ເປີດກອງປະຊຸມຄົບຄະນະບໍລິຫານງານພັກເມືອງໄຊຍະບູລີ ຄັ້ງທີ 11 ສະໄໝທີ IX

ໃນວັນທີ 18 ຕຸລາ ນີ້, ເມືອງໄຊຍະບູລີ ແຂວງໄຊຍະບູລີ ໄດ້ເປີດກອງປະຊຸມຄົບຄະນະບໍລິຫານງານພັກເມືອງ ຄັ້ງທີ 11 ສະໄໝທີ IX ຂຶ້ນຢ່າງເປັນທາງການ ທີ່ຫ້ອງວ່າການເມືອງໄຊຍະບູລີ ໂດຍການເປັນປະທານຂອງ ສະຫາຍ ບຸນແທນ ທີແກ້ວ ກໍາມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໄຊຍະບູລີ; ໃຫ້ກຽດເຂົ້າຮ່ວມຂອງ ສະຫາຍ ດວງຕາ ໄຊວຸດ ຮອງເລຂາຄະນະບໍລິຫານງານພັກແຂວງ ຜູ້ຊີ້ນໍາວຽກງານການເມືອງ-ແນວຄິດ, ວຽກພັກ-ພະນັກງານ ແລະ ອົງການຈັດຕັ້ງມະຫາຊົນຂັ້ນແຂວງ, ມີຄະນະປະຈໍາພັກເມືອງ, ກໍາມະການພັກເມືອງ, ເລຂາ, ຮອງເລຂາຄະນະພັກຮາກຖານ, ເລຂາໜ່ວຍພັກຫ້ອງການ, ອົງການ, ກົມກອງອ້ອມຂ້າງເມືອງ ແລະ ເລຂາໜ່ວຍພັກບ້ານເທດສະບານ 24 ບ້ານ ເຂົ້າຮ່ວມ.
    ໃນກອງປະຊຸມ, ສະຫາຍ ບຸນແທນ ທີແກ້ວ ໄດ້ກ່າວເປີດກອງປະຊຸມຢ່າງເປັນທາງການ ບາງຕອນສະຫາຍໄດ້ກ່າວວ່າ: ກອງປະຊຸມຄົບຄະນະບໍລິຫານງານພັກເມືອງໄຊຍະບູລີ ຄັ້ງທີ 11 ສະໄໝທີ IX ແມ່ນກອງປະຊຸມຄົບຄະນະເປີດກວ້າງ ແລະ ມີຄວາມສໍາຄັນຫຼາຍ ຊຶ່ງເປັນການຕີລາຄາຄວາມຮັບຜິດຊອບທາງດ້ານການເມືອງ ຂອງຄະນະພັກຂັ້ນຕ່າງໆ ໃນການນໍາພາ-ຊີ້ນໍາ ຈັດຕັ້ງປະຕິບັດ ທັງເປັນການປະເມີນຜົນການຈັດຕັ້ງປະຕິບັດຄາດໝາຍສູ້ຊົນດ້ານຕ່າງໆ ຂອງມະຕິ XI ຂອງພັກ, ມະຕິ VII ຂອງອົງຄະນະພັກແຂວງ ແລະ ມະຕິ IX ຂອງອົງຄະນະພັກເມືອງ ແລະ ແຜນພັດທະນາເສດຖະກິດ-ສັງຄົມ 5 ປີ ຂອງເມືອງວາງອອກ ພ້ອມກັນຄົ້ນຄວ້າ ສ້າງຄວາມເປັນເອກະພາບ, ມີມາດຖານສູ້ຊົນປະຕິບັດໃຫ້ສໍາເລັດໜ້າທີ່ ໃນທ້າຍປີ 2024, ຈາກນັ້ນໃນກອງປະຊຸມຍັງໄດ້ຮັບຟັງການຜ່ານຮ່າງບົດສະຫຼຸບຕີລາຄາການຈັດຕັ້ງປະຕິບັດວຽກງານພົ້ນເດັ່ນປະຈໍາ 9 ເດືອນ ແລະ ທິດທາງແຜນການ 3 ເດືອນທ້າຍປີ 2023, ຮັບຟັງການຜ່ານຮ່າງບົດສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາ 9 ເດືອນ ແລະ ທິດທາງແຜນການ 3 ເດືອນທ້າຍປີ 2023 ພ້ອມກັນນີ້ໃນກອງປະຊຸມຍັງຈະໄດ້ຮັບຟັງການປະກອບຄໍາຄິດເຫັນ ຈາກບັນດາຫ້ອງ ການ, ອົງການ, ກົມກອງຂອງເມືອງ; ກອງປະຊຸມຄົບຄະນະບໍລິຫານງານພັກເມືອງໄຊຍະບູລີ ຄັ້ງນີ້ ແມ່ນຈະໄດ້ດໍາເນີນເປັນເວລາ 1 ວັນເຄິ່ງ ຈຶ່ງສໍາເລັດ. 
(ຂ່າວ-ພາບ: ສົມພົງ ສີສະຫວັດ)