ປະທານຄະນະກວດກາສູນກາງພັກ ເນັ້ນເມືອງບົວລະພາ ແລະ ໄຊບົວທອງ ເອົາໃຈໃສ່ແກ້ໄຂຄວາມທຸກຍາກຂອງພໍ່ແມ່ປະຊາຊົນ

 ເພື່ອສືບຕໍ່ຈັດຕັ້ງປະຕິບັດແນວທາງນະໂຍບາຍ, ມະຕິຄໍາສັ່ງຕ່າງໆ ແລະ ເພື່ອຍົກລະດັບຊີວິດການເປັນຢູ່ຂອງພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າ ໃຫ້ດີຂຶ້ນໃນຕໍ່ໜ້າ. ທ່ານຍັງໄດ້ເນັ້ນໃຫ້ການນໍາຂອງເມືອງ ຈົ່ງໄດ້ເອົາໃຈໃສ່ຜັນຂະຫຍາຍ ເຊື່ອມຊຶມມະຕິກອງປະຊຸມໃຫຍ່ຂອງອົງຄະນະພັກເມືອງ ໃຫ້ພະນັກງານຫຼັກແຫຼ່ງ ແລະ ພໍ່ແມ່ປະຊາຊົນ ໄດ້ຮັບຮູ້ ເຂົ້າໃຈ ແລະ ໃຫ້ເຂົາເຈົ້າໄດ້ເຂົ້າຮ່ວມ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງເມືອງໃຫ້ບັນລຸຕາມລະດັບຄາດໝາຍ, ເອົາໃຈໃສ່ວຽກງານປ້ອງກັນຊາດ-ປ້ອງການຄວາມສະຫງົບ ຕິດພັນກັບການແກ້ໄຂປະກົດການຫຍໍ້ທໍ້ໃນສັງຄົມໃຫ້ມີຄວາມເຂັ້ມແຂງ, ສືບຕໍ່ສົ່ງເສີມການຜະລິດພາຍໃນ, ຍູ້ແຮງການຜະລິດກະສິກຳກາຍເປັນສິນຄ້າ ຕິດພັນກັບການສ້າງກຸ່ມຜະລິດ ເພື່ອເຂົ້າເຖິງການຕະຫຼາດໄດ້ຫຼາຍຂຶ້ນ, ເສີມຂະຫຍາຍ ການຜະລິດສິນຄ້າທີ່ເປັນພູມປັນຍາຂອງຊາວບ້ານ, ປົກປັກຮັກສາປ່າໄມ້, ທີ່ດິນ ແລະ ແຫຼ່ງນໍ້າ ໃຫ້ມີຄວາມຍືນຍົງ, ເອົາໃຈໃສ່ໃນການແກ້ໄຂຄວາມທຸກຍາກຂອງປະຊາຊົນ ແລະ ປັບປຸງພື້ນຖານໂຄງລ່າງ, ເສັ້ນທາງຄົມມະນາຄົມ, ຊົນລະປະທານ, ພັດທະນາວຽກງານການສຶກສາ, ສາທາລະນະສຸກ ເພື່ອສ້າງເງື່ອນໄຂອຳນວຍຄວາມສະດວກໃຫ້ພໍ່ແມ່ປະຊາຊົນ ໄດ້ໄປມາຫາສູ່, ແລກປ່ຽນຊື້-ຂາຍ ສິນຄ້າ, ຜົນຜະລິດ ແລະ ເຂົ້າເຖິງການບໍລິການທາງດ້ານການສຶກສາ, ສາທາລະນະສຸກ ໄດ້ຢ່າງທົ່ວເຖິງ ເພື່ອແນໃສ່ພັດທະນາຊີວິດການເປັນຢູ່ຂອງປະຊາຊົນໃຫ້ມີບາດກ້າວຂະຫຍາຍຕົວດີຂຶ້ນ. ພ້ອມດຽວກັນນີ້, ທ່ານຍັງຮຽກຮ້ອງໃຫ້ເອົາໃຈໃສ່ຕໍ່ກັບວຽກງານການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ທີ່ຈະມີການເລືອກຕັ້ງ ໃນວັນທີ 22 ກຸມພາ ທີ່ຈະມາເຖິງນີ້ ໃຫ້ຮັບປະກັນໄດ້ 4 ຄາດໝາຍໃຫຍ່ ທີ່ຄະນະກໍາມະການ ການເລືອກຕັ້ງໄດ້ວາງອອກ.

ໂອກາດດຽວກັນ, ທ່ານ ວັນໄຊ ພອງສະຫວັນ ຍັງໄດ້ຮ່ວມມອບອຸປະກອນການຮຽນ, ອຸປະກອນການຫຼິ້ນກິລາ, ເຄື່ອງນຸ່ງຫົ່ມ, ເຂົ້າສານ ແລະ ເຄື່ອງບໍລິໂພກ ຈໍານວນໜຶ່ງໃຫ້ແກ່ອຳນາດການປົກຄອງ ເມືອງບົວລະພາ ແລະ ໄຊບົວທອງ ເພື່ອນໍາໄປມອບຕໍ່ໃຫ້ແກ່ປະຊາຊົນ ກໍຄືຄອບຄົວທີ່ທຸກຍາກຢູ່ໃນບ້ານຕ່າງໆ.

(ຂ່າວ-ພາບ: ກອງຄໍາ)