 |
ກອງປະຊຸມຄັ້ງນີ້, ຈັດຂຶ້ນເປັນປີທີ 2 ຊຶ່ງເປັນເວທີປາໄສທີ່ມີຄວາມໝາຍ-ສໍາຄັນ ເພື່ອເຮັດໃຫ້ສື່ມວນຊົນ ແລະ ຄັງປັນຍາທົ່ວໂລກໃຕ້ ໄດ້ຮ່ວມກັນປຶກສາຫາລື, ແລກປ່ຽນບົດຮຽນ, ສ້າງຄວາມເປັນເອກະພາບໃນການຮ່ວມມື, ຊຸກຍູ້ການພັດທະນາເສດຖະກິດ, ນໍາເອົາຜົນປະໂຫຍດສູງສຸດມາໃຫ້ພາກໃຕ້ຂອງຕົນໃນຕໍ່ໜ້າ. ພ້ອມນີ້, ຍັງເປັນໂອກາດດີຜູ້ເຂົ້າຮ່ວມຈະໄດ້ລວມຕົວກັນລະດົມຄວາມຄິດເຫັນ ແລະ ແບ່ງປັນສະຕິປັນຍາເພື່ອ ສົ່ງເສີມທົ່ວໂລກໃຕ້ ນໍາເອົາແນວທາງປ່ຽນແປງຂອງໂລກໃຫ້ເປັນຂໍ້ສະຫຼຸບທີ່ສາມາດນຳໄປປະຕິບັດໄດ້ໃນໂຄງການຕົວຈິງ.
 |
ໂອກາດນີ້, ທ່ານ ຄໍາພັນ ເຜີຍຍະວົງ ກ່າວວ່າ: “ທົ່ວໂລກໃຕ້” ແມ່ນກຸ່ມລວມຂອງປະເທດຕະຫຼາດ
ໃໝ່ ແລະ ປະເທດກໍາລັງພັດທະນາ. ປະເທດລາວແມ່ນໜຶ່ງໃນສະມາຊິກຂອງ “ທົ່ວໂລກໃຕ້” ທັງແມ່ນປະເທດກໍາລັງພັດທະນາ, ເພື່ອສ້າງຄວາມເປັນເອກະພາບໃນການຮ່ວມມື, ຊຸກຍູ້ການພັດທະນາເສດຖະກິດ, ນໍາເອົາຜົນປະໂຫຍດມາສູ່ປະຊາຊົນພາກໃຕ້, ປະກອບສ່ວນກໍາລັງແຮງເຂົ້າໃນການສ້າງປະຊາຄົມຮ່ວມຊາຕາກໍາຂອງມວນມະນຸດ. ຄັງປັນຍາແມ່ນ “ຄັງສົມບັດແຫ່ງແນວຄິດ” ແລະ ສື່ມວນຊົນແມ່ນຂົວຕໍ່ຂອງການສື່ສານ. ໃນຍຸກສະໄໝທີ່ເຕັມໄປດ້ວຍຄວາມບໍ່ແນ່ນອນນີ້, ບັນດາປະເທດ “ທົ່ວໂລກໃຕ້” ຈໍາເປັນຕ້ອງມີຄວາມສາມັກຄີ ແລະ ການຮ່ວມມືຫຼາຍກ່ວາເກົ່າ, ພວກເຮົາຕ້ອງການສື່ມວນຊົນ ແລະ ຄັງປັນຍາ ເພື່ອແບກຫາບພາລະໜ້າທີ່ເຕົ້າໂຮມຄວາມເຫັນດີເຫັນພ້ອມ ແລະ ພາລະກິດນໍາພາຄວາມຄິດຂອງຍຸກສະໄໝ.
 |
ທ່ານ ຄໍາພັນ ເຜີຍຍະວົງ ກ່າວຕື່ມວ່າ: ສໍາລັບການຮ່ວມມືລະຫວ່າງຄັງປັນຍາ ແລະ ສື່ມວນຊົນຂອງທົ່ວໂລກໃຕ້ແມ່ນສ້າງຄວາມເຂັ້ມແຂງໃນການແບ່ງປັນຂໍ້ມູນຂ່າວສານ. ປັດຈຸບັນ, ມວນມະນຸດພວມກ້າວຈາກຍຸກ “ອິນເຕີເນັດ ” ເຂົ້າສູ່ຍຸກ “ປັນຍາປະດິດ ”, ແຕ່ຍ້ອນການພັດທະນາເສດຖະກິດບໍ່ສົມດຸນ ແລະ ເຫດຜົນອື່ນໆ, ລະດັບການພັດທະນາເຕັກໂນໂລຊີຂໍ້ມູນຂ່າວສານຂອງ ບັນດາປະເທດຍັງແຕກໂຕນກັນ, ຄວາມແຕກຕ່າງດ້ານຂໍ້ມູນຂ່າວສານລະຫວ່າງແຕ່ລະປະເທດຍັງຄົງມີຢູ່, ຄວາມສາມາດຂອງປະຊາຊົນໃນປະເທດກໍາລັງພັດທະນາທີ່ຈະເຂົ້າເຖິງຂໍ້ມູນທີ່ມີຄຸນນະພາບສູງ ແລະ ມີຄຸນຄ່າຍັງຈໍາກັດ.
 |
ທ່ານ ຄໍາພັນ ເຜີຍຍະວົງ ຍັງຮຽກຮ້ອງໃຫ້ບັນດາອົງກອນຄັງປັນຍາ ແລະ ສື່ມວນຊົນເພີ່ມທະວີການຮ່ວມມື, ສ້າງເວທີການແລກປ່ຽນ ແລະ ການຮ່ວມມື ເພື່ອຊົມໃຊ້ຂໍ້ມູນຂ່າວສານຮ່ວມກັນ, ຊົມໃຊ້ຊັບພະຍາກອນຮ່ວມກັນ ແລະ ຊົມໃຊ້ໝາກຜົນຮ່ວມກັນ, ພ້ອມທັງປັບປຸງວິທີການຮ່ວມມືໃຫ້ດີຂຶ້ນ, ລົບລ້າງສິ່ງກີດຂວາງໃນດ້ານການຮຽນຮູ້ ແລະ ຂໍ້ມູນຂ່າວສານ, ເພື່ອຊ່ວຍພັດທະນາເສດຖະກິດ, ປັບປຸງຊີວິດການເປັນຢູ່ຂອງປະຊາຊົນຂອງບັນດາປະເທດ.
(ຂ່າວ-ພາບ: ວັນເພັງ)
ຄໍາເຫັນ