 |
ໄລຍະຜ່ານມາ ກະຊວງ ຮສສ ໄດ້ສ້າງ ແລະ ປັບປຸງກົນໄກການຄຸ້ມຄອງວຽກງານດັ່ງກ່າວ ໂດຍສຳເລັດການສ້າງກົດໝາຍວ່າດ້ວຍການຈັດຫາງານ ແລະ ການຫັນການບໍລິການຈັດຫາງານໃຫ້ທັນສະໄໝ ແນໃສ່ເຮັດໃຫ້ການບໍລິການໄດ້ຄຸນນະພາບ ສາມາດຕອບສະໜອງກັບຄວາມຕ້ອງການຂອງຜູ້ມາໃຊ້ບໍລິການ ແລະ ສັງຄົມ; ສ້າງໂອກາດ ການມີວຽກເຮັດງານທໍາຢູ່ຕ່າງປະເທດ ໂດຍສະເພາະປະເທດທີ່ມີລາຍຮັບສູງ ແລະ ສະຫວັດດີການສັງຄົມທີ່ດີ ແມ່ນຊ່ອງທາງໜຶ່ງທີ່ຊ່ວຍໃນການພັດທະນາສີມືໃຫ້ແກ່ຜູ້ອອກແຮງງານໃນການຍົກສູງຄຸນນະພາບການຜະລິດ, ນິໃສການເຮັດວຽກແບບອຸດສາຫະກໍາ ພ້ອມທັງຍົກສູງຄຸນນະພາບຊີວິດການເປັນຢູ່ຂອງຜູ້ອອກແຮງງານ.
ທ່ານ ໂພໄຊ ໄຊຍະສອນ ລັດຖະມົນຕີກະຊວງ ຮສສ ໄດ້ໃຫ້ກຽດຕ້ອນຮັບ ທ່ານ Park Yomg Cheol ເຈົ້າເມືອງກັງຮວາ ນະຄອນອິນຊອນ ສ.ເກົາຫຼີ ໃນວັນທີ 10 ກໍລະກົດ ຜ່ານມານີ້ ໂດຍໄດ້ສະແດງຄວາມຂອບໃຈໄປຍັງລັດຖະບານ ສ.ເກົາຫຼີ ກໍຄືກະຊວງ ຮສສ ທີ່ໃຫ້ການຊ່ວຍເຫຼືອຫຼາຍໆດ້ານເປັນການສ້າງໂອກາດໃຫ້ແຮງງານລາວ ໄດ້ເຮັດວຽກໃນຂະແໜງການຕ່າງໆ ເປັນຕົ້ນໃນພາກກະສິກຳ ເຮັດໃຫ້ແຮງງານລາວໄດ້ມີທັກສະໃນການເຮັດວຽກທີ່ທັນສະໄໝ ນຳເອົາຄວາມຮູ້ຄວາມສາມາດ, ທີ່ສຳຄັນແມ່ນໄດ້ມີລາຍຮັບທີ່ດີ ມາພັດທະນາຄອບຄົວ ແລະ ປະເທດຊາດ.
 |
ລັດຖະບານ ສປປ ລາວ ມີນະໂຍບາຍ ແລະ ໃຫ້ຄວາມສໍາຄັນ ໃນການສົ່ງເສີມປະຊາຊົນຜູ້ທີ່ປະກອບອາຊີບກະສິກໍາ ໂດຍສະເພາະຜູ້ທີ່ອາໃສໃນຂົງເຂດຊົນນະບົດ ໃຫ້ມີໂອກາດໃນການເຂົ້າເຖິງການພັດທະນາສີມືແຮງງານ ແລະ ນໍາໃຊ້ເຕັກໂນໂລຊີ ທີ່ທັນສະໄໝເຂົ້າໃນການຜະລິດກະສິກໍາ ຊຶ່ງແນ່ນອນວ່າ ສ.ເກົາຫຼີ ກໍແມ່ນເປົ້າໝາຍໜຶ່ງທີ່ສໍາຄັນທີ່ລັດຖະບານລາວ ມີເຈດຈໍານົງໃນການຮ່ວມມືໃນຫຼາຍໆດ້ານ ລວມທັງການຈັດສົ່ງແຮງງານລາວໄປເຮັດວຽກໃນຂົງເຂດກະສິກໍາ ເພື່ອຖ່າຍທອດເອົາຄວາມຮູ້ ແລະ ປະສົບການ ຂອງຊາວກະສິກອນ ສ.ເກົາຫຼີ ເພື່ອມາພັດທະນາບ້ານເກີດເມືອງນອນຂອງເຂົາເຈົ້າ.
ໃນຜ່ານມາ, ກະຊວງ ຮສສ ໄດ້ຈັດສົ່ງແຮງງານລາວໄປເຮັດວຽກຕາມລະດູການທີ່ ສ.ເກົາຫຼີ (ນັບແຕ່ເດືອນພຶດສະພາ 2022 ມາຮອດປະຈຸບັນ) ໄດ້ມີບົດບັນທຶກການຮ່ວມມືຢູ່ 2 ແຂວງ ແລະ 80 ເມືອງ ສາມາດຈັດສົ່ງແຮງງານລາວໄປເຮັດວຽກຕາມລະດູການຢູ່ ສ.ເກົາຫຼີ ທັງໝົດ 11,000 ກວ່າຄົນ ຍິງ 5,000 ກວ່າຄົນ.ສຳລັບເມືອງກັງຮວາ ເຫັນວ່າມີຄວາມຕ້ອງການແຮງງານລາວທີ່ໄປເຮັດວຽກຢູ່ເມືອງດັ່ງກ່າວໄດ້ຮັບຜົນປະໂຫຍດສູງສຸດ ແລະ ສອງຝ່າຍຍັງພ້ອມກັນປັບປຸງບັນດານະໂຍບາຍຕ່າງໆ...ຖືວ່າຈະເປັນບາດກ້າວສໍາຄັນ ແລະ ສ້າງຜົນປະໂຫຍດໃຫ້ແກ່ສອງຝ່າຍ. ສໍາລັບແຮງງານຂອງລາວ ກໍຈະໄດ້ຮັບການພັດທະນາສີມືແຮງງານ, ມີລາຍຮັບໃຫ້ແກ່ຕົນເອງ ແລະ ຄອບຄົວ ພ້ອມທັງຊ່ວຍຊຸກຍູ້ການຂະຫຍາຍຕົວຂອງເສດຖະກິດຂອງລາວ ພ້ອມທັງເຮັດໃຫ້ຊາວກະສິກອນ, ເຈົ້າຂອງບັນດາຟາມພາຍໃນເມືອງ ກໍຈະມີແຮງງານເຂົ້າຮັບໃຊ້ການຜະລິດກະສິກໍາໃຫ້ຫຼາຍຂຶ້ນ.
ທ່ານ ຈອງ ຢອງ ຊູ (Jung Yung-soo) ເອກອັກຄະລັດຖະທູດ ສ. ເກົາຫຼີ ປະຈໍາ ສປປ ລາວ ໄດ້ໃຫ້ສໍາພາດພິເສດ ຕໍ່ຜູ້ສື່ຂ່າວ ເມື່ອບໍ່ດົນມານີ້ວ່າ: ປັດຈຸບັນນີ້, ມີຄົນລາວ ທີ່ອາໃສຢູ່ ສ. ເກົາຫຼີ ເພີ່ມຂຶ້ນຢ່າງຫຼວງຫຼາຍ, ມີຕົວເລກປະມານ 15,000 ຄົນ ຈາກປະມານ 1,000 ຄົນ ໃນ 3 ປີກ່ອນ ຊຶ່ງສ່ວນຫຼາຍແມ່ນແຮງງານ ແລະ ທ່ານຍັງໄດ້ຝາກຜູ້ສື່ຂ່າວພວກເຮົາທີ່ຈະເຂົ້າຮ່ວມກອງປະຊຸມ ປະຈໍາປີ ຄັ້ງທີ XIV ທີ່ສະມາຄົມ ສ. ເກົາຫຼີ-ລາວ ເປັນເຈົ້າພາບໂດຍໃຫ້ຊ່ວຍສໍາພາດແຮງງານລາວ ແນໃສ່ເກັບກໍາຂໍ້ມູນຄວາມຈິງ ຂອງສະພາບການດໍາລົງຊີວິດໃນ ສ. ເກົາຫຼີ ເຊັ່ນ: ສະພາບການດໍາລົງຊີວິດ, ການໄດ້ຮັບຄ່າຈ້າງ ທີ່ເປັນທຳ ຫຼື ບໍ່ເປັນທໍາ, ການຖືກລ່ວງລະເມີດ, ການໄດ້ຮັບການປົກປ້ອງ ຕາມລະບຽບກົດໝາຍ ແລະ ຫຼັກການມະນຸດສະທໍາ ເວລາຖືກປະຕິບັດຢ່າງບໍ່ຍຸຕິທໍາ ແລະ ບັນຫາອື່ນໆ ທີ່ຕິດພັນກັບສິດທິ ແລະ ຜົນປະໂຫຍດອັນຊອບທໍາ ຂອງແຮງງານລາວ ຢູ່ ສ. ເກົາຫຼີ; ທັງນັ້ນ, ກໍເພື່ອຈັດຕັ້ງປະຕິບັດ ຕາມແນວທາງ ຂອງສອງລັດຖະບານ ທີ່ວາງໄວ້.
 |
ຄໍາເຫັນ