 |
ແມ່ນ້ຳຈ່ຽງ ຫຼື ແມ່ນ້ຳຫຼີຈ່ຽງແມ່ນສະຖານທີ່ໂດ່ງດັງ ແລະ ເປັນທີ່ນິຍົມທີສຸດຂອງກວາງຊີ ເຜົ່າຈ້ວງເຂດປົກຄອງຕົນເອງ ມົນທົນໜານໜິງ ຕັ້ງຢູ່ທີ່ເມືອງກຸ໋ຍຫຼິນ, ແມ່ນ້ຳດັ່ງກ່າວກຳເນີດມາຈາກພູເຂົາ ເມົ້າເອີ໋ ທາງທິດເໜືອຂອງເມືອງກຸ໋ຍຫຼິນ ເຊິ່ງໄຫຼຜ່ານ ເມືອງກຸ໋ຍຫຼິນ,ຢ່າງໂຊ່ ແລະ ພື້ນທີ່ອຶ່ນໆ ໃນເຂດກວາງຊີ, ເຊິ່ງມີຄວາມຍາວປະມານ 437 ກິໂລແມັດ ແລະ ມີຄວາມເລິກທີ່ແຕກຕ່າງກັນແຕ່ລະບ່ອນ 2 ເຖິງ 5 ແມັດ ເປັນນ້ຳທີ່ໃສສະອາດ ຕາມແມ່ນ້ຳແມ່ນມີພູຜາທີ່ງົດງາມຕະການຕາຫຼາຍ ອາດສາມາດເວົ້າໄດ້ວ່າ ແຫຼ່ງທ່ອງທ່ຽວແມ່ນ້ຳຫຼີຈ່ຽງ ແມ່ນ “ອັນຍະມະນີແຫ່ງກຸ໋ຍຫຼິນ” ເຊິ່ງເປັນປາຍທາງຂອງນັກທ່ອງທ່ຽວທາງພາຍໃນແລະຕ່າງປະເທດທີ່ເດີນທາງໄປກວາງຊີຕ້ອງໄດ້ໄປສະຖານທີ່ນີ້.
 |
ການເດີນທາງໄປສະຖານທີ່ດັ່ງກ່າວແມ່ນໄປດ້ວຍລົດໄຟຄວາມໄວສູງຈາກສະຖານີລົດໄຟສາຍເໜືອຂອງໜານໜິງຫາເມືອງກຸ໋ຍຫຼິນ ໃຊ້ເວລາປະມານ 2-3 ຊົ່ວໂມງ ຖ້າຫາກໄປທາງລົດເມແມ່ນຈະໃຊ້ເວລາປະມານ 6-8 ຊົ່ວໂມງ ຖ້າຫາກເດີນທາງດ້ວຍເຮືອບິນ ແມ່ນໃຊ້ເວລາປະມານ 1 ຊົ່ວໂມງ ເຊິ່ງມີໄລຍະທາງຈາກໜານໜິງ ປະມານ 500 ກວ່າກິໂລແມັດ ຫຼັງຈາກນັ້ນນັ່ງລົດເມສຳລັບບໍລິການທ່ອງທ່ຽວເຂົ້າໄປທ່າເຮືອ ເຊິ່ງຈະມີເຮືອແພຫຼາຍຊະນິດຫຼາຍຂະໜາດ ໃວ້ຄອຍບໍລິການນັກທ່ອງທ່ຽວ.
 |
ການລ່ອງເຮືອຕາມແມ່ນ້ໍາສາຍນີ້ແມ່ນມີຄວາມປະທັບໃຈຫຼາຍຢ່າງເຊັ່ນ; ສາຍນ້ໍາທີ່ໃສງາມຈົນສາມາດແນມເຫັນກ້ອນຫີນທີ່ຢູ່ພື້ນນ້ຳ,ຕາມລຳທານແມ່ນມີໜ່ວຍພູຕັ້ງລຽນກັນທັງນ້ອຍແລະໃຫຍ່ທັງສູງແລະຕ່ຳບາງໜ່ວຍພູມປ່າໄມ້ແລະເຄືອໄມ້ນ້ອຍປົກຫຸ້ມຫຼຽວເບິ່ງຍາມໃດເຮັດໃຫ້ຈິດໃຈຊື່ນບານດ້ວຍທຳມະຊາດສີຂຽວ ບາງໜ່ວຍພູເປັນພູຫີນປູນ,
 |
ນອກຈາກນີ້ແລ້ວຕາມແລວແມ່ນ້ຳຍັງມີປ່າໄມ້ທີ່ຂຽວງາມຫຼາຍ ແລະ ດ້ານສະພາບແວດລ້ອມແມ່ນມີຄວາມສະຫງົບມີບັນຍາກາດທີ່ຈະອະທິບາຍໄດ້ຍາກ ລ່ອງເຮືອຟັງສຽງດົນຕີພື່້ນເມືອງຂອງຈີນທີ່ຫຼິ້ນສົດໆພ້ອມກັບດື່ມດຳທຳມະຊາດ ແຫຼ່ງທ່ອງທ່ຽວດັ່ງກ່າວແມ່ນໄດ້ພິມລົງໃນເງິນໃບ 20 ຢວນ
 |
ຖ້າຫາກວ່າພີ່ນ້ອງຊາວລາວທີ່ມີແຜນທ່ອງທ່ຽວເພື່ອຫາປະສົບການ ແລະ ກຳໄລຊີວິດຫຼືມີແຜນທີ່ຈະມາທ່ຽວຈີນຢາກໃຫ້ມາສຳພັດກັບບັນຍາກາດ ແລະ ທຳມະຊາດທີ່ອຸດົມສົມບູນ ມີນ້ຳໃສ ມີພູເຂົາ ປ່າໄມ້ຂຽວ ແລະ ມີທ້ອງຟ້າທີ່ແຈ່ມໃສ ເບິ່ງວິຖີຊີວິດຊາວບ້ານ ເຊີນມາທ່ຽວໄດ້ທີ່ ແມ່ນ້ຳຫຼີຈ່ຽງແຫ່ງເມືອງກຸ໋ຍຫຼິນ.
ຄໍາເຫັນ