ທ່ານ ອາຖັງ ຈິງປິງ ໃນນາມຜູ້ລົງທຶນກໍ່ສ້າງໂຮງໝໍສາກົນຄໍາມ່ວນ ໄດ້ລາຍງານໃຫ້ຮູ້ວ່າ: ໂຮງໝໍສາກົນຄໍາມ່ວນແມ່ນໂຮງໝໍຂອງກຸ່ມທຸລະກິດຊາວຈີນທີ່ດໍາເນີນກິດຈະການຢູ່ປະເທດລາວຕາມໂຄງການ ໜຶ່ງແລວໜຶ່ງເສັ້ນທາງ, ຕັ້ງຢູ່ບ້ານ ສີວິໄລ ເມືອງທ່າແຂກ ແຂວງຄໍາມ່ວນ, ກວມເອົາເນື້ອທີ່ 20,000 ຕາແມັດ, ດ້ວຍເງິນລົງທຶນ 10 ລ້ານໂດລາສະຫະລັດ, ເປັນອາຄານ 5 ຊັ້ນ, ມີ 100 ຕຽງ, ມີພະນັກງານທັງໝົດ 120 ຄົນ. ໃນນີ້, ພະນັກງານຈາກ ສປ ຈີນ 12 ຄົນ. ປະກອບມີ: ພະແນກພາຍນອກ, ພະແນກກະດູກ, ພະແນກປະສູດ ແລະ ພະຍາດຍິງ (ໃຫ້ຄໍາປຶກສາຜູ້ທີ່ມີລູກຍາກ), ພະແນກແພດພື້ນເມືອງຈີນ, ພະແນກຜ່າຕັດ ແລະ ອື່ນໆ.
ໂອກາດດັ່ງກ່າວນີ້, ທ່ານລັດຖະມົນຕີກະຊວງສາທາລະນະສຸກ ແລະ ທ່ານ ວັນໄຊ ພອງສະຫວັນ ຍັງໄດ້ກ່າວມີຄໍາເຫັນ ແລະ ສະແດງຄວາມຊົມເຊີຍມາຍັງຜູ້ລົງທຶນ ຊຶ່ງໂຮງໝໍແຫ່ງນີ້ ມີສິ່ງອໍານວຍຄວາມສະດວກໃນການຮັກສາສຸຂະພາບຄົບວົງຈອນ, ມີເຄື່ອງມືອຸປະກອນການແພດທີ່ທັນສະໄໝ, ມີແພດໝໍ, ພະຍາບານ ທີ່ມີຄວາມຊໍານານ; ດ້ານອາຄານສະຖານທີ່ມີການອອກແບບ-ກໍ່ສ້າງທີ່ໄດ້ມາດຕະຖານດີສົມຄວນ ເປັນໂຮງໝໍເອກະຊົນແຫ່ງທໍາອິດແຫ່ງດຽວໃນແຂວງຄໍາມ່ວນ, ສ້າງຂຶ້ນເພື່ອເປັນທາງເລືອກໜຶ່ງທີ່ສໍາຄັນໃຫ້ຜູ້ທີ່ມາໃຊ້ບໍລິການ ໂດຍສະເພາະແມ່ນພໍ່ແມ່ປະຊາຊົນທຸກຊັ້ນຄົນໃນສັງຄົມ ແລະ ບັນດາແຂວງທີ່ໃກ້ຄຽງ ໄດ້ມີທາງເລືອກເຂົ້າເຖິງການບໍລິການທີ່ມີຄຸນນະພາບ. ຫວັງຢ່າງຍິ່ງວ່າພາຍຫຼັງທີ່ເປີດນໍາໃຊ້ແລ້ວ ໂຮງໝໍແຫ່ງນີ້ຈະສືບຕໍ່ພັດທະນາດ້ານວິຊາການ ແລະ ການບໍລິການເຮັດໃຫ້ຄົນເຈັບປອດໄພຫາຍດີຈາກການເຈັບເປັນ ແລະ ມີການຮ່ວມມືກັບພາກລັດທີ່ກ່ຽວຂ້ອງ ເພື່ອສົມທົບກັນແລກປ່ຽນບົດຮຽນ, ປະສົບການ, ການບໍລິການວິຊາ, ການບໍລິຫານໂຮງໝໍຢ່າງຮອບດ້ານ, ສ້າງຄວາມເຂັ້ມແຂງທາງດ້ານວິຊາການຮ່ວມກັນ. ຄຽງຄູ່ກັນນັ້ນທາງດ້ານຄ່າບໍລິການໃຫ້ສົມເຫດສົມຜົນ ແລະ ເປັນທໍາ.
ນັບຕັ້ງແຕ່ວັນທີ່ 15 ພຶດສາພາ -30 ກໍລະກົດ 2025 ຄ່າກວດສຸຂະພາບປະຈໍາປີ ມີສ່ວນຫຼຸດ 30% ແລະ ຄ່າປິ່ນປົວສຸຂະພາບມີສ່ວນຫຼຸດ 10%. (ຂ່າວ: ມະນີວັນ, ພາບ: ກອງຄໍາ)
ຄໍາເຫັນ