 |
ຊຸດຝຶກອົບຮົມຄັ້ງນີ້, ຈັດຂຶ້ນເພື່ອຍົກລະດັບຄວາມຮູ້, ຄວາມເຂົ້າໃຈ ແລະ ສ້າງຄວາມສາມາດໃຫ້ບຸກຄະລາກອນທີ່ເຮັດວຽກງານຕາໜ່າງເດັກຂັ້ນບ້ານ ແລະ ໂຮງຮຽນໃຫ້ມີຄວາມຮັບຮູ້ຢ່າງເລິກເຊິ່ງກ່ຽວກັບໄພອັນຕະລາຍ, ຮູບການ ແລະ ກົນອຸບາຍຂອງກຸ່ມຄົນບໍ່ດີໃນການເຄື່ອນໄຫວຄ້າມະນຸດ ທັງເຮັດໃຫ້ຜູ້ເຂົ້າຮ່ວມໄດ້ຮຽນຮູ້ກ່ຽວກັບຂັ້ນຕອນການເຝົ້າລະວັງ, ການຈຳແນກກຸ່ມສ່ຽງ, ການຊ່ວຍເຫຼືອເບື້ອງຕົ້ນ ແລະ ການປະສານງານສົ່ງຕໍ່ຜູ້ຖືກເຄາະຮ້າຍຢ່າງທັນການ ແລະ ມີປະສິດທິພາບ ສອດຄ່ອງຕາມລະບຽບກົດໝາຍ. ຊຶ່ງມີສຳມະນາກອນເຂົ້າຮ່ວມ 63 ຄົນ ຍິງ 17 ຄົນ ມາຈາກ 10 ບ້ານເປົ້າໝາຍ. ໃນນັ້ນບັນດາຜູ້ເຂົ້າຮ່ວມໄດ້ຮັບຟັງການບັນຍາຍ, ສົນທະນາ ແລກປ່ຽນບົດຮຽນໃນຫຼາຍຫົວຂໍ້ທີ່ສຳຄັນ ເປັນຕົ້ນ ບັນດານິຕິກຳ ແລະ ກົດໝາຍ ວ່າດ້ວຍການຕ້ານການຄ້າມະນຸດ, ບົດບາດ ແລະ ໜ້າທີ່ຂອງຕາໜ່າງປົກປ້ອງເດັກຂັ້ນບ້ານ ໃນການເຝົ້າລະວັງ, ປ້ອງກັນ ແລະ ເຕັກນິກການລົງເກັບກຳຂໍ້ມູນ, ການກັ່ນຕອງ ແລະ ການຊ່ວຍເຫຼືອຜູ້ຖືກເຄາະຮ້າຍ ຫຼືກຸ່ມສ່ຽງ ໂດຍສະເພາະແມ່ນເດັກນ້ອຍ ແລະ ແມ່ຍິງ.
ໂອກາດນີ້, ຮອງປະທານຄະນະນະກຳມະການປົກຄອງເມືອງ ໄດ້ເນັ້ນໜັກໃຫ້ສຳມະນາກອນທັງໝົດຈົ່ງຍົກສູງຄວາມຮັບຜິດຊອບ, ເອົາໃຈໃສ່ຕິດຕາມ, ຄົ້ນຄວ້າ ແລະ ແລກປ່ຽນບົດຮຽນນຳຄູຝຶກ ເພື່ອເຮັດໃຫ້ສາມາດນຳເອົາຄວາມຮູ້, ບົດຮຽນ ແລະ ທັກສະທີ່ໄດ້ຮັບຈາກການຝຶກອົບຮົມຄັ້ງນີ້ໄປຜັນຂະຫຍາຍ ແລະ ຈັດຕັ້ງປະຕິ ບັດເຂົ້າໃນວຽກງານຕົວຈິງຢູ່ພາຍໃນທ້ອງຖິ່ນ ເຮັດໃຫ້ວຽກງານປ້ອງກັນ ແລະ ສະກັດກັ້ນການຄ້າມະນຸດຢູ່ເມືອງພູຄູນ ໄດ້ຮັບການຈັດຕັ້ງປະຕິບັດຢ່າງເປັນຮູບປະທຳ ແລະ ມີທ່າຫັນປ່ຽນທີ່ດີຂຶ້ນເລື້ອຍໆ.
 |
ຂ່າວ-ພາບ: ຂ່າວສານເມືອງພູຄູນ
ຄໍາເຫັນ