ປະທານ ອພສ ແຂວງຫຼວງພະບາງ ຊຸກຍູ້ວຽກງານພຸດທະສາສະໜາ ຢູ່ເມືອງນານ

ການເຄື່ອນໄຫວຄັ້ງນີ້, ໄດ້ຮັບຟັງການລາຍງານສະພາບລວມ ການຄຸ້ມຄອງວຽກງານອົງການພຸດທະສາສະໜາສຳພັນລາວ (ອພສ) ເມືອງນານໂດຍຫຍໍ້, ທົ່ວເມືອງມີວັດທັງໝົດ 37 ວັດ, ມີພະສົງ 32 ອົງ, ສາມະເນນ 42 ຕົນ, ມີວັດທີ່ບໍ່ມີພະສົງປະຈຳ 6 ວັດ, ຜ່ານມາໄດ້ມີການຄຸ້ມຄອງ ແລະ ເຄື່ອນໄຫວວຽກງານຕາມດຳລັດ 315 ຂອງລັດຖະບານ, ຊຶ່ງອົງການແນວລາວສ້າງຊາດເມືອງ ໄດ້ເປັນເຈົ້າການໃນການຄຸ້ມຄອງ, ຕິດຕາມການເຄື່ອນໄຫວຂອງພະສົງ-ສາມະເນນ ໃຫ້ຢູ່ໃນກອບຂອງທຳມະວິໄນ ແລະ ນິຕິກຳ-ກົດໝາຍກ່ຽວຂ້ອງ ເຮັດໃຫ້ທົ່ວເມືອງບໍ່ມີປະກົດການຫຍໍ້ທໍ້ ຫຼື ການເຄື່ອນໄຫວສາສະໜາທີ່ຜິດກົດໝາຍ, ຄະນະສົງອົງການພຸດທະສາສະໜາສຳພັນລາວປະຈຳເມືອງ ໄດ້ເປັນຄັນທຸງໃນການສ້າງຄວາມສາມັກຄີ ລະຫວ່າງ ພະສົງ-ສາມະເນນ ແລະ ປະຊາ ຊົນ-ອອກຕົນຍາດໂຍມ, ປຸກລະດົມທຶນຮອນ ແລະ ແຮງງານເຂົ້າໃນການບູລະນະປະຕິສັງຂອນວັດວາອາຮາມ ເປັນຕົ້ນ ວັດປ່າພູປໍ, ວັດບ້ານຫ້ວຍຫອຍ, ວັດບ້ານສີວິໄລ, ວັດບ້ານນາຝາຍ, ວັດບ້ານນາເມືອງ, ວັດບ້ານປົ່ງດົງ, ວັດບ້ານປາກບໍ່ ແລະ ເຂົ້າຮ່ວມວຽກງານພັດທະນາເສດຖະກິດ-ສັງຄົມຂອງເມືອງ.

ໃນພິທີຜູ້ເຂົ້າຮ່ວມໄດ້ພ້ອມກັນປະກອບຄຳເຫັນ ເພື່ອເຮັດໃຫ້ວຽກງານພຸດທະສາສະໜາໄດ້ຮັບການຄຸ້ມຄອງ ແລະ ເຄື່ອນໄຫວໃຫ້ຖືກຕ້ອງຕາມທຳມະນູນສົງລາວ ແລະ ລະບຽບການກ່ຽວຂ້ອງທີ່ກຳນົດໄວ້. ຕອນທ້າຍປະ ທານ (ອພສ) ແຂວງຫຼວງພະບາງ ໄດ້ມີຄຳໂອວາດ ເພື່ອໃຫ້ພາກສ່ວນກ່ຽວຂ້ອງຂອງພາກລັດ ແລະ ຊາວພຸດທະ ສາສະນິກະຊົນ ຈົ່ງເປັນເຈົ້າການຊຸກຍູ້ວຽກງານພຸດທະສາສະໜາຢູ່ເມືອງນານ ໃຫ້ໄດ້ຮັບການເຄື່ອນໄຫວຢ່າງເປັນປົກກະຕິ, ສ່ວນຄະນະສົງ ຕ້ອງເອົາໃຈໃສ່ປະຕິບັດພາລະບົດບາດຂອງສົງໃຫ້ເລິກເຊິ່ງ ເພື່ອໃຫ້ຊາວພຸດທະສາ ສະນິກະຊົນມີຄວາມເຫຼື່ມໃສສັດທາ ແລະ ມີສ່ວນຮ່ວມຕໍ່ການຄຸ້ມຄອງ ແລະ ພັດທະນາວຽກງານພຸດທະສາສະໜາ ຢູ່ເມືອງນານໃຫ້ຫຼາຍຂຶ້ນ. ຂໍ້ມູນ-ພາບ: ອພສ ແຂວງ