ໃນພິທີ ທ່ານ ບົວລະວັນ ເທບພະວົງ ໄດ້ຂຶ້ນລາຍງານການເຄື່ອນໄຫວວຽກງານໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2026 ຊຶ່ງຄະນະນຳສານປະຊາຊົນແຕ່ລະຂັ້ນ ໄດ້ເອົາໃຈໃສ່ສຶກສາອົບຮົມການເມືອງແນວຄິດ ດ້ວຍຫລາຍຮູບການ ຢ່າງເປັນປົກກະຕິ ແລະ ຕໍ່ເນື່ອງ ເຮັດໃຫ້ຜູ້ພິພາກສາ, ພະນັກງານມີຄຸນທາດການເມືອງໜັກແໜ້ນ, ເຊື່ອໝັ້ນຕໍ່ການນຳພາຂອງພັກ,ມີຄວາມຮັບຜິດຊອບສູງຕໍ່ໜ້າທີ່ການເມືອງຂອງຕົນ, ເອົາໃຈ
ໃສ່ປັບປຸງກົນໄກ, ແບບແຜນວິທີການດຳເນີນຄະດີຢູ່ສານໃຫ້ມີຄວາມວ່ອງໄວ, ໂປ່ງໃສ ຖືກຕ້ອງ ແລະ ຮັບປະກັນຄວາມຍຸຕິທຳໃນສັງຄົມ, ໂດຍເພີ່ມທະວີຂອດປະສານສົມທົບກັບພາກສ່ວນທີ່ກ່ຽວຂ້ອງໃນການດຳເນີນຄະດີ ແລະ ຍົກສູງຄວາມຮັບຜິດຊອບໃນການດຳເນີນຄະດີ, ປັບປຸງກົນໄກການຄຸ້ມຄອງບໍລິຫານໃຫ້ມີຄຸນນະພາບ, ຮັບປະກັນ ການເປັນເສນາທິການໃຫ້ຄະນະນຳ ເພື່ອອຳນວຍຄວາມສະດວກໃຫ້ແກ່ການເຄື່ອນໄຫວປະຕິບັດໜ້າທີ່ວຽກງານວິຊາສະເພາະ. ພ້ອມດຽວກັນນັ້ນ ໄດ້ມີພິທີປະກາດເລື່ອນຊັ້ນຜູ້ພິພາກສາ ຈຳນວນ 4 ທ່ານຄື: ເລື່ອນຊັ້ນ ທ່ານ ເຈິ້ຢ່າ ເຊ່ຍຢິ້ງຢ່າງ ຜູ້ພິພາກສາຊັ້ນສອງ ຂຶ້ນເປັນ ຜູ້ພິພາກສາຊັ້ນສາມ, ທ່ານ ຄື້ຊົ່ງ ໄຊຄື້ເຍ່ຍຕົວ ຜູ້ພິພາກສາຊັ້ນໜຶ່ງ ຂຶ້ນເປັນຜູ້ພິພາກສາຊັ້ນສອງ, ທ່ານ ຊົ່ງທໍ່ ໄຊເພຍຫຼວງ ຜູ້ພິພາກສາຊັ້ນໜຶ່ງ ຂຶ້ນເປັນຜູ້ພິພາກສາຊັ້ນສອງ, ທ່ານ ທອງຄຳ ສີສົມບຼົງ ຜູ້ພິພາກສາຊັ້ນໜຶ່ງ ຂຶ້ນເປັນຜູ້ພິພາກສາຊັ້ນສອງ. ຈາກນັ້ນ ໄດ້ມີການມອບ-ຮັບ ໃບຍ້ອງຍໍຊົມເຊີຍ ໃຫ້ແກ່ພະນັກງານສານປະຊາຊົນແຂວງ ແລະ ສານປະຊາຊົນເຂດ ໃນແຂວງໄຊສົມບູນ ໃຫ້ກຽດຂຶ້ນມອບໂດຍທ່ານ ນາງ ຄຳສີ ສິດທິວໍລະດາ ຊຶ່ງມອບໃຫ້ແກ່ສານປະຊາຊົນແຂວງ ມີຈຳນວນ 18 ທ່ານ, ຍິງ 5 ທ່ານ, ສານປະຊາຊົນເຂດ 1 ມີ 12 ທ່ານ, ຍິງ 1 ທ່ານ ແລະ ສານປະຊາຊົນເຂດ 2 ມີຈຳນວນ 4 ທ່ານ.
ໂອກາດນີ້ ທ່ານ ນາງຄຳສີ ສິດທິວໍລະດາ ໄດ້ມີຄຳເຫັນໂອ້ລົມສະແດງຄວາມຍ້ອງຍໍຊົມເຊີຍ ຕໍ່ການນຳພາ-ຊີ້ນຳຈັດຕັ້ງປະຕິບັດວຽກງານ ໃຫ້ມີຜົນສຳເລັດຫລາຍດ້ານ, ສືບຕໍ່ສຶກສາອົບຮົມການເມືອງແນວຄິດໃຫ້ຖັນແຖວພະນັກງານ-ລັດຖະກອນ ຢ່າງເປັນປົກກະຕິ ພ້ອມກັນ ເຮັດບົດບາດໜ້າທີ່ອັນສຳຄັນໃນການຕັດສິນຄະດີດ້ວຍຄວາມຮັບຜິດຊອບສູງ, ມີຄວາມຍຸຕິທຳ, ວ່ອງໄວ, ໂປ່ງໃສ ແລະ ໃຫ້ແທດເໝາະກັບວຽກງານຕົວຈິງ, ສຸມສະຕິປັນຍາເຂົ້າໃນການຄົ້ນຄວ້າຮໍ່າຮຽນ ໃຫ້ມີການພັດທະນາຕົນເອງ ຢ່າງບໍ່ຢຸດຢັ້ງ, ເພີ່ມທະວີປະສານສົມທົບກັບຂະແໜງການທີ່ກ່ຽວຂ້ອງ ໃນການຮ່ວມມືການເຄື່ອນໄຫວປະຕິບັດໜ້າທີ່ວຽກງານຂອງສານ ໃຫ້ໄດ້ຮັບຜົນສຳເລັດຂຶ້ນເທື່ອລະກ້າວ. ຂ່າວ: ສີລິພອນ ສົງຄຳ
ຄໍາເຫັນ