ປະທານກອງປະຊຸມເຈາະຈີ້ມຫຼາຍບັນຫາໃຫ້ ສສຊ ປະກອບຄຳເຫັນໃສ່ໂຄງການກໍ່ສ້າງເສັ້ນທາງລົດໄຟລາວ-ຫວຽດນາມ

ປະທານກອງປະຊຸມ ໄດ້ມີຄຳຖາມເຈາະຈີ້ມ ໃຫ້ບັນດາສະມາຊິກສະພາແຫ່ງຊາດໄດ້ປະກອບຄຳເຫັນດັ່ງນີ້:

1) ໂຄງການລົງທຶນກໍ່ສ້າງເສັ້ນທາງລົດໄຟ ແຕ່ຕົວເມືອງທ່າແຂກ ແຂວງຄໍາມ່ວນ ຫາ ມູຢ່າ, ຊາຍແດນ ລາວ-ຫວຽດນາມ ເປັນການລົງທຶນຂອງພາກເອກະຊົນລາວ ໃນຮູບແບບ BOT ເພາະສະນັ້ນ ຜົນປະໂຫຍດທາງດ້ານເສດຖະກິດ ທີ່ພວກເຮົາຈະໄດ້ຮັບ ຕາມການຄາດຄະເນຂອງລັດຖະບານແມ່ນສອດຄ່ອງແລ້ວບໍ່, ຈະເປັນການສະໜັບສະໜູນການພັດທະນາທ້ອງຖິ່ນ ຄືແນວໃດ?;

2) ເນື້ອໃນຮ່າງສັນຍາສໍາປະທານປະກອບມີ 12 ມາດຕາ ຊຶ່ງໄດ້ກຳນົດເອົາພຽງດ້ານຫຼັກການສໍາຄັນ ໃນກອບກວ້າງໆ ບັນດາທ່ານເຫັນວ່າຄົບຖ້ວນແລ້ວຫຼືບໍ່ ຫຼື ຄວນກໍານົດເນື້ອໃນໃດເພີ່ມຕື່ມ ເພື່ອໃຫ້ມີຄວາມຈະແຈ້ງ, ຊັດເຈນ, ຮັດກຸມ ແລະ ບໍ່ໃຫ້ເປັນຊ່ອງຫວ່າງໃນການຈັດຕັ້ງປະຕິບັດ?;

3) ເພື່ອເຮັດໃຫ້ວຽກງານການຊົດເຊີຍຜົນກະທົບໃຫ້ແກ່ປະຊາຊົນທີ່ໄດ້ຮັບຜົນກະທົບຈາກໂຄງການ ໃຫ້ມີຄວາມລະອຽດ, ຮອບຄອບ ແລະ ຄົບຖ້ວນເປັນຕົ້ນ ເນື້ອທີ່ດິນ, ສິ່ງປຸກສ້າງ ແລະ ຜົນລະປູກທີ່ນອນໃນແລວທາງລົດໄຟ, ບັນດາທ່ານເຫັນວ່າຄວນກໍານົດເນື້ອໃນຄືແນວໃດ? ເພື່ອບໍ່ໃຫ້ເປັນຊ່ອງຫວ່າງໃນການຈັດຕັ້ງປະຕິບັດ ແລະ ເພື່ອຫຼີກລຽງບັນຫາປະຊາຊົນຮ້ອງຟ້ອງພາຍຫຼັງ?;

4) ເພື່ອຮັບປະກັນໃຫ້ການຈັດຕັ້ງປະຕິບັດ ວຽກງານການກໍ່ສ້າງໂຄງການລົງທຶນກໍ່ສ້າງເສັ້ນທາງລົດໄຟ ແຕ່ຕົວເມືອງທ່າແຂກ ແຂວງຄໍາມ່ວນ ຫາ ມູຢ່າ ຊາຍແດນ ລາວ-ຫວຽດນາມ ດໍາເນີນໄປສອດຄ່ອງກັບບັນດາກົດໝາຍທີ່ກ່ຽວຂ້ອງ ຄວນມີສ່ວນຮ່ວມຂອງ ພັກ-ລັດ, ຂະແໜງການ ແລະ ທ້ອງຖິ່ນຄືແນວໃດ ເພື່ອປົກປັກຮັກສາຜົນປະໂຫຍດຂອງປະຊາຊົນ, ລັດຖະບານ ແລະ ຜູ້ລົງທຶນ?.

(ຂ່າວ-ພາບ:ສຳນານ)