 |
ທ່ານ ລັດຖະມົນຕີ ກະຊວງກະສິກໍາ ແລະ ສິ່ງແວດລ້ອມ ຕາງໜ້າ ໃຫ້ຄະນະຜູ້ແທນ ຈາກ ສປປ ລາວ ສະແດງຄວາມຂໍຂອບໃຈຢ່າງສູງ ຕໍ່ການຕ້ອນຮັບອັນອົບອຸ່ນ ແລະ ອໍານວຍຄວາມສະດວກ ໃນການເຄື່ອນໄຫວ ເຮັດວຽກຢູ່ ສສ ຫວຽດນາມ ໃນຄັ້ງນີ້.
ທ່ານ ລິນຄຳ ດວງສະຫວັນ ໄດ້ແຈ້ງຈຸດປະສົງ ຂອງການມາຢ້ຽມຢາມ ແລະ ເຮັດວຽກ ຢູ່ ສສ ຫວຽດນາມ ຂອງຄະນະໃນຄັ້ງນີ້ ແມ່ນເພື່ອຜັນຂະຫຍາຍເນື້ອໃນຈິດໃຈ ຂອງ ສັນຍາ ວ່າດ້ວຍ ການຮ່ວມມືທະວິພາຄີ ລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ໄລຍະ 2026-2030, ກໍຄືແຜນການຮ່ວມມື ປະຈໍາປີ 2026 ລະຫວ່າງ ສອງລັດຖະບານ ລາວ-ຫວຽດນາມ ທີ່ໄດ້ລົງນາມຮ່ວມກັນ ໃນໄລຍະຜ່ານມາ ໂດຍສະເພາະວຽກງານຊຸກຍູ້, ສົ່ງເສີມ ແລະ ດຶງດູດການລົງທຶນ ເຂົ້າໃນຂະແໜງກະສິກຳ ແລະ ສິ່ງແວດລ້ອມ ໂດຍສະເພາະວຽກງານປູກຢາງພາລາ ແລະ ວຽກງານພັດທະນາ ແລະ ນໍາໃຊ້ ປ່າໄມ້ປູກ ໃຫ້ນັບມື້ຫຼາຍຂຶ້ນ.
ຮອດປັດຈຸບັນ, ວິສາຫະກິດ ຫວຽດນາມ ລົງທຶນ ຢູ່ ລາວ ທັງໝົດ 276 ໂຄງການ, ມີມູນຄ່າທຶນຈົດທະບຽນ ຫຼາຍກວ່າ 6.21 ຕື້ໂດລາ, ຖືເປັນອັນດັບ 1 ໃນຈຳນວນ 85 ປະເທດໃນພາກພື້ນທີ່ ຫວຽດນາມ ລົງທຶນອອກຕ່າງປະເທດ. ໃນນັ້ນ, ສຸມໃສ່ລົງທຶນໃນຂົງເຂດໂທລະຄົມ, ທະນາຄານ, ປູກຝັງ-ປຸງແຕ່ງຢາງພາລາ, ຜະລິດ-ປຸງແຕ່ງທັນຍາຫານ, ສະບຽງອາຫານ, ນົມ ແລະ ອື່ນໆ. ສະເພາະປີ 2025 ມູນຄ່າທຶນຈົດທະບຽນເຂົ້າມາ ລາວ ຂອງວິສາຫະກິດ ຫວຽດນາມ ແມ່ນຫຼາຍກວ່າ 560 ລ້ານໂດລາ ຊຶ່ງສ່ວນໃຫຍ່ສຸມໃສ່ບັນດາໂຄງການທີ່ມີຄຸນນະພາບ, ພັດທະນາແບບຍືນຍົງ, ຂະແໜງການທີ່ລາວມີທ່າແຮງຄື: ພະລັງງານສະອາດ, ຂຸດຄົ້ນແຮ່ທາດ ແລະ ກະສິກຳ.
ທິດທາງຕໍ່ໜ້າ, ລັດຖະບານ ສປປ ລາວ ກໍຄືກະຊວງ ກະສິກໍາ ແລະ ສິ່ງແວດລ້ອມ ຈະສືບຕໍ່ສ້າງເງື່ອນໄຂ ສ້າງສິ່ງອໍານວຍຄວາມສະດວກ ໃຫ້ແກ່ບັນດານັກລົງທຶນຂອງ ສສ ຫວຽດນາມ ເຂົ້າມາລົງທຶນຢູ່ ສປປ ລາວ ໃນການຊອກຫາກາລະໂອກາດລົງທຶນຜັນຂະຫຍາຍໂຄງການ ຢູ່ ສປປ ລາວ ແລະ ຈະໃຫ້ ບຸລິມະສິດ ໃຫ້ແກ່ວິສາຫະກິດຫວຽດນາມ ປະຕິບັດບັນດາໂຄງການລຽບຕາມຊາຍແດນໂດຍສອດຄ່ອງຕາມກົດໝາຍຂອງປະເທດ; ສປປ ລາວ ໃຫ້ບຸລິມະສິດ ແກ່ ວິສາຫະກິດ ຫວຽດນາມ ໃນການຂະ ຫຍາຍເນື້ອທີ່ປູກໄມ້ອຸດສາຫະກຳ, ກະສິກຳ ໄລຍະ 2026-2030; ລັດຖະບານ ສືບຕໍ່ສ້າງເງື່ອນໄຂບຸລິມະສິດ ແລະ ອຳນວຍຄວາມສະດວກໃຫ້ແກ່ໂຄງການຂະໜາດໃຫຍ່, ໂຄງການຈຸດສຸມ ຂອງວິສາຫະກິດຫວຽດນາມ ໂດຍສະເພາະໂຄງການທີ່ຢູ່ເຂດຫ່າງໄກສອກຫຼີກ, ທຸລະກັນດານ ແລະ ເຂດຊາຍແດນ ລະຫວ່າງ ສອງປະເທດ; ບັນດາໂຄງການກະສິກໍາທັນສະໄໝ ນໍາໃຊ້ເຕັກໂນໂລຊີສູງ.
ທ່ານ ລັດຖະມົນຕີ ກະຊວງກະສິກໍາ ແລະ ສິ່ງແວດລ້ອມ ໄດ້ສະເໜີ ແລະ ຮຽກຮ້ອງມາຍັງ ທ່ານປະທານຄະນະກຳມະການປະຊາຊົນ ນະຄອນຫຼວງຮ່າໂນ້ຍ ຈົ່ງຊ່ວຍສືບຕໍ່ ຊຸກຍູ້, ສົ່ງເສີມ ແລະ ແນະນຳ ໃຫ້ພາກທຸກລະກິດ ຫວຽດນາມ ໂດຍສະເພາະ ພາກທຸລະກິດ ນະຄອນຫຼວງຮ່າໂນ້ຍ ໃຫ້ເຂົ້າໄປລົງທຶນ ຢູ່ ສປປ ລາວ ໃຫ້ນັບມື້ຫຼາຍຂຶ້ນ ໂດຍສະເພາະໃນຂົງເຂດກະສິກຳ ແລະ ສິ່ງແວດລ້ອມ ຂອງພວກເຮົາ ແລະ ຂໍແຈ້ງໃຫ້ສະຫາຍຊາບວ່າ ກະຊວງກະສິກຳ ແລະ ສິ່ງແວດລ້ອມ ແຫ່ງ ສປປ ລາວ ແລະ ສສ ຫວຽດນາມ ກໍມີແຜນຈະພົບປະກັນໃນໄວໆ ນີ້.
ນອກຈາກນັ້ນ, ທ່ານປະທານຄະນະກໍາມະການ ປະຊາຊົນ ນະຄອນຫຼວງຮ່າໂນ້ຍ ໄດ້ສະແດງຄວາມຂອບໃຈ ແລະ ຍ້ອງຍໍຊົມເຊີຍ ຕໍ່ຄະນະຜູ້ແທນ ຈາກ ສປປ ລາວ ທີ່ໄດ້ຍາດເວລາ ເຂົ້າມາພົບປະ ໃນໂອກາດເດີນທາງມາເຄື່ອນໄຫວວຽກງາານ ຢູ່ ສສ ຫວຽດນາມ ໃນຄັ້ງນີ້. ຕາງໜ້າຄະນະນໍາ ນະຄອນຫຼວງຮ່າໂນ້ຍ ຍິນດີ ແລະ ຈະສືບຕໍ່ຊຸກຍູ້ ແລະ ສົ່ງເສີມ ພາກທຸລະກິດ ຂອງ ສສ ຫວຽດນາມ ໃຫ້ເຂົ້າໄປລົງທຶນ ໃນ ສປປ ລາວ ໃຫ້ຫຼາຍຂຶ້ນ.
ຂ່າວ: ກະຊວງກະສິກຳ ແລະ ສິ່ງແວດລ້ອມ
ຄໍາເຫັນ