໜືອ (ສີໄຄ-ສີເກີດ), ຂົວຂ້າມນໍ້າລາວ-ໄທແຫ່ງທີ V (ປາກຊັນ-ບຶງການ) ແລະ ໂຄງການກໍ່ສ້າງຂົວຂ້າມນ້ຳຂອງກ້ອນຕື້ນ-ຫ້ວຍແກ້ວໃຫ້ສໍາເລັດຕາມແຜນທີ່ວາງໄວ້.