 |
ໂອກາດນີ້, ທ່ານ ຈັນທະເນດ ບົວລະພາ ຮອງລັດຖະມົນຕີກະຊວງກະສິກຳ ແລະ ສິ່ງແວດ ລ້ອມ ໄດ້ໃຫ້ຮູ້ວ່າ: ໃນໄລຍະຜ່ານມາ, ກະຊວງກະສິກໍາ - ສິ່ງແວດລ້ອມ ແລະ ກະຊວງໂຍທາທິການ ແລະ ຂົນສົ່ງ ໄດ້ຮ່ວມກັນກະກຽມໂຄງການຄຸ້ມຄອງມົນລະພິດ ແລະ ສິ່ງເສດເຫຼືອ ຊຶ່ງເປັນແຜນວຽກໂຄງການບຸລິມະສິດ ທີ່ນອນໃນແຜນພັດທະນາເສດຖະກິດ-ສັງຄົມແຫ່ງຊາດ ເພື່ອສະໜັບສະໜູນ ການຈັດຕັ້ງປະຕິບັດຍຸດທະສາດເຕີບໂຕສີຂຽວແຫ່ງຊາດ, ແຜນດຳເນີນງານແຫ່ງຊາດ ກ່ຽວກັບການຄຸ້ມຄອງພລາສຕິກ ຂອງ ສປປ ລາວ (2024-2030) ແລະ ຖະແຫຼງການອາຊຽນ ກ່ຽວກັບ Plastic Circularity ໃນປີ 2024 ທີ່ ສປປ ລາວ ເປັນເຈົ້າພາບ.
ສຳລັບ ກະຊວງກະສິກຳ ແລະ ສິ່ງແວດລ້ອມ ແມ່ນຮັບຜິດຊອບໃນອົງປະກອບທີ 1 ກ່ຽວກັບການຍົກລະດັບລະບົບການຄຸ້ມຄອງສິ່ງເສດເຫຼືອ ແລະ ມົນລະພິດ ໂດຍສະເພາະກ່ຽວກັບການຍົກລະດັບການຕິດຕາມມົນລະພິດ, ການບັງຄັບໃຊ້ລະບຽບການ ແລະ ການສ້າງຄວາມເຂັ້ມແຂງໃຫ້ແກ່ລະບົບການຄຸ້ມຄອງສິ່ງເສດເຫຼືອ ແລະ ພລາສຕິກ ຊຶ່ງມີຫຼາຍຂະແໜງການທີ່ນອນໃນກະຊວງຮັບຜິດຊອບ ແຕ່ລະອົງປະກອບຍ່ອຍ ເປັນຕົ້ນ ກົມສິ່ງແວດລ້ອມ, ກົມກວດກາຊັບພະຍາກອນທຳມະຊາດ ແລະ ສິ່ງແວດລ້ອມ, ສະຖາບັນນິເວດ, ກົມຊັບພະຍາກອນນໍ້າ ແລະ ຫ້ອງການກອງທຶນປົກປັກຮັກສາສິ່ງແວດລ້ອມ ແລະ ປ່າໄມ້.
ເພື່ອເຮັດໃຫ້ເປົ້າໝາຍຂອງໂຄງການບັນລຸຜົນສຳເລັດຕາມແຜນການ ແລະ ຕົວຊີ້ວັດ ທີ່ກຳນົດໄວ້ ໄດ້ຮຽກຮ້ອງໃຫ້ບັນດາພາກສ່ວນກ່ຽວຂ້ອງ ໂດຍສະເພາະພາກສ່ວນທີ່ຈັດຕັ້ງປະຕິບັດໂຄງການຈະຕ້ອງໄດ້ເອົາໃຈໃສ່ຮັບຜິດຊອບບັນດາກິດຈະກຳຂອງຂະແໜງການຂອງຕົນເອງ ແລະ ກະກຽມແຜນການ ເຄື່ອນໄຫວວຽກງານຕາມກຳນົດເວລາ, ຮັບປະກັນທາງດ້ານຄຸນນະພາບ, ມີປະສິດທິພາບ ປະສິດທິຜົນ, ຖືກຕ້ອງຕາມລະບຽບຫຼັກການ ແລະ ສາມາດກວດສອບໄດ້, ພ້ອມທັງລາຍງານໃຫ້ກັບພາກສ່ວນຮັບຜິດ ຊອບໂຄງການ ກໍຄື ຫ້ອງການກອງທຶນ ແລະ ຜູ້ໃຫ້ທຶນຊາບ.
(ຂ່າວ-ພາບ: ອະພິເດດ ແສງດາລາ)
ຄໍາເຫັນ