ພິທີມອບ-ຮັບໂຄງການຊ່ວຍເຫຼືອກໍ່ສ້າງ-ສ້ອມແປງເຮືອນຢູ່ອາໄສ ຈໍານວນ 7ຫຼັງ ໃຫ້ແກ່ 7ຄອບຄົວຂອງປະຊາຊົນ ທີ່ທຸກຍາກຢູ່ບ້ານກອງລືໃຫຍ່ ເມືອງວາປີ ແຂວງສາລະວັນ ໄດ້ຈັດຂຶ້ນເມື່ອບໍ່ດົນມານີ້ ທີ່ບ້ານດັ່ງກ່າວ, ໂດຍການເຂົ້າຮ່ວມຂອງ ທ່ານ ສີເຮັງ ຫອມສົມບັດ ປະທານສະພາປະຊາຊົນແຂວງສາລະວັນ, ທ່ານ ບຸນຍູ້ ຈັນທະລັງສີ ເຈົ້າເມືອງວາປີ, ທ່ານ ນາງ ອິນແປງ ຊາມຸນຕີ ປະທານສະມາຄົມມັນຕົ້ນລາວ, ມີພາກສ່ວນກ່ຽວຂ້ອງເຂົ້າຮ່ວມ.
ການຈັດຕັ້ງປະຕິບັດໂຄງການດັ່ງກ່າວ ໄດ້ລິເລີ່ມຈາກການນຳສະເໜີຂໍ້ມູນຂອງປະທານສະພາປະຊາຊົນແຂວງສາລະວັນ ລົງທາງສື່ອອນລາຍ ໂດຍມີຫົວຂໍ້ເນື້ອໃນວ່າ: “ຕົ້ນທຶນຂອງຄົນເຮົາແຕກຕ່າງກັນ” ຈຶ່ງເຮັດໃຫ້ສັງຄົມ ມີຄວາມສົນໃຈ, ເປັນຫ່ວງເປັນໃຍ, ທັງຕ້ອງການໃຫ້ການຊ່ວຍເຫຼືອ ໂດຍສະເພາະ ທ່ານ ນາງ ອິນແປງ ຊາມຸນຕີ ປະທານສະພາການຄ້າແຂວງ (ຊຸດເກົ່າ) ມີເຈດຈຳນົງຕ້ອງການຊ່ວຍເຫຼືອ ນໍາເອົາບັນຫາດັ່ງກ່າວ ໄປລະດົມທຶນມາຊ່ວຍຕື່ມອີກ, ເຮັດໃຫ້ໂຄງການດັ່ງກ່າວ ໄດ້ຈັດຕັ້ງປະຕິບັດຈົນສໍາເລັດ. ໄລຍະການຈັດຕັ້ງປະຕິບັດ ແມ່ນໄດ້ມີການສົມທົບກັບຫຼາຍພາກສ່ວນ ໃນການສະໜອງຂໍ້ມູນ, ອຳນວຍຄວາມສະດວກດ້ານແຮງງານ, ການຈັດຊື້ອຸປະກອນຕ່າງໆ ເຂົ້າໃສ່ການກໍ່ສ້າງ ແລະ ອື່ນໆ. ໃນນັ້ນສ້າງເຮືອນຫຼັງໃໝ່ ຈຳນວນ 5 ຫຼັງຄາເຮືອນ, ສ້ອມແປງຕໍ່ເຕີມ 2 ຫຼັງຄາເຮືອນ, ກໍ່ສ້າງຫ້ອງນ້ຳ-ວິດຖ່າຍ ລວມມູນຄ່າທັງໝົດ 220 ລ້ານກວ່າກີບ. ທຶນຈຳນວນດັ່ງກ່າວນີ້ ແມ່ນໄດ້ຈາກການປະກອບສ່ວນຂອງ ທ່ານ ນາງ ອິນແປງ ຊາມຸນຕີ ເປັນເງິນສົດ 29 ລ້ານກີບ ແລະ ວັດຖຸ, ອຸປະກອນຕ່າງໆ ມູນຄ່າທັງໝົດ 187.800.000 ກີບ, ທຶນສົມທົບຂອງອົງການປົກຄອງເມືອງວາປີ ມູນຄ່າ 30 ລ້ານກີບ ແລະ ລະດົມຈາກພາກສ່ວນອື່ນໆ 4 ລ້ານກວ່າກີບ.
ທ່ານ ນາງ ອິນແປງ ຊາມຸນຕີກ່າວວ່າ: ໂຄງການດັ່ງກ່າວເປັນການລິເລີ່ມຈັດຕັ້ງປະຕິບັດຄັ້ງທໍາອິດຢູ່ແຂວງສາລະວັນ ໂດຍໄດ້ນຳເອົາບົດຮຽນທີ່ມີໜໍ່ແໜງໃນການປະຕິບັດຢູ່ພາກເໜືອຂອງ ສປປ ລາວ ເປັນໂຄງການຈິດອາສາພັດທະນາຊີວິດການເປັນຢູ່ຂອງປະຊາຊົນບັນດາເຜົ່າ, ເກີດຂຶ້ນຍ້ອນຄວາມເປັນຫ່ວງເປັນໃຍຂອງ ທ່ານ ນາງ ນາລີ ສີສຸລິດ ພັນລະຍາຂອງທ່ານປະທານປະເທດ ແຫ່ງ ສປປ ລາວ ທີ່ມີຕໍ່ປະຊາຊົນຜູ້ທີ່ທຸກຍາກໃນຂອບເຂດທົ່ວປະເທດ ໄດ້ເຕົ້າໂຮມຄວາມສາມັກຄີລະຫວ່າງຄອບຄົວການນໍາຂັ້ນສູງຮ່ວມກັບພາກທຸລະກິດ ເພື່ອສຸມໃສ່ປຸກລະດົມຄອບຄົວການນໍາ, ພາກທຸລະກິດ, ສະມາຄົມ ແລະ ມູນນິທິຕ່າງໆເພື່ອປະກອບສ່ວນຊ່ວຍເຫຼືອຄອບຄົວປະຊາຊົນທີ່ຍັງທຸກຍາກໃນຂອບເຂດທົ່ວປະເທດ ເພື່ອໃຫ້ເຂົາເຈົ້າໄດ້ມີຊີວິດການເປັນຢູ່ທີ່ດີຂຶ້ນກວ່າເກົ່າ.
ໂອກາດດຽວກັນນີ້, ກໍໄດ້ມີການມອບໃບຍ້ອງຍໍໃຫ້ກັບພາກສ່ວນຜູ້ປະກອບທຶນ, ຄະນະກໍາມະການຮັບຜິດຊອບການຈັດຕັ້ງປະຕິບັດໂຄງການຂັ້ນເມືອງ, ຂັ້ນແຂວງ. ພ້ອມດຽວກັນນີ້ ກໍໄດ້ມອບອຸປະກອນກິລາ, ເຄື່ອງຊ່ວຍເຫຼືອປະເພດເຄື່ອງນຸ່ງຫົ່ມ ແລະ ອຸປະກອນຕ່າງໆ ໃຫ້ກັບຄອບຄົວ ແລະ ປະຊາຊົນໃນບ້ານກອງລືໃຫຍ່ ຕື່ມອີກ.
ຂ່າວ-ພາບ: ວິໄລວອນ ສິດທິໄຊ
ການຈັດຕັ້ງປະຕິບັດໂຄງການດັ່ງກ່າວ ໄດ້ລິເລີ່ມຈາກການນຳສະເໜີຂໍ້ມູນຂອງປະທານສະພາປະຊາຊົນແຂວງສາລະວັນ ລົງທາງສື່ອອນລາຍ ໂດຍມີຫົວຂໍ້ເນື້ອໃນວ່າ: “ຕົ້ນທຶນຂອງຄົນເຮົາແຕກຕ່າງກັນ” ຈຶ່ງເຮັດໃຫ້ສັງຄົມ ມີຄວາມສົນໃຈ, ເປັນຫ່ວງເປັນໃຍ, ທັງຕ້ອງການໃຫ້ການຊ່ວຍເຫຼືອ ໂດຍສະເພາະ ທ່ານ ນາງ ອິນແປງ ຊາມຸນຕີ ປະທານສະພາການຄ້າແຂວງ (ຊຸດເກົ່າ) ມີເຈດຈຳນົງຕ້ອງການຊ່ວຍເຫຼືອ ນໍາເອົາບັນຫາດັ່ງກ່າວ ໄປລະດົມທຶນມາຊ່ວຍຕື່ມອີກ, ເຮັດໃຫ້ໂຄງການດັ່ງກ່າວ ໄດ້ຈັດຕັ້ງປະຕິບັດຈົນສໍາເລັດ. ໄລຍະການຈັດຕັ້ງປະຕິບັດ ແມ່ນໄດ້ມີການສົມທົບກັບຫຼາຍພາກສ່ວນ ໃນການສະໜອງຂໍ້ມູນ, ອຳນວຍຄວາມສະດວກດ້ານແຮງງານ, ການຈັດຊື້ອຸປະກອນຕ່າງໆ ເຂົ້າໃສ່ການກໍ່ສ້າງ ແລະ ອື່ນໆ. ໃນນັ້ນສ້າງເຮືອນຫຼັງໃໝ່ ຈຳນວນ 5 ຫຼັງຄາເຮືອນ, ສ້ອມແປງຕໍ່ເຕີມ 2 ຫຼັງຄາເຮືອນ, ກໍ່ສ້າງຫ້ອງນ້ຳ-ວິດຖ່າຍ ລວມມູນຄ່າທັງໝົດ 220 ລ້ານກວ່າກີບ. ທຶນຈຳນວນດັ່ງກ່າວນີ້ ແມ່ນໄດ້ຈາກການປະກອບສ່ວນຂອງ ທ່ານ ນາງ ອິນແປງ ຊາມຸນຕີ ເປັນເງິນສົດ 29 ລ້ານກີບ ແລະ ວັດຖຸ, ອຸປະກອນຕ່າງໆ ມູນຄ່າທັງໝົດ 187.800.000 ກີບ, ທຶນສົມທົບຂອງອົງການປົກຄອງເມືອງວາປີ ມູນຄ່າ 30 ລ້ານກີບ ແລະ ລະດົມຈາກພາກສ່ວນອື່ນໆ 4 ລ້ານກວ່າກີບ.
ທ່ານ ນາງ ອິນແປງ ຊາມຸນຕີກ່າວວ່າ: ໂຄງການດັ່ງກ່າວເປັນການລິເລີ່ມຈັດຕັ້ງປະຕິບັດຄັ້ງທໍາອິດຢູ່ແຂວງສາລະວັນ ໂດຍໄດ້ນຳເອົາບົດຮຽນທີ່ມີໜໍ່ແໜງໃນການປະຕິບັດຢູ່ພາກເໜືອຂອງ ສປປ ລາວ ເປັນໂຄງການຈິດອາສາພັດທະນາຊີວິດການເປັນຢູ່ຂອງປະຊາຊົນບັນດາເຜົ່າ, ເກີດຂຶ້ນຍ້ອນຄວາມເປັນຫ່ວງເປັນໃຍຂອງ ທ່ານ ນາງ ນາລີ ສີສຸລິດ ພັນລະຍາຂອງທ່ານປະທານປະເທດ ແຫ່ງ ສປປ ລາວ ທີ່ມີຕໍ່ປະຊາຊົນຜູ້ທີ່ທຸກຍາກໃນຂອບເຂດທົ່ວປະເທດ ໄດ້ເຕົ້າໂຮມຄວາມສາມັກຄີລະຫວ່າງຄອບຄົວການນໍາຂັ້ນສູງຮ່ວມກັບພາກທຸລະກິດ ເພື່ອສຸມໃສ່ປຸກລະດົມຄອບຄົວການນໍາ, ພາກທຸລະກິດ, ສະມາຄົມ ແລະ ມູນນິທິຕ່າງໆເພື່ອປະກອບສ່ວນຊ່ວຍເຫຼືອຄອບຄົວປະຊາຊົນທີ່ຍັງທຸກຍາກໃນຂອບເຂດທົ່ວປະເທດ ເພື່ອໃຫ້ເຂົາເຈົ້າໄດ້ມີຊີວິດການເປັນຢູ່ທີ່ດີຂຶ້ນກວ່າເກົ່າ.
ໂອກາດດຽວກັນນີ້, ກໍໄດ້ມີການມອບໃບຍ້ອງຍໍໃຫ້ກັບພາກສ່ວນຜູ້ປະກອບທຶນ, ຄະນະກໍາມະການຮັບຜິດຊອບການຈັດຕັ້ງປະຕິບັດໂຄງການຂັ້ນເມືອງ, ຂັ້ນແຂວງ. ພ້ອມດຽວກັນນີ້ ກໍໄດ້ມອບອຸປະກອນກິລາ, ເຄື່ອງຊ່ວຍເຫຼືອປະເພດເຄື່ອງນຸ່ງຫົ່ມ ແລະ ອຸປະກອນຕ່າງໆ ໃຫ້ກັບຄອບຄົວ ແລະ ປະຊາຊົນໃນບ້ານກອງລືໃຫຍ່ ຕື່ມອີກ.
ຂ່າວ-ພາບ: ວິໄລວອນ ສິດທິໄຊ
ຄໍາເຫັນ