ປະທານຄະນະກຳມະການປົກຄອງແຂວງອຸດົມໄຊ ລົງຕິດຕາມສະພາບນ້ຳຖ້ວມ

ການເຄື່ອນໄຫວຄັ້ງນີ້, ຄະນະໄດ້ລົງກວດກາຫຼາຍຈຸດຄື: ຈຸດບ້ານແຟນ, ບ້ານຫ້ວຍດູ່, ບ້ານບໍ່ ແລະ ຈຸດບ້ານນາງິ້ວ ພ້ອມທັງຕິດຕາມການອະນາໄມ ແລະ ຟື້ນຟູເສັ້ນທາງ, ໂຮງຮຽນ ແລະ ບ່ອນທີ່ມີນ້ຳຂັງເພື່ອເລັ່ງຟື້ນຟູໃຫ້ກັບຄືນສູ່ສະພາບປົກກະຕິໂດຍໄວ. ຈາກການກວດກາພົບວ່າ, ພື້ນທີ່ບາງຈຸດຍັງປະສົບກັບດິນເຈື່ອນ ແລະ ນ້ຳຖ້ວມຂັງ ສົ່ງຜົນກະທົບຕໍ່ບ້ານເຮືອນ ແລະ ຊັບສິນຂອງປະຊາຊົນ, ພ້ອມທັງພື້ນທີ່ນາ, ສວນ ແລະ ເສັ້ນທາງຫຼາຍຈຸດເສຍຫາຍ. ນອກນັ້ນ, ເຫດການນ້ຳຖ້ວມຍັງສົ່ງຜົນໃຫ້ມີຜູ້ບາດເຈັບ, ຜູ້ສູນຫາຍ, ສັດລ້ຽງ ແລະ ຊັບສິນຈຳນວນໜຶ່ງໄດ້ຮັບຄວາມເສຍຫາຍ.

ໂອກາດນີ້, ທ່ານ ວົງສະຫວັນ ໄຊຍະວົງ ໄດ້ເນັ້ນໜັກໃຫ້ພາກສ່ວນ, ອົງການ ແລະ ໜ່ວຍງານທີ່ກ່ຽວຂ້ອງ ສືບຕໍ່ລະດົມກຳລັງຮີບຮ້ອນລົງຊ່ວຍເຫຼືອປະຊາຊົນຜູ້ປະສົບໄພ, ສຳຫຼວດ ແລະ ປະເມີນຄວາມເສຍຫາຍໃຫ້ຄົບຖ້ວນ, ພ້ອມທັງເລັ່ງຟື້ນຟູໂຄງສ້າງພື້ນຖານ, ເສັ້ນທາງ, ໂຮງຮຽນ ແລະ ຈຸດສຳຄັນຕ່າງໆ ໃຫ້ສາມາດກັບຄືນມາໃຊ້ງານໄດ້ໂດຍໄວ. ພ້ອມເນັ້ນໃຫ້ປະຊາຊົນຜູ້ທີ່ຢູ່ໃນເຂດທີ່ມີຄວາມສ່ຽງ ຍົກສູງສະຕິເພີ່ມຄວາມລະມັດ ລະວັງຕິດຕາມສະພາບນ້ຳ ແລະ ການແຈ້ງເຕືອນຈາກພາກສ່ວນລັດຢ່າງໃກ້ຊິດ. ສຳລັບປະຊາຊົນຜູ້ທີ່ຢູ່ໃນຈຸດທີ່ມີຄວາມສ່ຽງ ຫຼື ບ່ອນທີ່ມີສະພາບບໍ່ປອດໄພ ໃຫ້ເຄື່ອນຍ້າຍອອກຈາກເຂດສ່ຽງໄປຢູ່ບ່ອນປອດໄພ ເພື່ອປ້ອງກັນການສູນເສຍຕໍ່ຊີວິດ ແລະ ຊັບສິນ.

ຂ່າວ: ຄຳພັນ ແກ້ວມະນີ