ພັດທະນາແຫຼ່ງທ່ອງທ່ຽວເນັ້ນສ້າງບຸກຄະລາກອນເຂັ້ມແຂງ

ທ່ານ ນາງສອນທິດາ ອຸນາພົມ ປະທານບໍລິສັດພັດທະນາແຫຼ່ງທ່ອງທ່ຽວນໍ້າຕົກຕາດເຍືອງຫຼັກ40 ເມືອງປາກຊ່ອງ ແຂວງຈໍາປາສັກ ແລະ ແຫຼ່ງທ່ອງທ່ຽວນໍ້າຕົກຕາດເລາະ-ຕາດຮັງ ແຂວງສາລະວັນໄດ້ໃຫ້ສໍາພາດຕໍ່ຜູ້ຂຽນວ່າ: ກິດຈະກໍາການທ່ອງທ່ຽວລະດູຝົນມີຄວາມຟົດຟື້ນ ຍ້ອນວ່າ ຕົ້ນໄມ້ເຕີບໃຫຍ່ຂະຫຍາຍຕົວໄວ, ນໍ້າຕົກຕາດສວຍງາມ, ບັນດານັກທ່ອງທ່ຽວທັງພາຍໃນ-ຕ່າງປະເທດເຂົ້າຢ້ຽມຊົມເປັນຈໍານວນຫຼາຍ ຊຶ່ງທຽບໃສ່ປີຜ່ານມາແມ່ນມີຈໍານວນເພີ່ມຂຶ້ນ, ສະເພາະໜ້າຝົນ ບັນດາບໍລິສັດທ່ອງທ່ຽວປະເທດໃກ້ຄຽງ ແມ່ນໄດ້ມີການວາງແຜນທ່ອງທ່ຽວເປັນຢ່າງດີ ກົງກັນຂ້າມ ກ່ອນໜ້ານີ້ຫຼາຍສິບປີຜ່ານມາ ມີຄວາມເຂົ້າໃຈວ່າ ການທ່ອງທ່ຽວຟົດຟື້ນສະເພາະແຕ່ລະດູແລ້ງເທົ່ານັ້ນມາເຖິງປັດຈຸບັນ ບໍລິສັດທ່ອງທ່ຽວ ໄດ້ວາງແຜນຕະຫຼອດທັງປີ, ນັກທ່ອງທ່ຽວ ມີ2 ຮູບແບບ ຄື: ທ່ອງທ່ຽວລະດູແລ້ງ ແລະ ທ່ອງທ່ຽວລະດູຝົນ ຈຶ່ງເຮັດໃຫ້ການທ່ອງທ່ຽວທີ່ແຂວງຈໍາປາສັກຟົດຟື້ນໂດຍລວມ, ສະເພາະແມ່ນແຫຼ່ງທ່ອງທ່ຽວນໍ້າຕົກຕາດເຍືອງ ມີນັກທ່ອງທ່ຽວ ເຂົ້າ-ອອກ ເປັນປົກກະຕິ, ນັກທ່ອງທ່ຽວເຂົ້າມາຫຼາຍ ແມ່ນບັນດາປະເທດທີ່ມີຊາຍແດນຕິດຈອດ ເປັນຕົ້ນ ປະເທດໄທ, ຫວຽດນາມ, ກໍາປູເຈຍ. ນອກນັ້ນ ກໍແມ່ນ ບັນດາປະເທດທີ່ເພິ່ນໄດ້ໄປລົງທຶນຢູ່ແຂວງທາງພາກໃຕ້, ສປ ຈີນ, ສ ເກົາຫຼີ ແລະ ມີບັນດານັກທ່ອງທ່ຽວທີ່ມາຈາກເອີຣົບອື່ນໆ.

ສະຖານທີ່ນໍ້າຕົກຕາດເຍືອງ ແມ່ນສໍາລັບນັກທ່ອງທ່ຽວຍ່າງຊົມ, ບໍ່ແມ່ນກິດຈະກໍາປີນ-ໄຕ່ ຫຼື ຫ້ອຍແຂວນຢູ່ເຊືອກ, ປີນີ້ມີນັກທ່ອງທ່ຽວ ໄທ, ກໍາປູເຈຍ ມາເປັນຄາລາວານ, ໝູ່ຄະນະ, ແບບຄອບຄົວ ອັນໄດ້ເຮັດໃຫ້ສີສັນຂອງການທ່ອງທ່ຽວປີ2025ຄຶກຄື້ນ ໂດຍສະເພາະເຂດພູພຽງບໍລະເວນເປັນຫຼັກ.ຄຽງຄູ່ກັບການບໍລິການ ດ້ານສິ່ງແວດລ້ອມ ຍັງແມ່ນໝາກຫົວໃຈຫຼັກຂອງບໍລິສັດ ຖືສໍາຄັນໃນການພັດທະນາແຫຼ່ງທ່ອງທ່ຽວ. ທັງສ້າງບຸກຄະລາກອນໃຫ້ເປັນວົງຈອນອັນດຽວກັນ, ການພັດທະນາບໍ່ໄດ້ປ່ຽນແປງທໍາມະຊາດ ພຽງແຕ່ຕໍ່ເຕີມບູລະນະສິ່ງທີ່ຂາດເຂີນ ໃຫ້ມີຈໍານວນເພີ່ມຂຶ້ນ ໂດຍສະເພາະຂົງເຂດປ່າປ້ອງກັນແຫຼ່ງນໍ້າ(ປ່າຍອດນໍ້າ ຫຼື ປ່າເທິງແຫຼ່ງນໍ້າຕົກຕາດ). ນອກນັ້ນ ຍັງຊຸກຍູ້ປະຊາຊົນ ປູກຕົ້ນໄມ້ກິນໝາກແຊມໃສ່ສວນກາເຟ ເພື່ອໃຫ້ປະຊາຊົນມີລາຍຮັບເພີ່ມ, ສົ່ງເສີມໃຫ້ປູກຜັກປອດສານພິດ ເພື່ອສະໜອງແກ່ຮ້ານອາຫານນໍາມາປຸງແຕ່ງ, ນອກຈາກເມນູອາຫານຫຼັກພາຍໃນຮ້ານແລ້ວຍັງເນັ້ນຫຼັກໂພຊະນາການຕໍ່ສຸຂະພາບໃຫ້ກັບນັກທ່ອງທ່ຽວ. ຄຽງຄູ່ກັນນັ້ນ, ທາງຮ້ານອາຫານ ຍັງໄດ້ຮັບເອົາບັນດາລູກ-ຫຼານ ຂອງພໍ່ແມ່ປະຊາຊົນ ພາຍໃນບ້ານດັ່ງກ່າວ ເຂົ້າເຮັດວຽກນໍາອີກ ແລະ ຍັງຮັບຝຶກສອນທັກສະດ້ານອື່ນໆ ທີ່ປິ່ນອ້ອມກັບການພັດທະນາແຫຼ່ງທ່ອງທ່ຽວຂອງບໍລິສັດເພື່ອໃຫ້ເຂົາເຈົ້າມີຄວາມມັກ-ຮັກວຽກບໍລິການ ກໍຄືຮູ້ຈັກຄຸນຄ່າໃນການສຶກສາຮໍ່າຮຽນ. ນອກນັ້ນ ຍັງໄດ້ໃຫ້ປະຊາຊົນມີສ່ວນຮ່ວມ ເລື່ອງການອະນຸລັກຊີວະນາໆພັນຊຶ່ງແມ່ນຫົວໃຈຫຼັກ ໃນການພັດທະນາ ເພາະວ່າ ຂົງເຂດດັ່ງກ່າວ ນອກຈາກມີນໍ້າຕົກຕາດ, ປ່າໄມ້ຂຽວງາມແລ້ວ ຍັງມີສັດປ່ານາໆພັນ ໄວ້ໃຫ້ນັກທ່ອງທ່ຽວໄດ້ເຫັນ ແລະ ເກີດຄວາມປະທັບໃຈ ຢ່າງປະຈັກຕາ ໂດຍມີການແນະນໍາ ເຖິງຄວາມໝາຍສໍາຄັນ ຂອງຄົນ ຕິດພັນກັບສິ່ງແວດລ້ອມທໍາມະຊາດ ຄືບໍ່ໃຫ້ເຂົາເຈົ້າເຂົ້າປ່າລ່າສັດມາເປັນອາຫານ.

ທ່ານ ນາງສອນທິດາ ອຸນາພົມ ກ່າວຕື່ມວ່າ: ຜ່ານຈາກການພັດທະນາວຽກງານທ່ອງທ່ຽວ 10ກວ່າປີ ໄດ້ສ້າງຈິດສໍານຶກໃຫ້ກັບປະຊາຊົນ ເຂົ້າໃຈ ແລະ ມີຄວາມຮັບຮູ້ວ່າ ຕາດເຍືອງເປັນມູນມັງມໍລະດົກ ເປັນຊັບສົມບັດອັນລໍ້າຄ່າຂອງພວກເຂົາເຈົ້າໝົດທຸກຄົນ, ຂ້າພະເຈົ້າພຽງແຕ່ເປັນຜູ້ໄປພັດທະນາ, ຊຸກຍູ້, ສົ່ງເສີມທັງເປັນຕະຫຼາດກັບທີ່ໃຫ້ເຂົາເຈົ້າ ເພື່ອໃຫ້ປະຊາຊົນມີລາຍຮັບທີ່ໝູນວຽນ, ຊ່ວຍສະມາຊິກພາຍໃນຄອບຄົວເຂົາເຈົ້າ, ຍ້ອນມີຄວາມດຸໝັ່ນ ໃນການອອກແຮງງານ, ປະຊາຊົນຈຶ່ງມີລາຍຮັບຢ່າງພຽງພໍ, ສາມາດເພິ່ງຕົນເອງ, ກຸ້ມກິນ ແລະ ມີຄວາມເຂັ້ມແຂງ ຍ້ອນເຫດຜົນດັ່ງກ່າວ ເຂົາເຈົ້າຈຶ່ງບໍ່ມີແນວຄວາມຄິດທີ່ຈະໄປອອກແຮງງານຢູ່ປະເທດອື່ນ, ສະນັ້ນ ຕ້ອງຊອກໃຫ້ເຫັນວ່າ ສິ່ງໃດແທ້ໆທີ່ເຂົາເຈົ້າຕ້ອງການ, ສິ່ງໃດທີ່ມີ ແລະ ດີແລ້ວ ກໍຄວນສົ່ງເສີມເປັນທະວີຄູນ ກົງກັນຂ້າມ ສິ່ງໃດຂາດເຂີນ ກໍຄວນຊອກຫາມາເຕີມໃສ່ໃຫ້ພຽງພໍ ແລະ ສິ່ງໃດທີ່ພົ້ນເດັ່ນແລ້ວ ກໍຍົກສູງຂຶ້ນໃຫ້ມີບົດບາດນໍາພາ ໃນຂົງເຂດດັ່ງກ່າວ ຍ້ອນແນວນັ້ນ ຈຶ່ງເປັນສາເຫດໜຶ່ງທີ່ເຮັດໃຫ້ຈໍານວນພະນັກງານເຮັດວຽກບໍລິການທີ່ຕາດເຍືອງ ຫຼາຍເຖິງ 70ກວ່າຄົນ.

ນັບຕັ້ງແຕ່ປີ2019 ໄລຍະເກີດມີການແຜ່ລະບາດຂອງພະຍາດໂຄວິດ-19 ແຫຼ່ງທ່ອງທ່ຽວຕາດເຍືອງໄດ້ຮັບໃບຢັ້ງຢືນນາມມະຍົດດີເດັ່ນໃນການຈ້າງງານ ຍ້ອນວ່າຮັກສາຈໍານວນພະນັກງານໄວ້ຢ່າງໝັ້ນຄົງ ຈົນພະນັກງານກາຍເປັນຜູ້ຈັດການທີ່ມີສີມີຄວາມຊໍານານງານໃນລະດັບສູງ, ພະນັກງານແຕ່ລະຄົນ ຮັກການບໍລິການ ຄືກັນກັບເຮືອນຂອງຕົນເອງ ໝາຍຄວາມວ່າ ທຸກໆຄົນເປັນເຈົ້າຂອງຮ່ວມກັນ ຖືປະຊາຊົນເຂດດັ່ງກ່າວ ເປັນເສົາຫຼັກ ລູກຫຼານ ກໍຄືໜໍ່ແໜງ ປຽບສະເໝືອນຕົ້ນໄມ້ສີຂຽວອ້ອມຮອບແຫຼ່ງທ່ອງທ່ຽວ.ແຕ່ລະປີ ໄດ້ຂໍເອົາບັນດາຊ່ຽວຊານຈາກຕ່າງປະເທດມາສອນພາສາ ຈີນ, ຝຣັ່ງ, ອັງກິດ, ຫວຽດນາມ ແລະ ພາສາອື່ນໆ ເພື່ອຍົກລະດັບຄວາມຮູ້,ຄວາມສາມາດດ້ານບໍລິການຂຶ້ນເລື້ອຍໆ, ຕອບສະໜອງໃຫ້ກັບນັກທ່ອງທ່ຽວທຸກໆປະເທດໃນໂລກທີ່ເຂົ້າມາທ່ອງທ່ຽວຕາດເຢືອງ.

ສະນັ້ນ, ຜູ້ພັດທະນາຕ້ອງຊອກໃຫ້ເຫັນວ່າ ສິ່ງໃດແທ້ໆທີ່ເຂົາເຈົ້າຕ້ອງການ, ສິ່ງໃດທີ່ມີ ແລະ ດີແລ້ວ ກໍຄວນສົ່ງເສີມເປັນທະວີຄູນ ກົງກັນຂ້າມ ສິ່ງໃດຂາດເຂີນ ກໍຄວນຊອກຫາມາເຕີມໃສ່ໃຫ້ພຽງພໍ ແລະ ສິ່ງໃດທີ່ພົ້ນເດັ່ນແລ້ວ ກໍຍົກສູງໆຂຶ້ນໃຫ້ມີບົດບາດນໍາພາ ໃນຂົງເຂດດັ່ງກ່າວ ເພາະວ່າຜູ້ພັດທະນາລ້ວນແຕ່ແມ່ນຜູ້ທີ່ມີຄວາມຮັບຜິດຊອບ ຕໍ່ຜົນຂອງການຜະລິດຂອງຕົນ ແລະ ນໍາເອົາເຕັກນິກ-ຄວາມຮູ້, ຄວາມສາມາດເຂົ້າໄປຊ່ວຍຕື່ມ ເພື່ອໃຫ້ເປັນຂະບວນການ.