ຫຼວງພະບາງສຸມໃສ່ພັດທະນາການທ່ອງທ່ຽວ ຕິດພັນກັບການປົກປັກຮັກສາວັດທະນະທຳທີ່ເປັນເອກະລັກ

ທ່ານນາງ ສຸດາພອນ ຄົມທະວົງ ກຳມະການພັກແຂວງ, ເລຂາຄະນະພັກຮາກຖານ ຫົວໜ້າພະແນກວັດທະນະທຳ ແລະ ການທ່ອງທ່ຽວ (ວທ) ແຂວງ ໄດ້ປະກອບຄຳເຫັນຕໍ່ກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງຫຼວງພະບາງ ໃນຫົວຂໍ້ “ພັດທະນາການທ່ອງທ່ຽວ ຕິດພັນກັບການປົກປັກຮັກສາວັດທະນະທຳທີ່ເປັນເອກະລັກຂອງຊາວຫຼວງພະບາງ”; ໃນວັນທີ 29 ກັນຍາຜ່ານມາວ່າ: ໂດຍປະຕິບັດແຜນຍຸດທະສາດຂອງອົງຄະນະພັກແຂວງ ທີ່ຖືເອົາການທ່ອງທ່ຽວເປັນທ່າແຮງໜຶ່ງໃນການພັດທະນາເສດຖະກິດ-ສັງຄົມຂອງແຂວງ ໃນ 5 ປີຜ່ານມາ ພວກເຮົາໄດ້ຕັ້ງໜ້າປັບປຸງ ແລະ ພັດທະນາການທ່ອງທ່ຽວ ເປັນຕົ້ນໄດ້ສ້າງແຜນຍຸດທະສາດສຳລັບປີ 2020-2024 ປະກອບມີ 30 ແຜນງານ, 113 ໂຄງການ, ປະຕິບັດສໍາເລັດ 102 ໂຄງການເທົ່າກັບ 90.27%; ນອກຈາກນັ້ນ, ການພັດທະນາພື້ນຖານໂຄງລ່າງຂະໜາດນ້ອຍເພື່ອເຂົ້າເຖິງສະຖານທີ່ທ່ອງທ່ຽວ, ປັບປຸງສິ່ງອຳນວຍຄວາມສະດວກເພື່ອເປັນບ່ອນອີງໃຫ້ແກ່ການພັດທະນາການທ່ອງທ່ຽວສູ່ຄວາມຍືນຍົງ, ມີຄຸນນະພາບ ແລະ ໄດ້ມາດຕະຖານ, ການປັບປຸງ ແລະ ການພັດທະນາແມ່ນໄດ້ປະຕິບັດຕາມມາດຕະຖານການ ທ່ອງທ່ຽວແຫ່ງຊາດ, ອາຊຽນ ແລະ ສາກົນ ສາມາດຍາດໄດ້ລາງວັນມາດຕະຖານອາຊຽນ 47 ລາງ ວັນ, ເດັ່ນກວ່າໝູ່ແມ່ນລາງວັນໜຶ່ງໃນຮ້ອຍເລື່ອງລາວຈຸດໝາຍປາຍທາງການທ່ອງທ່ຽວທີ່ຍືນຍົງຂອງໂລກຈາກອົງການຈຸດໝາຍປາຍທາງການທ່ອງທ່ຽວສີຂຽວ ແລະ ປີ 2025 ໄດ້ຮັບການຢັ້ງຢືນລາງວັນລະດັບຫຼຽນເງິນ ເປັນແຂວງດຽວໃນກຸ່ມປະເທດ CLMV (ກໍາປູເຈຍ, ລາວ, ມຽນມາ, ຫວຽດນາມ); ຊຶ່ງຈະໄດ້ໄປຮັບລາງວັນໃນເດືອນຕຸລາທີ່ຈະມາເຖິງນີ້; ສະຖານທີ່ທ່ອງທ່ຽວໄດ້ຮັບການປັບປຸງລະດັບ 4 ດາວ 3 ແຫ່ງ; ການທ່ອງທ່ຽວໄດ້ຂະຫຍາຍລົງສູ່ທ້ອງຖິ່ນ, ປະຊາຊົນມີລາຍຮັບ ເຮັດໃຫ້ຊີວິດການເປັນຢູ່ດີຂຶ້ນ, ພັດທະນາບ້ານທ່ອງທ່ຽວແບບອະນຸລັກ ປະຊາຊົນມີສ່ວນຮ່ວມໄດ້ 10 ບ້ານໃນ 4 ເມືອງ; ໄດ້ພັດທະນາຂີດຄວາມສາມາດພະນັກງານພາກລັດ, ພາກທຸລະກິດ ທັງພາຍໃນ ແລະ ຕ່າງ ປະເທດ, ຈັດຝຶກອົບຮົມວຽກງານການທ່ອງທ່ຽວໄດ້ 131 ຫົວຂໍ້, ປັບປຸງ, ສົ່ງເສີມ ແລະ ພັດທະນາພື້ນຖານໂຄງລ່າງການເຂົ້າເຖິງສະຖານທີ່ທ່ອງທ່ຽວ, ການໃຫ້ການບໍລິການດ້ານຕ່າງໆ. ຈາກໄລຍະຕົ້ນສະໄໝຂອງກອງປະຊຸມ, ພວກເຮົາໄດ້ຮັບຜົນກະທົບຈາກການລະບາດຂອງພະຍາດຢ່າງໜັກໜ່ວງ, ມາຮອດໄລຍະກາງສະໄໝ ໂດຍອີງໃສ່ນະໂຍບາຍຂອງລັດຖະບານໃນການຍົກເວັ້ນວີຊ່າທ່ອງທ່ຽວຂອງນັກທ່ອງທ່ຽວ ສປ ຈີນ ແລະ ບາງປະເທດເອີຣົບ ບວກໃສ່ການຈັດປີທ່ອງທ່ຽວລາວ 2024 ໄດ້ເຮັດໃຫ້ການທ່ອງທ່ຽວຄ່ອຍໆ ຟື້ນຕົວສູ່ສະພາບປົກກະຕິ.

ທ່ານນາງ ສຸດາພອນ ຄົມທະວົງ ກ່າວໃຫ້ຮູ້ອີກວ່າ: ໃນໄລຍະຜ່ານມາ, ໄດ້ໂຄສະນາສົ່ງເສີມການທ່ອງທ່ຽວຫຼາຍຮູບແບບຜ່ານພາຫະນະສື່ສັງຄົມແບບໃໝ່ທັງອອນລາຍ ແລະ ອັອບລາຍ; ປັບປຸງສູນຂໍ້ມູນຂ່າວສານ, ເວັບໄຊ້ໂຄສະນາເປັນ 3 ພາສາ; ສ້າງລະບົບຄີວອາໂຄດແປພາສາເປັນ 12 ພາສາ; ຕິດຕັ້ງອິນເຕີເນັດໂດຍບໍ່ເສຍຄ່າ; ສ້າງສາລະຄະດີໄດ້ 27 ລາຍການ ແລະ ເຂົ້າຮ່ວມວາງ ສະແດງຜະລິດຕະພັນການທ່ອງທ່ຽວໄດ້ 7 ຄັ້ງ:, ໄດ້ປັບປຸງກົນໄກຄຸ້ມຄອງບັນດາຫົວໜ່ວຍທຸລະກິດ, ເຜີຍແຜ່ນິຕິກໍາ, ລະບຽບກົດໝາຍ; ກວດກາ, ເກັບກໍາສະຖິຕິ, ເກັບກໍາພາກສ່ວນລະເມີດ; ມູນຄ່າການລົງທຶນພາກທຸລະກິດມີ 1,417 ກວ່າຕື້ກີບ, ອະນຸຍາດໃຫ້ບໍລິສັດນໍາທ່ຽວນຳນັກທ່ອງທ່ຽວເຂົ້າມາ 10,456 ກວ່າຄະນະ; ຊຸກຍູ້ບັນດາສະມາຄົມທຸລະກິດການທ່ອງທ່ຽວເພື່ອເປັນກໍາລັງແຮງໃຫ້ພາກລັດ; ທົ່ວແຂວງມີບໍລິສັດນໍາທ່ຽວ 115 ບໍລິສັດ, ບໍລິສັດແມ່ 100 ບໍລິສັດ, ໂຮງແຮມ-ຣີສອດ 116 ແຫ່ງ, ເຮືອນພັກ 416 ແຫ່ງ, ຮ້ານນວດ-ສະປາ 41 ຮ້ານ, ຮ້ານອາຫານ 384 ຮ້ານ, ຮ້ານບັນເທີງ 47 ຮ້ານ, ຮ້ານຄາຣາໂອເກະ 29 ຮ້ານ, ພະນັກງານນໍາທ່ຽວລະດັບແຂວງ 228 ຄົນ ພ້ອມທັງໄດ້ຮ່ວມມືກັບພາກພື້ນ ແລະ ສາກົນຈຳນວນໜຶ່ງເພື່ອມາພັດທະນາ.

ໃນ 5 ປີຜ່ານມາ, ມີນັກທ່ອງທ່ຽວເຂົ້າມາທ່ຽວພາຍໃນແຂວງ 4,239,552 ເທື່ອຄົນ, ນັກທ່ອງທ່ຽວພາຍໃນ 1,524,291 ເທື່ອຄົນ, ນັກທ່ອງທ່ຽວສາກົນ 2,715,261 ເທື່ອຄົນ, ສະເລ່ຍຄ່າໃຊ້ຈ່າຍຈາກນັກທ່ອງທ່ຽວ 2,1 ຕື້ໂດລາ, ລື່ນຄາດໝາຍ 60.49%. ສະແດງໃຫ້ເຫັນວ່າ ການພັດທະນາການທ່ອງທ່ຽວ ຕິດພັນກັບການຄຸ້ມຄອງປົກປັກຮັກສາວັດທະນະທຳ ໄດ້ກາຍເປັນຂະແໜງການນໍາໜ້າ ແລະ ຊຸກດັນໃຫ້ການພັດທະນາເສດຖະກິດ-ສັງຄົມຂອງແຂວງ ແລະ ຍັງກາຍເປັນຈຸດໝາຍທາງຂອງນັກທ່ອງທ່ຽວຈາກພາກພື້ນ ແລະ ສາກົນ. ໃນນັ້ນ, ພວກເຮົາຍັງໄດ້ກຳນົດການພັດທະນາການທ່ອງ ທ່ຽວ ຕິດພັນກັບການປົກປັກຮັກສາວັດທະນະທໍາທີ່ເປັນເອກະລັກ ຕາມວິໄສທັດທີ່ໄດ້ກຳນົດໄວ້ໃນ 5 ປີ ປະກອບມີ 15 ເປົ້າໝາຍ, 26 ແຜນວຽກຈຸດສຸມ, 65 ແຜນງານ ແລະ 268 ໂຄງການ.