 |
ສະຫາຍ ວັນໄຊ ພອງສະຫວັນ ກຳມະການສູນກາງພັກ ເລຂາຄະນະບໍລິຫານງານພັກແຂວງຄໍາມ່ວນ ໄດ້ກ່າວເປີດກອງປະຊຸມວ່າ: ຜ່ານການກະກຽມມາຢ່າງຕັ້ງໜ້າຂອງຄະນະຮັບຜິດຊອບ, ພາຍໃຕ້ການນໍາພາ-ຊີ້ນໍາຢ່າງໃກ້ຊິດຂອງກົມການເມືອງ, ຄະນະເລຂາທິການສູນກາງພັກ, ມາຮອດມື້ນີ້ອົງຄະນະພັກແຂວງຄໍາມວ່ນ ໄດ້ມີເງື່ອນໄຂຄວາມພ້ອມທຸກປະການ ແລະ ໄດ້ຮັບການອະນຸມັດໃຫ້ດໍາເນີນກອງປະຊຸມໃຫຍ່ຜູ້ແທນຄັ້ງທີ XI ຂອງອົງຄະນະພັກແຂວງຢ່າງເປັນທາງການ ຊຶ່ງໄດ້ເປີດກອງປະຊຸມໃຫຍ່ຜູ້ແທນ ຂຶ້ນໃນມື້ນີ້ຢ່າງສະຫງ່າຜ່າເຜີຍ.
ກອງປະຊຸມໃຫຍ່ຄັ້ງນີ້ຈະໄດ້ປະຕິບັດໜ້າທີ່ສໍາຄັນໃນການຄົ້ນຄວ້າ ແລະ ຮັບຮອງເອົາຮ່າງລາຍງານການເມືອງແລະ ຮ່າງບົດສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X ຂອງແຂວງ ຊຶ່ງເປັນເອກະສານສໍາຄັນຕົ້ນຕໍທີ່ສ່ອງແສງໝາກຜົນໃນການນໍາພາ-ຊີ້ນໍາ, ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງໃນໄລຍະ 5 ປີຜ່ານມາ ແລະ ການກໍານົດທິດທາງ 5 ປີໃນຕໍ່ໜ້າ ຊຶ່ງຈະເປັນການປະກອບສ່ວນເຂົ້າໃນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກເຂົ້າສູ່ຊີວິດຕົວຈິງໃຫ້ບັນລຸຜົນສໍາເລັດຕາມຄາດໝາຍທີ່ວາງໄວ້. ພ້ອມນີ້, ກໍຄົ້ນຄວ້າ ແລະ ຮັບຮອງເອົາຮ່າງບົດສໍາຫຼວດການນໍາພາລວມຂອງຄະນະບໍລິຫານງານພັກແຂວງໃນໄລຍະ 5 ປີຜ່ານມາ; ຈາກນັ້ນ, ກອງປະຊຸມໃຫຍ່ຈະໄດ້ດໍາເນີນການເລືອກຕັ້ງເອົາ ຄະນະບໍລິຫານງານພັກແຂວງ ຊຸດໃໝ່ເພື່ອສືບຕໍ່ນໍາພາ-ຊີ້ນໍາ, ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງອົງຄະນະພັກແຂວງໃຫ້ມີຜົນສໍາເລັດ ແລະ ເລືອກຕັ້ງເອົາຜູ້ແທນສົມບູນ, ສໍາຮອງເຂົ້າຮ່ວມກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ. ກອງປະຊຸມໃຫຍ່ຄັ້ງນີ້, ຍັງຈະໄດ້ຮັບຟັງຄໍາເຫັນໂອ້ລົມຊີ້ນໍາຂອງສະຫາຍ ບຸນທອງ ຈິດມະນີ ເພື່ອເປັນທິດໃຫ້ແກ່ການເຄື່ອນໄຫວວຽກງານຂອງອົງຄະນະພັກແຂວງຄໍາມ່ວນ ຊຸດໃໝ່.
 |
ກອງປະຊຸມໃຫຍ່ຜູ້ແທນຄັ້ງທີ XI ຂອງອົງຄະນະພັກແຂວງຄໍາມ່ວນຄັ້ງນີ້ແມ່ນເປັນເຫດການການເມືອງ ແລະ ເປັນບາດລ້ຽວທີ່ສໍາຄັນເພື່ອສ້າງການຫັນປ່ຽນຢ່າງແຂງແຮງ, ເລິກເຊິ່ງ, ຮອບດ້ານພາຍໃຕ້ຄໍາຂວັນ “ຮັບປະກັນໃຫ້ທຸກຂັ້ນນໍາພາ-ຄຸ້ມຄອງເຂັ້ມແຂງໜັກແໜ້ນ; ນໍາໃຊ້ທຸກທ່າແຮງບົ່ມຊ້ອນພັດທະນາເສດຖະກິດກະສິກໍາ-ອຸດສາຫະກໍາປຸງແຕ່ງ, ການບໍລິການ ແລະ ການທ່ອງທ່ຽວເຂັ້ມແຂງທັນສະໄໝສີຂຽວ ແລະ ຍືນຍົງແກ້ໄຂຄວາມທຸກຍາກຂອງປະຊາຊົນໃຫ້ທົ່ວເຖິງໜັກແໜ້ນ”.
ດ້ວຍໜ້າທີ່ອັນສໍາຄັນຄືດັ່ງກ່າວນັ້ນ, ສະຫາຍ ວັນໄຊ ພອງສະຫວັນ ໄດ້ຮຽກຮ້ອງໃຫ້ບັນດາສະຫາຍ ທີ່ເຂົ້າຮ່ວມກອງປະຊຸມ ຕ້ອງເຊີດຊູສະຕິຕື່ນຕົວ ແລະ ຄວາມຮັບຜິດຊອບການເມືອງກໍຄືສິດເປັນເຈົ້າຂອງຜູ້ແທນໃຫ້ສູງຂຶ້ນປະຕິບັດລະບຽບ ແລະ ວາລະຂອງກອງປະຊຸມຢ່າງເຂັ້ມງວດ, ພ້ອມກັນຄົ້ນຄວ້າ, ປະກອບຄໍາເຫັນເຂົ້າໃສ່ຮ່າງລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ 5 ປີຕໍ່ໜ້າໃຫ້ເລິກເຊິ່ງ, ຖືກຕ້ອງ, ສອດຄ່ອງກັບທ່າແຮງບົ່ມຊ້ອນຂອງແຂວງ ແລະ ພິຈາລະນາໃຫ້ເລິກເຊິ່ງ, ຮອບຄອບ, ຖີ່ຖ້ວນໃນການເລືອກຕັ້ງເອົາຄະນະບໍລິຫານງານພັກແຂວງ ຊຸດ ໃໝ່ ແລະ ເລືອກຕັ້ງເອົາຜູ້ແທນໄປຮ່ວມ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກ. ທັງນີ້, ກໍເພື່ອໃຫ້ກອງປະຊຸມໃຫຍ່ຄັ້ງທີ XI ອົງຄະນະພັກແຂວງຄໍາມ່ວນ ບັນລຸຜົນສໍາເລັດຢ່າງຈົບງາມ.
(ຂ່າວ-ພາບ: ສຸກສະຫວັນ)
ຄໍາເຫັນ