 |
ທ່ານ ນາງ ສຸກສະໄໝ ສີໂຕນ ທີ່ເປັນຄູຝຶກ ລາຍງານວ່າ: ວຽກງານນີ້ ໄດ້ເລີ່ມມາແຕ່ວັນທີ 24 ກັນຍາ 2025 ໂດຍມີຜູ້ເຂົ້າຮ່ວມຝຶກ ທັງໝົດ 12 ຄົນ, ຊາຍ 1 ຄົນ; ໃນນີ້, ມີ 9 ຄົນ ໄດ້ຮັບການສະໜັບສະໜູນ ຈາກໂຄງການ SFE, ພາຍໃນສູນພັດທະນາແມ່ຍິງບັນດາເຜົ່າ ບໍ່ພຽງແຕ່ອົບຮົມການຫຍິບເຄື່ອງໃຊ້ທົ່ວໄປເທົ່ານັ້ນ, ຍັງອົບຮົມການຫຍິບຜ້າອະນາໄມແບບຊັກໄດ້ ຖືເປັນໜຶ່ງວຽກທີ່ມີຄວາມສຳຄັນ ແລະ ໂຄງການໃຫ້ການສະໜັບສະໜູນ, ສົ່ງເສີມ ເພື່ອໃຫ້ຜູ້ເຂົ້າຮ່ວມ ຮຽນຮູ້, ເຮັດຂຶ້ນມານໍາໃຊ້ເອງໄດ້ ແລະ ຍັງສາມາດສົ່ງຕໍ່ຄວາມຮູ້ໃຫ້ກັບຜູ້ທີ່ສົນໃຈຢາກເຮັດ ເພື່ອຂາຍເປັນການສ້າງລາຍໄດ້ໃຫ້ກັບຕົນເອງ. ສໍາລັບການອົບຮົມຫຍິບຜ້າອະນາໄມ ຂອງໄວໜຸ່ມຍິງ ມາຮອດປັດຈຸບັນ, ສາມາດຫຍິບໄດ້ 394 ຜືນ. ຊຶ່ງພາຍຫຼັງທີ່ຫຍິບສຳເລັດແລ້ວ ແມ່ນຈະໄດ້ເອົາໄປແຈກຢາຍໃຫ້ປະຊາຊົນໃນເຂດບ້ານເປົ້າໝາຍ ຂອງໂຄງການ ກໍ່ຄືໄວໜຸ່ມຍິງທີ່ດ້ອຍໂອກາດ ໃຫ້ເຂົາເຈົ້າໄດ້ນຳໃຊ້.
ໂອກາດນີ້ ທ່ານ ນາງ ມະໂນລາ ສຸດທິຈັກ ໄດ້ຊົມເຊີຍຕໍ່ຜົນງານ ແລະ ຄວາມພະຍາຍາມ ຂອງເອື້ອຍນ້ອງແມ່ຍິງທຸກຄົນ ທີ່ເຂົ້າຮ່ວມອົບຮົມ ແລະ ໄດ້ເອົາໃຈໃສ່ຮຽນຮູ້ ຈົນສາມາດຫຍິບຜ້າອະນາໄມ ອອກມາໄດ້ຢ່າງມີຄຸນນະພາບ ແລະ ນຳໃຊ້ໄດ້ແທ້ຈິງ. ໂດຍເມື່ອໄດ້ຄວາມຮູ້ແລ້ວ, ຂໍໃຫ້ນໍາເອົາໄປຕໍ່ຍອດພັດທະນາສີມືຕົນເອງ ເຮັດໃຫ້ອອກມາດີກວ່າເກົ່າ; ພ້ອມນີ້, ກໍໃຫ້ເຜີຍແຜ່ຄວາມຮູ້ກ່ຽວກັບການນຳໃຊ້ໃຫ້ຖືກວິທີ, ໂດຍສະເພາະ ແມ່ນການຮັກສາຄວາມສະອາດ ແລະ ການຂ້າເຊື້ອໃຫ້ຖືກຫຼັກອະນາໄມ ເພື່ອຮັບປະກັນຄວາມປອດໄພ ໃນການປ້ອງກັນການຕິດເຊື້ອພະຍາດຕ່າງໆ.ຂ່າວ: ອັດສະວິນ
ຄໍາເຫັນ