ປະກາດກົງຈັກການຈັດຕັ້ງ ແລະ ບຸກຄະລາກອນ ພາຍຫຼັງໂຮມວຽກງານຈໍານວນໜຶ່ງຂອງ ຖວທ ມາຂຶ້ນກັບ ຄອສພ

ໃນພິທີ, ສະຫາຍ ຄໍາພັນ ເຜີຍຍະວົງ ຄະນະເລຂາທິການສູນກາງພັກ ຫົວໜ້າ ຄອສພ ປະທານສະພາທິດສະດີສູນກາງພັກ ໄດ້ຂຶ້ນຜ່ານບົດລາຍງານກະກຽມປັບປຸງການຈັດຕັ້ງ ແລະ ການໂຮມວຽກງານຈໍານວນໜຶ່ງຂອງກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ມາຂຶ້ນກັບ ຄອສພ ໃນໄລຍະຜ່ານມາ ແລະ ວຽກງານຕໍ່ໜ້າບາງຕອນວ່າ: ໂຄງປະກອບກົງຈັກການຈັດຕັ້ງ ຂອງ ຄອສພ ມີ 9 ກົມ, ມີ 42 ພະແນກ, ມີພະນັກງານ-ລັດຖະກອນ ທັງໝົດ 201 ຄົນ ຍິງ 97 ຄົນ; ມີ 10 ໜ່ວຍພັກ, ສະມາຊິກພັກທັງໝົດ 234 ສະຫາຍ ຍິງ 107 ສະຫາຍ; ບັນດາກົມ ທີ່ຍົກຍ້າຍອອກຈາກກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ມາຂຶ້ນກັບ ຄອສພ ຊຶ່ງກົງຈັກການຈັດຕັ້ງປະກອບມີ 1 ກົມ ຄື: ກົມສື່ມວນຊົນ ແລະ 4 ຫົວໜ່ວຍວິຊາການ ລະດັບ 1 (ທຽບເທົ່າກົມ) ຄື: ສຳນັກຂ່າວສານປະເທດລາວ, ໂທລະພາບແຫ່ງຊາດລາວ, ວິທະຍຸກະຈາຍ ສຽງແຫ່ງຊາດລາວ ແລະ ໜັງສືພິມພາສາຕ່າງປະເທດ; ມີພະນັກງານ-ລັດຖະກອນ ທັງໝົດ 426 ຄົນ ຍິງ 170 ຄົນ; ມີ 2 ຄະນະພັກຮາກຖານ, ມີໜ່ວຍພັກຂຶ້ນກັບ 11 ໜ່ວຍພັກ ແລະ ມີ 3 ໜ່ວຍພັກຮາກຖານ; ມີສະມາຊິກພັກ ທັງໝົດ 313 ສະຫາຍ ຍິງ 135 ສະຫາຍ. ສໍາລັບດ້ານຕັ້ງໜ້າ: ກະຊວງ ຖະແຫລງຂ່າວ,ວັດທະນະທໍາ ແລະ ທ່ອງທ່ຽວ ໄດ້ມີການນໍາພາຊີ້ນໍາ, ການຄຸ້ມຄອງ ທີ່ເປັນລະບົບ, ສາມາດເຮັດບົດບາດ, ໜ້າທີ່ຄຸ້ມຄອງມະຫາພາກກ່ຽວກັບວຽກງານຖະແຫຼ່ງຂ່າວ-ສື່ມວນຊົນ ກໍຄືການປະຕິບັດໜ້າທີ່ເປັນປາກກະບອກສຽງໃຫ້ແກ່ພັກ-ລັດ ໃນການໂຄສະນາ, ເຜີຍແຜ່ແນວທາງ, ແຜນນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມ, ກົດໝາຍ, ລະບຽບການ ແລະ ອື່ນໆ ຕໍ່ພາຍໃນ ແລະ ຕ່າງປະເທດ, ທັງສ່ອງແສງສະພາບຄວາມເປັນຈິງຂອງການພັດທະນາ, ຂອງປະຊາຊົນ ໄດ້ເປັນຢ່າງດີ; ສາມາດຕິດຕາມ, ກວດກາ, ຄຸ້ມຄອງ ການເຄື່ອນໄຫວຂອງອົງການສື່ມວນຊົນ, ນັກຂ່າວ, ນັກວິຊາການ ແລະ ຜູ້ປະກອບກິດຈະການສື່ມວນຊົນ. ໄດ້ໃນລະດັບອັນແນ່ນອນ; ສື່ຫຼັກຂອງລັດ (ທັງສື່ສິ່ງພິມ, ສື່ເອເລັກໂຕຣນິກ) ໄດ້ຕັ້ງໜ້າເຄື່ອນໄຫວປະຕິບັດພາລະບົດບາດ, ໜ້າທີ່ ຂອງຕົນຢ່າງເປັນເຈົ້າການ; ຕາໜ່າງຖະແຫຼ່ງຂ່າວ-ສື່ມວນຊົນ ໂດຍສະເພາະວິທະຍຸກະຈາຍສຽງແຫ່ງຊາດ, ໂທລະພາບ ມີສັນຍານຄົບທຸກແຂວງ, ມີລະບົບໂທລະໂຄ່ງຊ່ວຍໃຫ້ປະຊາຊົນສາມາດເຂົ້າເຖິງຂ່າວສານ ແລະ ການໂຄສະນາ, ເຜີຍແຜ່ ແນວທາງ, ນະໂຍບາຍ... ຂອງພັກ-ລັດຖະບານ ໄດ້ໂດຍພື້ນຖານ; ບັນດາພາຫະນະສື່ມວນຊົນ ຂອງຂະແໜງການ ແລະ ທ້ອງຖິ່ນຈໍານວນໜຶ່ງ (ປະກອບດ້ວຍໂທລະພາບ, ວິທະຍຸ, ໜັງສືພິມ...) ທີ່ເຮັດໜ້າທີ່ວຽກງານຖະແຫຼ່ງຂ່າວ-ສື່ມວນຊົນ ຂອງແຕ່ລະບ່ອນ ໄດ້ເປັນຢ່າງດີ; ມີສະມາຄົມນັກຂ່າວ ແຫ່ງ ສປປ ລາວ ເປັນການຈັດຕັ້ງວິຊາຊີບນັກຂ່າວ ເພື່ອເຄື່ອນໄຫວວຽກງານຖະແຫຼງຂ່າວ-ສື່ມວນຊົນ ຊ່ວຍພັກ-ລັດ; ພາກສ່ວນສື່ມວນຊົນ ໄດ້ປະກອບເຂົ້າໃນຄະນະກຳມະການລະດັບຊາດຕ່າງໆ ເຖິງ 15 ຄະນະກຳມະການ ກ່ຽວກັບວຽກງານຖະແຫຼ່ງຂ່າວ-ສື່ມວນຊົນ. ສື່ມວນຊົນລາວ ໄດ້ມີການພົວພັນຮ່ວມມືກັບສື່ມວນຊົນປະເທດເພື່ອນມິດຍຸດທະສາດ, ອົງການຈັດຕັ້ງສາກົນ, ເປັນພາຄີ ຫຼື ສະມາຊິກໃນອົງການຈັດຕັ້ງສື່ມວນຊົນ, ວຽກງານຖະແຫຼງຂ່າວ ແລະ ສື່ມວນຊົນ ໃນພາກພື້ນ ແລະ ສາກົນ.

ໂອກາດນີ້, ສະຫາຍ ກິແກ້ວ ໄຂຄໍາພິທູນ ໄດ້ມີຄໍາເຫັນເນັ້ນບາງບັນຫາສໍາຄັນວ່າ:

ພາຍຫຼັງການມອບໂອນແລ້ວ, ໃຫ້ ຄອສພ ສືບຕໍ່ສຸມໃສ່ປັບປຸງກົງຈັກການຈັດຕັ້ງ ວຽກສື່ມວນຊົນ (ວຽກຖະແຫຼງຂ່າວ) ຂຶ້ນກັບນີ້ ໃຫ້ສໍາເລັດໂດຍໄວ ເພື່ອຂັບເຄື່ອນວຽກງານໃຫ້ຕໍ່ເນື່ອງ ແລະ ມີຜົນສໍາເລັດທີ່ພົ້ນເດັ່ນຂຶ້ນຕື່ມ. ສຶກສາອົບຮົມການເມືອງແນວຄິດພະນັກງານ-ລັດຖະກອນ ໃຫ້ເຂົ້າໃຈແຈ້ງຕື່ມ ກ່ຽວກັບຈຸດປະສົງ, ເປົ້າໝາຍຂອງການປັບປຸງກົງຈັກການຈັດຕັ້ງໃນຄັ້ງນີ້ ແມ່ນເພື່ອເຮັດໃຫ້ກົງຈັກກະທັດຫັດແຕ່ມີຄຸນນະພາບ. ສະນັ້ນ, ການຊັບຊ້ອນບຸກຄະລາກອນເຂົ້າໃນຕໍາແໜ່ງງານຈະຕ້ອງມີຂຶ້ນ, ມີລົງ, ມີເຂົ້າ, ມີອອກ ອັນນີ້ແມ່ນເລື່ອງປົກກະຕິ. ຊັບຊ້ອນຈັດວາງບຸກຄະລາກອນ ເຂົ້າບັນດາຕໍາແໜ່ງງານ ໃຫ້ແທດເໝາະກັບຄວາມຮູ້ຄວາມສາມາດຕົວຈິງ ຂອງພະນັກງານແຕ່ລະຄົນ; ຈັດຕັ້ງແບ່ງວຽກ, ແບ່ງງານ ແລະ ຄວາມຮັບຜິດຊອບພາຍໃນຄະນະພັກ, ຄະນະນໍາຄືນໃໝ່ ເພື່ອໃຫ້ສອດຄ່ອງຕາມໂຄງປະກອບກົງຈັກທີ່ໄດ້ປັບປຸງໃໝ່ ແລະ ດໍາເນີນຕາມລະບອບແບບແຜນການນໍາພາໃຫ້ແທດເຖິງເປັນປົກກະຕິ; ຊີ້ນໍາ ຕິດຕາມ ການປັບປຸງກົງຈັກການຈັດຕັ້ງ ຂອງຄະນະໂຄສະນາອົບຮົມ ຢູ່ທ້ອງຖິ່ນ ໃຫ້ສໍາເລັດ ແລະ ມີການເຄື່ອນໄຫວປະຕິບັດໜ້າທີ່ມີປະສິດທິຜົນກວ່າເກົ່າ. ປັບປຸງກົນໄກການເຄື່ອນໄຫວວຽກງານວິຊາສະເພາະໃຫ້ເປັນລະບົບໂລ່ງລ່ຽນ, ວ່ອງ ໄວ ທັນສະພາບການ (ລະຫວ່າງບັນດາກົມພາຍໃນ ຄອສພ, ລະຫວ່າງຄະນະໂຄສະນາອົບຮົມແຕ່ລະຂັ້ນ ແລະ ລະຫວ່າງຄະນະໂຄສະນາອົບຮົມ ກັບບັນດາຂະແໜງການ ກໍຄື ການຈັດຕັ້ງອື່ນໆ ໃຫ້ສອດຄ່ອງຕາມໜ້າທີ່ ແລະ ຂອບເຂດສິດ ທີ່ກໍານົດໄວ້); ສືບຕໍ່ຈັດຕັ້ງຝຶກອົບຮົມ, ບໍາລຸງ-ກໍ່ສ້າງພະນັກງານໂຄສະນາອົບຮົມ, ພະນັກງານທີ່ເຮັດວຽກງານສື່ສານມວນຊົນ ທັງຢູ່ສູນກາງ ແລະ ທ້ອງຖິ່ນ ໃຫ້ມີຄວາມຮູ້ຄວາມສາມາດສູງ, ມີຄວາມຊຳນານງານ (ມືອາຊີບ) ເພື່ອຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການ ເມືອງ, ໂດຍເລີ່ມຈາກການຝຶກອົບຮົມວິຊາສະເພາະຢູ່ພາຍໃນເປັນຕົ້ນຕໍ;

1). ຈັດຕັ້ງຊຸດຮຽນທິດສະດີການ ເມືອງ ຢ່າງເປັນລະບົບຕໍ່ເນື່ອງທັງຢູ່ພາຍໃນ ແລະ ຕ່າງປະເທດ;

2). ໃຫ້ ຄອສພ ສືບຕໍ່ກະກຽມດໍາເນີນກອງປະຊຸມໜ່ວຍພັກ ແລະ ກ້າວໄປເຖິງການກະກຽມດໍາເນີນກອງປະຊຸມໃຫຍ່ ຂອງອົງຄະນະພັກ ຄອສພ ໃຫ້ສໍາເລັດຕາມແຜນທີ່ຄາດໄວ້;

3) ກ່ຽວກັບວຽກສື່ມວນຊົນ (ວຽກຖະແຫຼງຂ່າວ): ຄະນະອໍານວຍການ, ຄະນະບັນນາທິການ ແລະ ພະນັກງານ-ລັດຖະກອນທັງໝົດ ຕະຫຼອດເຖິງການຈັດຕັ້ງຕ່າງໆ ເປັນຕົ້ນການ ຈັດຕັ້ງຮາກຖານພັກ ຜ່ານມາໄດ້ຂຶ້ນກັບ ແລະ ພາຍໃຕ້ການນຳພາ ຂອງຄະນະພັກກະຊວງຖະແຫຼງຂ່າວ, ວັດທະນາທໍາ ແລະ ທ່ອງທ່ຽວ, ປັດຈຸບັນ ມາຂຶ້ນກັບຄະນະໂຄສະນາອົບຮົມສູນກາງພັກ, ສ່ວນສຳນັກງານບ່ອນເຮັດວຽກສ່ວນຫຼາຍແມ່ນຕັ້ງຢູ່ບ່ອນເກົ່າ ແລະ ມີບາງກົມອາດຈະສັບຊ້ອນມາຢູ່ສໍານັກງານອື່ນໃໝ່ ໃຫ້ບັນດາສະຫາຍມີຄວາມອຸ່ນອ່ຽນ ແລະ ເປັນເອກະພາບສູງ ຕໍ່ການຕົກລົງຂອງຂັ້ນເທິງ; ສືບຕໍ່ຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຕົນ, ພ້ອມກັນບຸກບືນແຂ່ງຂັນປະຕິບັດໜ້າທີ່ວຽກງານໃຫ້ຕໍ່ເນື່ອງເປັນປົກກະຕິ ແລະ ມີຜົນສຳເລັດດີຂຶ້ນກວ່າເກົ່າ. ເປັນເຈົ້າການປະສານສົບທົບ ກັບພາກສ່ວນກ່ຽວຂ້ອງ ໃນການປັບປຸງບາງກົນໄກການເຄື່ອນໄຫວວຽກງານໃຫ້ເປັນເອກະພາບ. ສືບຕໍ່ຝຶກອົບຮົມ, ບໍາລຸງ, ກໍ່ສ້າງຖັນແຖວພະນັກງານ ໃຫ້ສາມາດຕອບສະໜອງຄວາມຮຽກຮ້ອງຕ້ອງການ ຂອງໜ້າທີ່ການເມືອງ ກໍຄືທາງດ້ານໜ້າທີ່ວິຊາສະເພາະ;

4). ກະຊວງຖະແຫຼງຂ່າວ, ວັດທະນາທໍາ ແລະ ທ່ອງທ່ຽວ ແລະ ຄະນະໂຄສະນາອົບຮົມສູນກາງພັກ ຕ້ອງໄດ້ສືບຕໍ່ໃນການເຮັດໜ້າທີ່ການເມືອງ ດ້ານວຽກງານແນວຄິດຂອງພັກ ກໍຄື ວຽກງານໂຄສະນາຜ່ານສື່ມວນຊົນ ແລະ ວຽກງານ ວັດທະນະທໍາ ແລະ ທ່ອງທ່ຽວ ໃຫ້ເຂັ້ມແຂງຂຶ້ນເລື້ອຍໆ ໂດຍເລີ່ມຈາກການປັບປຸງການຈັດຕັ້ງພັກ-ພະນັກງານ ຕາມທິດຫັນເຂົ້າສູ່ຄຸນນະພາບ ແລະ ທັນສະໄໝ.

(ຂ່າວ-ພາບ: ວັນເພັງ)