 |
ທ່ານ ບຸນພັນ ວົງສຳພັນ ປະທານບໍລິສັດທ່ອງທ່ຽວວັນເດີຟູນລາວ ຈຳກັດຜູ້ດຽວ ໄດ້ໃຫ້ສຳພາດຕໍ່ສື່ມວນຊົນກ່ຽວກັບການລົງທຶນພັດທະນາວຽກງານການທ່ອງທ່ຽວແບບສີຂຽວ ແລະ ຍືນຍົງວ່າຕົນເອງມີຄວາມຮູ້ສຶກເປັນກຽດ ແລະ ພາກພູມໃຈເປັນຢ່າງຍິ່ງທີ່ໄດ້ຖືກຄັດເລືອກໃຫ້ເປັນຕົວແບບຂອງການລົງທຶນພັດທະນາວຽກງານການທ່ອງທ່ຽວແບບສີຂຽວ ແລະ ຍືນຍົງຂອງເມືອງວັງວຽງ ເພື່ອປະກອບຄຳເຫັນຕໍ່ກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງວຽງຈັນທີ່ຈະເປີດຂຶ້ນໃນໄວໆນີ້ວ່າ: ຕົນເອງໄດ້ມີຄວາມໄຝ່ຝັນຕໍ່ທຸລະກິດດ້ານການທ່ອງທ່ຽວ ຈຶ່ງຕັດສິນໃຈອອກຈາກບ້ານເພື່ອຊອກຫາຮຽນຮູ້ປະສົບການ ໂດຍເລີ່ມຈາກການເປັນພະນັກງານເສີບ, ພໍ່ຄົວ, ພະນັກງານນຳທ່ຽວຢູ່ເມືອງວັງວຽງ, ມາເຖິງປີ 2009 ຈຶ່ງໄດ້ຕັດສິນໃຈລົງທຶນສ້າງຕັ້ງທຸລະກິດທ່ອງທ່ຽວເປັນໜ່ວຍບໍລິການເຮືອກາຍັກວັນເດີຟູນ. ຜ່ານການດຳເນີນທຸລະກິດເຫັນວ່າທຸລະກິດການທ່ອງທ່ຽວນັບມື້ໄດ້ຮັບການພັດທະນາເຕີບໃຫຍ່ຂະຫຍາຍຕົວ ແລະ ໄດ້ກາຍເປັນຈຸດ ໝາຍປາຍທາງຂອງນັກທ່ອງທ່ຽວຈາກທຸກມຸມໂລກ ຈຶ່ງເຮັດໃຫ້ທຸລະກິດທ່ອງທ່ຽວນັບມື້ນັບເຕີບໃຫຍ່ຂະ ຫຍາຍຕົວຍິ່ງຂຶ້ນ, ມາຮອດປີ 2014 ຈຶ່ງໄດ້ຍົກລະດັບຈາກໜ່ວຍບໍລິການ ມາເປັນບໍລິສັດທ່ອງທ່ຽວວັນເດີຟູນລາວ ຈໍາກັດຜູ້ດຽວ ແລະ ໄດ້ມາພັດທະນາສະຖານທີ່ຂົວສີຟ້າ, ຖ້ຳນາງຟ້າ-ຖ້ຳນອນ ໂດຍສະເພະແມ່ນ ຂະຫຍາຍສິ່ງປຸກສ້າງຮ້ານອາຫານໃໝ່, ປັບປຸງສະຖານທີ່ທ່ຽວຊົມຖ້ຳ ແລະ ການຍ່າງຕາມຈຸດຕ່າງໆ ແລະ ກິດຈະກຳອື່ນໆໃຫ້ມີຄວາມຫຼາກຫຼາຍສວຍງາມຂຶ້ນ ແລະ ຮັບປະກັນໄດ້ຄວາມປອດໄພຂອງນັກທ່ອງທ່ຽວ. ນອກຈາກນັ້ນ, ບໍລິສັດຍັງໄດ້ໄປທັດສະນະສຶກສາ, ທ່ອງທ່ຽວ, ຖອດຖອນບົດຮຽນທັງພາຍໃນ ແລະ ຕ່າງ ປະເທດ ເປັນຕົ້ນ ແມ່ນ ສປ ຈີນ, ຫວຽດນາມ, ສ ເກົາຫຼີ, ສິງກະໂປ, ອິນໂດເນເຊຍ, ມາເລເຊຍ, ໄທ, ຍີ່ປຸ່ນ, ຕວັກກີ, ອົສຕຣາລີ ແລະ ບັນດາປະເທດໃນທະວີບເອີຣົບ ເພື່ອມາປັບປຸງປະຍຸກການທ່ອງທ່ຽວໃຫ້ມີຄວາມຫຼາກຫຼາຍ ແລະ ມີຫຼາຍທາງເລືອກຕໍ່ນັກທ່ອງທ່ຽວເຊັ່ນ: ເຮືອກາຍັກ, ຂີ່ສະລິງ, ຮ້ານອາຫານ, ຮ້ານກາເຟ, ຈຸດຊົມວິວ, ທ່ຽວຊົມຖ້ຳນາງຟ້າ-ຖ້ຳນອນ, ບໍລິການລົດຂົນສົ່ງຮັບແຂກ, ສະຖານທີ່ທ່ອງທ່ຽວຫ້ວຍຢາ, ສະຖານທີ່ທ່ອງທ່ຽວຖ້ຳນ້ຳ-ຖ້ຳສັງທອງ-ຖ້ຳຫອຍສັງ ແລະ ກຳລັງດຳເນີນການສຶກສາສຳຫຼວດເພື່ອຈະລົງທຶນ ແລະ ຂະຫຍາຍກິດຈະການໃໝ່ອີກຈຳນວນໜຶ່ງ.
 |
ປັດຈຸບັນ, ມູນຄ່າການລົງທຶນທັງໝົດຂອງບໍລິສັດປະມານ 50 ຕື້ກວ່າກີບ ຊຶ່ງໄດ້ຕອບສະໜອງວຽກເຮັດງານທຳໃຫ້ຊາວໜຸ່ມ-ໄວໜຸ່ມ ແລະ ປະຊາຊົນພາຍໃນເມືອງ 300 ກວ່າຄົນ, ສ້າງລາຍຮັບທີ່ໝັ້ນຄົງ, ເຮັດໃຫ້ຊີວິດການເປັນຢູ່ຂອງເຂົາເຈົ້ານັບມື້ດີຂຶ້ນ ກາຍເປັນຄອບຄົວພົ້ນທຸກ. ໃນແຕ່ລະປີໄດ້ປະກອບສ່ວນພັນທະອາກອນໃຫ້ພາກລັດບໍ່ຫຼຸດ 70-80 ລ້ານກີບ. ໃນປີ 2019 ພາຍຫຼັງປັບປຸງເຂົ້າສູ່ລະບົບບັນຊີໄດ້ປະຕິບັດພັນທະອາກອນໃຫ້ແກ່ລັດຫຼາຍກວ່າ 300 ກວ່າລ້ານກີບໃນແຕ່ລະປີ. ນອກຈາກນີ້, ຍັງໄດ້ປະ
ກອບສ່ວນຊຸກຍູ້ການພັດທະນາທ້ອງຖິ່ນ, ຊຸກຍູ້ຂະບວນການຕ່າງໆ, ໄພພິບັດທາງທຳມະຊາດ, ໂລກລະ ບາດ, ກອງປະຊຸມໃຫຍ່ຂອງເມືອງ, ແຂວງ, ສູນກາງ, ຊ່ວຍເຫຼືອສັງຄົມ ແລະ ຮັບແຂກອື່ນໆ.
ທ່ານ ບຸນພັນ ວົງສຳພັນ ໄດ້ກ່າວວ່າ: ຕະຫຼອດໄລຍະ 15 ປີຂອງການສ້າງຕັ້ງ ແລະ ພັດທະນາບໍລິສັດທ່ອງທ່ຽວວັນເດີຟູນລາວ ຈໍາກັດຜູ້ດຽວ ໄດ້ຮັບລາງວັນຕ່າງໆເຊັ່ນ: ລາງວັນພັດທະນາການທ່ອງທ່ຽວດີເດັ່ນ ແລະ ຍືນຍົງຂອງ ສປປ ລາວ ປະຈຳປີ 2018, ລາງວັນນັກທຸລະກິດໜຸ່ມດີເດັ່ນປະຈຳປີ 2021, ລາງວັນນັກທຸລະກິດຊັ້ນນຳດີເດັ່ນປະຈຳປີ 2022, ລາງວັນທຸລະກິດອາຊຽນຂະແໜງການທ່ອງທ່ຽວ SME ປະຈໍາປີ 2024, ລາງວັນຫ້ອງນໍ້າສະອາດມາດຕະຖານອາຊຽນປີ 2023-2024 ແລະ ປີ 2025 ໄດ້ຮັບໃບຍ້ອງຍໍຂັ້ນສູນກາງ, ແຂວງ ແລະ ຂັ້ນເມືອງຈຳນວນໜຶ່ງ. ໃນຕໍ່ໜ້າຈະສືບຕໍ່ພັດທະນາແຫຼ່ງທ່ອງທ່ຽວທໍາມະຊາດຂົວສີຟ້າ, ຖ້ຳນາງຟ້າ-ຖ້ຳນອນໃຫ້ໄປຕາມທິດສີຂຽວ ແລະ ຍືນຍົງ ແລະ ເປັນມິດກັບສິ່ງແວດລ້ອມ ຕິດພັນກັບການພັດທະນາຕາມແລວເສດຖະກິດຂອງແຂວງ ແລະ ສາມາດຮອງຮັບການເຊື່ອມໂຍງ, ເຊື່ອມຈອດການທ່ອງທ່ຽວກັບພາກພື້ນ, ສາກົນ, ການບໍລິການທາງຜ່ານ ແລະ ອື່ນໆໃຫ້ໄປຕາມວິໄສທັດ ດັ່ງຄໍາຂວັນທີ່ວ່າ: ເມືອງແຫ່ງສາຍນໍ້າໄຫຼ-ສົດໃສ, ປ່າໄມ້ສີຂຽວ, ທ່ອງທ່ຽວປອດໄພ ແລະ ຊາວເມືອງມີນໍ້າໃຈປະເສີດ.
 |
ໂອກາດນີ້, ທ່ານ ບຸນພັນ ວົງສຳພັນ ຍັງໄດ້ເຊີນຊວນໃຫ້ນັກທ່ອງທ່ຽວທັງພາຍໃນ ແລະ ຕ່າງ ປະເທດໃຫ້ເຂົ້າມາທ່ອງທ່ຽວເມືອງວັງວຽງ ແຂວງວຽງຈັັັັັັັັັັັັັັັັັັນ ຊຶ່ງມີສະຖານແຫຼ່ງທ່ອງທ່ຽວທາງທຳມະຊາດທີ່ສວຍສົດງົດງາມຫຼາຍແຫ່ງ ໂດຍສະເພາະແມ່ນສະຖານທີ່ທ່ອງທ່ຽວຂົວສີຟ້າ, ຖໍ້ານາງຟ້າ, ຖ້ຳນອນ ແລະ ສະຖານທີ່ທ່ອງທ່ຽວອື່ນໆຂອງແຂວງວຽງຈັນທີ່ສວຍງາມໄວ້ຄອຍບໍລິການທ່ານ.
ຄໍາເຫັນ