ເປີດຊຸດອົບຮົມພະນັກງານນຳທ່ຽວລະດັບຊາດ ຊຸດທີ 32

 ມີຫົວໜ້າກົມ, ຮອງກົມ, ຫົວໜ້າ-ຮອງຫົວໜ້າສະຖາບັນ, ຫົວໜ້າພະແນກ ຖວທ ນະຄອນຫຼວງ, ຜູ້ຕາງໜ້າຈາກສະມາຄົມທຸລະກິດທ່ອງທ່ຽວ ແລະ ສະມາຄົມພະນັກງານນຳທ່ຽວເຂົ້າຮ່ວມ.

ທ່ານນາງ ເພັນປະພາ ພົງສາ ຮອງຫົວໜ້າສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ ໄດ້ໃຫ້ຮູ້ວ່າ: ການຈັດຊຸດອົບຮົມຄັ້ງນີ້ແນໃສ່ສ້າງຖັນແຖວພະນັກງານນຳທ່ຽວໃຫ້ມີຄວາມເຂັ້ມແຂງ ແລະ ມີຈຳນວນພຽງພໍກັບຄວາມຕ້ອງການຕົວຈິງຂອງການທ່ອງທ່ຽວໃນສປປ ລາວ ຊຶ່ງມີສຳມະນາກອນເຂົ້າຮ່ວມທັງໝົດ 90 ກວ່າຄົນ ຈະໄດ້ຮຽນຮູ້ທັງພາກທິດສະດີ ແລະ ພາກປະຕິບັດຕົວຈິງ ໂດຍການລົງພື້ນທີ່ແຫຼ່ງທ່ອງທ່ຽວ ແລະ ສະແດງບົດບາດສົມມຸດເປັນພະນັກງານນຳທ່ຽວໃນພື້ນທີ່ແຫຼ່ງທ່ອງທ່ຽວຕົວຈິງ ໂດຍມີຄະນະກຳມະການຕິດຕາມໃຫ້ຄະແນນຕາມເກນທີ່ກຳນົດໄວ້ ຊຶ່ງໄດ້ເຊີນຜູ້ບັນຍາຍພິເສດຈາກກົມຄຸ້ມຄອງທຸລະກິດທ່ອງທ່ຽວ, ກົມພັດທະນາການທ່ອງທ່ຽວ, ກົມໂຄສະນາການທ່ອງທ່ຽວ ລວມເຖິງສະມາຄົມທຸລະກິດທ່ອງທ່ຽວ ແລະ ສະມາຄົມພະນັກງານນຳທ່ຽວ. ພິເສດຍັງໄດ້ເຊີນອາຈານຈາກວິທະຍາໄລຈຽງຊູ ສປ ຈີນມາຮ່ວມບັນຍາຍກ່ຽວກັບວັດທະນະທຳ ແລະ ພຶດຕິກຳນັກທ່ອງທ່ຽວຈີນອີກດ້ວຍ. ພາຍຫຼັງສຳເລັດການຝຶກອົບຮົມສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວຈະໄດ້ສົ່ງລາຍຊື່ສໍາມະນາກອນທີ່ໄດ້ຮັບການຢັ້ງຢືນການຝຶກອົບຮົມໃຫ້ກົມຄຸ້ມຄອງທຸລະກິດທ່ອງທ່ຽວເພື່ອອອກບັດນຳທ່ຽວໃນຂັ້ນຕໍ່ໄປ.

ໂອກາດນີ້, ທ່ານ ວັນສີ ກົວມົວ ໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບ ກໍຄືສະຖາບັນສື່ມວນຊົນ, ວັດທະນະທຳ ແລະ ທ່ອງທ່ຽວ ທີ່ໄດ້ກະກຽມຄວາມພ້ອມໃນດ້ານຕ່າງໆ ເຮັດໃຫ້ຊຸດຝຶກອົບຮົມຄັ້ງນີ້ເປີດຂຶ້ນຕາມວັນເວລາທີ່ໄດ້ກຳນົດໄວ້. ຊຸດຝຶກອົບຮົມຄັ້ງນີ້ມີຄວາມໝາຍຄວາມສໍາຄັນຢ່າງຍິ່ງສໍາລັບວຽກງານພັດທະນາບຸກຄະລາກອນທ່ອງທ່ຽວລາວໃຫ້ມີຄວາມເຂັ້ມແຂງ. ພ້ອມນີ້, ທ່ານຮອງລັດຖະມົນຕີຍັງໄດ້ໃຫ້ຮູ້ວ່າ: ລັດຖະບານແຫ່ງສປປ ລາວ ໄດ້ຖືເອົາວຽກງານທ່ອງທ່ຽວເປັນເສດຖະກິດປາຍແຫຼມ ຂະແໜງການໜຶ່ງທີ່ກະຕຸ້ນບັນດາຂະແໜງການອື່ນໆ ທີ່ເປັນຕ່ອງໂສ້ການບໍລິການໃຫ້ມີການພັດທະນາໄປພ້ອມໆກັນ, ຂະຫຍາຍການລົງທຶນເຂົ້າໃສ່ບັນດາກິດຈະການຕ່າງໆ ເປັນຕົ້ນການຂົນສົ່ງນັກທ່ອງທ່ຽວ, ສະຖານທີ່ທ່ອງທ່ຽວ, ການນໍາທ່ຽວ, ການພັກແຮມ, ອາຫານ ແລະ ເຄື່ອງດື່ມ, ການສົ່ງເສີມສຸຂະພາບ, ການຜະຈົນໄພ, ເຄື່ອງທີ່ລະນຶກ ແລະ ບັນດາກິດຈະກຳປິ່ນອ້ອມການທ່ອງທ່ຽວທີ່ພົວພັນທາງກົງ ແລະ ທາງອ້ອມຂອງການບໍລິການ, ສົ່ງເສີມໃຫ້ເກີດການຜະລິດພາຍໃນຢ່າງກວ້າງຂວາງສາມາດສ້າງວຽກເຮັດງານທໍາ ແລະ ກະຈາຍລາຍຮັບຢ່າງກວ້າງຂວາງໃຫ້ປະຊາຊົນທ້ອງຖິ່ນ ໂດຍສະເພາະໃນເຂດທີ່ການທ່ອງທ່ຽວມີການຂະຫຍາຍຕົວ. ໃນນັ້ນລວມມີອາຊີບພະນັກງານນໍາທ່ຽວ ຊຶ່ງນໍາເອົາເງິນຕາຕ່າງປະເທດມາສູ່ປະເທດຊາດຂອງພວກເຮົາ ເປັນຈໍານວນຫຼາຍພໍສົມຄວນປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ, ຊ່ວຍຫຼຸດຜ່ອນຄວາມທຸກຍາກຂອງປະຊາຊົນບັນດາເຜົ່າຕາມນະໂຍບາຍຂອງພັກ ແລະ ລັດຖະບານທີ່ໄດ້ວາງອອກເທື່ອລະກ້າວ.ຂ່າວ: ທະນູທອງ, ພາບ: ຂັນໄຊ