ອົງຄະນະພັກ ຫສນຍ ດຳເນີນກອງປະຊຸມຄົບຄະນະບໍລິຫານງານພັກ ຄັ້ງທີ 5 ສະໄໝທີ V

ໃນວັນທີ 2 ພະຈິກ ຜ່ານມາ ທີ່ຫ້ອງວ່າການສຳນັກງານນາຍົກລັດຖະມົນຕີ (ຫສນຍ), ອົງຄະນະພັກ ຫສນຍ ໄດ້ດຳເນີນກອງປະຊຸມຄົບຄະນະບໍລິຫານງານພັກ ຄັ້ງທີ 5 ສະໄໝທີ V, ພາຍໃຕ້ການເປັນປະທານ ຂອງສະຫາຍ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີ ຫົວໜ້າ ຫສນຍ; ມີສະຫາຍ ສອນໄຊ ສິດພະໄຊ ກຳມະການສູນກາງພັກ ລັດຖະມົນຕີປະຈຳ ສນຍ, ພ້ອມດ້ວຍສະຫາຍຮອງເລຂາຄະນະພັກ, ສະຫາຍປະທານກວດກາຄະນະພັກ, ບັນດາສະຫາຍຄະນະບໍລິຫານງານພັກ, ເລຂາ-ຮັກສາການເລຂາຄະນະພັກຮາກຖານ, ໜ່ວຍພັກຮາກຖານ ແລະ ປະທານ-ເລຂາ ອົງການຈັດຕັ້ງມະຫາຊົນ ຫສນຍ ເຂົ້າຮ່ວມ.
ເນື້ອໃນການດຳເນີນກອງປະຊຸມຄັ້ງນີ້ ປະກອບມີ: ເຜີຍແຜ່ເຊື່ອມຊຶມບັນດາເອກະສານ ທີ່ຕິດພັນກັບຜົນສຳເລັດກອງປະຊຸມຄົບຄະນະກາງສະໄໝ ຂອງບໍລິຫານງານສູນກາງພັກ ສະໄໝທີ XI ເປັນຕົ້ນ ຄຳສັ່ງແນະນຳ ຂອງຄະນະເລຂາທິການສູນກາງພັກ ສະບັບເລກທີ 434/ຄລສພ, ລົງວັນທີ 18 ກັນຍາ 2023 ວ່າດ້ວຍການເຊື່ອມຊຶມ ແລະ ຜັນຂະຫຍາຍຜົນສຳເລັດກອງປະຊຸມຄົບຄະນະກາງສະໄໝ ຂອງບໍລິຫານງານສູນກາງພັກ ສະໄໝທີ XI, ມະຕິກອງປະຊຸມຄົບຄະນະກາງສະໄໝ ຂອງບໍລິຫານງານສູນກາງພັກ ສະໄໝທີ XI ລົງວັນທີ 18 ສິງຫາ 2023; ເຜີຍແຜ່ມະຕິ ຂອງຄະນະບໍລິຫານງານສູນກາງພັກ ສະໄໝທີ XI ສະບັບເລກທີ 05/ຄບສພ, ລົງວັນທີ 5 ກັນຍາ 2023 ວ່າດ້ວຍການສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ ສ້າງການຫັນປ່ຽນໃໝ່ທີ່ແຂງແຮງ, ເລິກເຊິ່ງ ແລະ ຮອບດ້ານໃນການນຳພາຂອງພັກ; ລາຍງານແຜນການດຳເນີນກອງປະຊຸມ 3 ຂັ້ນ ຂອງພັກ ໃນອົງຄະນະພັກ ຫສນຍ; ລາຍງານຜົນສຳເລັດກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກ ຫສນຍ ສະໄໝທີ V; ລາຍງານຫາງສຽງຄວາມໄວ້ວາງໃຈ ຂອງສະມາຊິກພັກ ຕໍ່ການນຳພາລວມ ຂອງຄະນະບໍລິຫານງານພັກ ຫສນຍ ໃນກອງປະຊຸມຄົບຄະນະກາງສະໄໝ; ຜ່ານບົດສະຫຼຸບຕີລາຄາການນຳພາ-ຊີ້ນຳຂອງຄະນະບໍລິຫານງານພັກ ໄລຍະ 9 ເດືອນ ປີ 2023 ແລະ ກຳນົດທິດທາງແຜນການ 3 ເດືອນທ້າຍປີ 2023; ແລະ ລາຍງານການປັບປຸງການຈັດຕັ້ງ ພາຍໃນ ຫສນຍ.
ໃນຕອນທ້າຍ, ສະຫາຍປະທານກອງປະຊຸມໄດ້ໃຫ້ກຽດມີຄຳເຫັນໂອ້ລົມຕໍ່ກອງປະຊຸມ ໂດຍໄດ້ຍົກໃຫ້ເຫັນຜົນສຳເລັດອັນພົ້ນເດັ່ນ, ຂໍ້ຫຍຸ້ງຍາກ ແລະ ສິ່ງທ້າທາຍຕ່າງໆຕໍ່ການນຳພາ-ຊີ້ນຳ ຂອງຄະນະບໍລິຫານງານພັກ ໃນໄລຍະຜ່ານມາ, ລວມທັງໜ້າວຽກຈຸດສຸມຈຳນວນໜຶ່ງທີ່ອົງຄະນະພັກ ຫສນຍ ຈະຕ້ອງໄດ້ສືບຕໍ່ເອົາໃຈໃສ່ປັບປຸງແກ້ໄຂ, ພ້ອມກັນຫັນປ່ຽນ ແລະ ຈັດຕັ້ງປະຕິບັດ ໃຫ້ປະກົດຜົນເປັນຈິງ ຕາມແຜນການທີ່ໄດ້ກຳນົດໄວ້. ອັນສຳຄັນ, ສະຫາຍໄດ້ເນັ້ນໜັກ ໃຫ້ເອົາໃຈໃສ່ຕື່ມບາງດ້ານ ເປັນຕົ້ນໃຫ້ບັນດາຄະນະພັກຮາກຖານ, ໜ່ວຍພັກຮາກຖານເພີ່ມທະວີການນຳພາທາງດ້ານແນວຄິດຂອງສະມາຊິກພັກ-ພະນັກງານ ເພື່ອໃຫ້ມີການຫັນປ່ຽນທາງດ້ານແນວຄິດ, ນຳພາໃນການປັບປຸງແບບແຜນວິທີເຮັດວຽກໂດຍໃຫ້ມີແຜນການຄັກແນ່, ຫັນປ່ຽນດ້ານຂອດຂັ້ນການແກ້ໄຂວຽກງານ; ສຸມໃສ່ການສ້າງຄວາມສາມັກຄີເປັນເອກະພາບພາຍໃນໃຫ້ໜັກແໜ້ນກວ່າເກົ່າ; ສືບຕໍ່ນຳພາສຶກສາອົບຮົມການເມືອງແນວຄິດ ໂດຍໃຫ້ເຜີຍແຜ່ລະບຽບພັກ ແລະ ເນື້ອໃນເອກະສານທີ່ເຜີຍແຜ່ໃນຄັ້ງນີ້ ໃນກອງປະຊຸມດຳເນີນຊີວິດການເມືອງປະຈຳເດືອນ; ໃຫ້ເອົາໃຈໃສ່ໃນການຄຸ້ມຄອງພະນັກງານໃຫ້ແທດເຖິງກວ່າເກົ່າ ກຳໃຫ້ໄດ້ພະນັກງານຂອງຕົນ, ເຫດເກີດຢູ່ບ່ອນໃດ ຕ້ອງໄດ້ຮີບຮ້ອນແກ້ໄຂໄວ; ແບບແຜນການນຳພາຂອງຄະນະພັກ ຕ້ອງມອບວຽກໃຫ້ຊັດເຈນ, ມີຄາດໝາຍປະຕິບັດຢ່າງຈະແຈ້ງ; ຄົ້ນຄວ້າທົບທວນຄືນພາລະບົດບາດ ແລະ ດ້ານກົງຈັກການຈັດຕັ້ງ ໃຫ້ສອດຄ່ອງກັບສະພາບຕົວຈິງ; ຄົ້ນຄວ້າກຳນົດນະໂຍບາຍ ເພື່ອຊ່ວຍແກ້ໄຂຊີວິດການເປັນຢູ່ຂອງພະນັກງານພາຍໃນ ຫສນຍ; ສຳລັບວຽກງານວິຊາສະເພາະ, ໃຫ້ເພີ່ມຄວາມເອົາໃຈໃສ່ໃນການຕິດຕາມກວດກາການປະຕິບັດທິດຊີ້ນຳຂອງລັດຖະບານ, ນາຍົກລັດຖະມົນຕີ ແລະ ຮອງນາຍົກລັດຖະມົນຕີ ຂອງບັນດາຂະແໜງການ ແລະ ທ້ອງຖິ່ນ ໃຫ້ມີປະສິດທິພາບ, ປະສິດທິຜົນ ແລະ ສຳເລັດຕາມກຳນົດເວລາ; ໃຫ້ສຸມໃສ່ກະກຽມກອງປະຊຸມໃຫຍ່ 3 ຂັ້ນ ໃຫ້ເປັນຂະບວນຟົດຟື້ນ ແລະ ຮັບປະກັນການຈັດຕັ້ງປະຕິບັດໃຫ້ສຳເລັດຕາມແຜນ. ມອບໃຫ້ກົມຈັດຕັ້ງ ແລະ ພະນັກງານປັບປຸງຮ່າງແຜນດຳເນີນກອງປະຊຸມໃຫຍ່ ແລະ ບົດສະຫຼຸບການນຳພາ-ຊີ້ນຳຂອງຄະນະບໍລິຫານງານພັກ ໄລຍະ 9 ເດືອນ ປີ 2023 ແລະ ກຳນົດທິດທາງແຜນການ 3 ເດືອນທ້າຍປີ 2023 ຕາມການປະກອບຄຳເຫັນຂອງກອງປະຊຸມ.
(ຂ່າວ-ພາບ: ກົມປະຊາສຳພັນ ຫສນຍ)