ເປີດໃຫ້ບໍລິການສະໜາມກອັຟ ລາວ-ເອເຊຍ ວັງວຽງ ກອັຟຄຣັບ

ສະຫາຍ ພົນໂທ ສາຍໃຈ ກົມມະສິດ ໄດ້ກ່າວເປີດພິທີວ່າ: ສະໜາມກອັຟແຫ່ງນີ້ ບໍ່ພຽງແຕ່ເປັນສະຖານທີ່ຮອງຮັບນັກທ່ອງທ່ຽວ ແລະ ນັກກິລາກອັຟ ທັງພາຍໃນ ແລະ ຕ່າງປະເທດເທົ່ານັ້ນ, ແຕ່ຍັງເປັນໂຄງການທີ່ຕິດພັນກັບການພັດທະນາເສດຖະກິດ-ສັງຄົມ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ, ຊຶ່ງໂຄງການນີ້ ໄດ້ສ້າງອາຊີບທີ່ໝັ້ນຄົງ ແລະ ຫຼຸດຜ່ອນຄວາມທຸກຍາກ ໃຫ້ແກ່ປະຊາຊົນທ້ອງຖິ່ນ, ທັງໄດ້ພັດທະນາພື້ນຖານໂຄງລ່າງ ເປັນຕົ້ນແມ່ນການສ້າງເສັ້ນທາງ ແລະ ຂົວຂ້າມນໍ້າຊອງ ຜ່ານບ້ານຂັນໝາກ ຊ່ວຍໃຫ້ປະຊາຊົນສາມາດສັນຈອນ ແລະ ຄ້າຂາຍໄດ້ສະດວກທັງສອງລະດູ. ນອກຈາກນີ້, ຍັງເປັນການເພີ່ມພື້ນທີ່ຕົ້ນໄມ້ສີຂຽວແບບຍືນຍົງ ໃຫ້ກາຍເປັນຕົວແບບໃນການປົກປັກຮັກສາສິ່ງແວດລ້ອມຕາມທິດທາງຂອງລັດຖະບານ. ພ້ອມທັງ ໄດ້ຮຽກຮ້ອງໃຫ້ພາກສ່ວນຄຸ້ມຄອງ ຕ້ອງຍົກສູງຄວາມຮັບຜິດຊອບ, ບົວລະບັດຮັກສາ ແລະ ບໍລິຫານຈັດການພື້ນຖານໂຄງລ່າງ ຂອງສະໜາມກອັຟໃຫ້ມີປະສິດທິພາບສູງສຸດ ເພື່ອໃຫ້ສາມາດນໍາໃຊ້ໄດ້ຍາວນານ ແລະ ບໍລິການລູກຄ້າໄດ້ຢ່າງທົ່ວເຖິງ.

ໂຄງການສະໜາມກອັຟ ລາວ-ເອເຊຍ ວັງວຽງ ກອັຟຄຣັບ ຕັ້ງຢູ່ບ້ານຂັນໝາກ ເມືອງວັງວຽງ (ຫ່າງຈາກສະຖານີທາງດ່ວນວັງວຽງ 6,6 ກິໂລແມັດ). ເລີ່ມກໍ່ສ້າງແຕ່ ວັນທີ 25 ທັນວາ 2023 ໂດຍແມ່ນບໍລິສັດຂອງລາວ 100% (ຮັບເໝົາໂດຍ ກຸ່ມບໍລິສັດ EPL ຈຳກັດຜູ້ດຽວ ແລະ ມີ ບໍລິສັດ ອາກຄີເນຍ ອາສໂຊຊີເອສ ຈຳກັດ ເປັນທີ່ປຶກສາ), ໂຄງການມີເນື້ອທີ່ທັງໝົດ 90 ເຮັກຕາ, ໃນນີ້ 67% ແມ່ນສະໜາມກອັຟ 18 ຂຸມ ປະເພດສະໜາມພູເຂົາ ທີ່ມີທັດສະນີຍະພາບສວຍງາມ ແລະ ອີກ 33% ແມ່ນສິ່ງອໍານວຍຄວາມສະດວກຄົບວົງຈອນ ເປັນຕົ້ນແມ່ນ ຄຣັບເຮົາ, ໂຮງແຮມ, ລີສອດ ແລະ ຮ້ານອາຫານ.