ພັກປະຊາຊົນ ປະຕິວັດລາວ ກຳເນີດມາຈາກພັກອມມູນິດອິນດູຈີນ

ໂດຍ: ຕະວິນຍານ

ເນື່ອງໃນໂອກາດວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 69 ປີ, ສະຫາຍ ແພງຊ້ອຍ ແພງເມືອງ ຫົວໜ້າພະແນກ ໂຍທາທິການ-ຂົນສົ່ງ ແຂວງໄຊຍະບູລີ ໄດ້ສະແດງຄວາມຮູ້ສຶກ ວ່າ: ຂ້າພະເຈົ້າຮັບຮູ້ວ່າ ພັກປະຊາຊົນ ປະຕິວັດລາວ ແມ່ນພັກທີ່ກຳເນີດມາຈາກພັກກອມມູນິດອິນດູຈີນ, ຢຶດຖືລັດທິມາກ-ເລນິນເປັນທິດສະດີ ແລະ ແນວທາງໃນການນຳພາ-ຊີ້ນຳ ໄດ້ຮັບການສ້າງຕັ້ງຂຶ້ນໃນວັນທີ 22 ມີນາ 1955 ໂດຍແມ່ນປະທານ ໄກສອນ ພົມວິຫານ ເປັນຜູ້ນຳພາສ້າງຕັ້ງ ເພື່ອນຳພາຕໍ່ສູ້ຕ້ານກັບຈັກກະພັດທີ່ເຂົ້າມາຮຸກຮານລາວ. ພາຍໃຕ້ການນຳພາອັນສະຫຼາດສ່ອງໃສຂອງພັກປະຊາຊົນ ປະຕິວັດລາວ ກອງທັບ ແລະ ປະຊາຊົນລາວ ສາມາດຕີເອົາຊະນະການບຸກໂຈມຕີບຽດຢຶດຂອງສັດຕູທັງໝົດ ເປັນຕົ້ນແມ່ນບັ້ນຮົບນ້ຳບາກ, ຜາຖີ່, ບັ້ນຮົບທົ່ງໄຫຫີນຊຽງຂວາງ (ປີ1970), ບັ້ນຮົບລາມເຊິນ 719, ສາມາດທັບມ້າງໄດ້ຍຸດທະສາດ "ສົງຄາມພິເສດຂອງຈອນເຊິນ" ແລະ ຍຸດທະສາດ "ສົງຄາມພິເສດເພີ່ມທະວີຕາມທິດສະດີນິກເຊິນຂອງຈັກກະພັດແບບໃໝ່" ຈົນສມາດສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍໃນວັນທີ 2 ທັນວາ 1975. ດ້ວຍການປະຕິບັດທິດຊີ້ນໍາຂອງພັກວ່າ "ບົວບໍ່ຊໍ້ານໍ້າບໍ່ຂຸ່ນ ແຕ່ຈັບປາໄດ້ທັງໝົດ".

ພາຍຫຼັງໄດ້ຢຶດອຳນາດການປົກຄອງມາໄດ້ໃນທົ່ວປະເທດ ແລະ ສ້າງຕັ້ງລະບອບໃໝ່ຂຶ້ນ ສະພາບສາກົນ ແລະ ພາກພື້ນ ໄດ້ສືບຕໍ່ຜັນແປໄປຢ່າງສັບສົນ; ໃນເວລາດຽວກັນນັ້ນປະເທດເຮົາ ຊ້ຳພັດດ້ອຍພັດທະນາເກີນໄປ, ພື້ນຖານວັດຖຸ, ເຕັກນິກເກືອບວ່າບໍ່ມີຫຍັງຈັກດີ້, ຜົນຮ້າຍຕາມມາຂອງສົງຄາມແມ່ນໜັກ

ໜ່ວງຫຼາຍ, ອັນເຕັມໄປດ້ວຍຄວາມຫຍຸ້ງຍາກສັບສົນທີ່ສຸດ, ໃນເວລາດຽວກັນນັ້ນຊ້ຳພັດປະເຊີນໜ້າກັບກົນອຸບາຍຫຼ່ຽມລາຍໃໝ່ຂອງບັນດາອິດທິກຳລັງປໍລະປັກກໍຄື ພວກຄົນບໍ່ດີພາຍໃນປະເທດ. ພັກເຮົາຈຶ່ງຕັດສິນໃຈປະຕິບັດແນວທາງປ່ຽນແປງໃໝ່ ເພື່ອໃຫ້ສອດຄ່ອງກັບສະພາບຂອງຍຸກສະໄໝ. ນັບຕັ້ງແຕ່ປີ 1986 ຈົນມາຮອດປັດຈຸບັນ, ພັກເຮົາໄດ້ນຳພາ-ຊີ້ນຳເຮັດໃຫ້ປະເທດຊາດມີຄວາມສະຫງົບປອດໄພ, ເສດຖະກິດ, ວັດທະນະທຳ-ສັງຄົມໄດ້ຮັບການພັດທະນາຂະຫຍາຍຕົວ, ຊີວິດການເປັນຢູ່ຂອງປະຊາຊົນໄດ້ຮັບການເບິ່ງແຍງ ແລະ ພັດທະນາດີຂຶ້ນເປັນກ້າວໆ, ເຮັດໃຫ້ລະບົບການເມືອງ ປະຊາທິປະໄຕປະຊາຊົນ ໄດ້ມີຄວາມ ໜັກແໜ້ນເຂັ້ມແຂງ, ຊື່ສຽງຂອງປະເທດໄດ້ຍົກສູງບົດບາດໃນເວທີສາກົນ ແລະ ພາກພື້ນ.

ໃນນາມທີ່ເປັນຜູ້ສືບທອດພາລະກິດຂອງພັກຈະສືບຕໍ່ຢຶດໝັ້ນແນວຄິດ, ທິດສະດີມາກ - ເລນິນ ກໍຄືຈຸດໝາຍສັງຄົມນິຍົມຢ່າງໜັກແໜ້ນ, ເປັນເຈົ້າການປະດິດສ້າງໃນການໝູນໃຊ້ທິດສະດີ, ບົດຮຽນດ້ານຕ່າງໆເຂົ້າກັບເງື່ອນໄຂຕົວຈິງ; ຢຶດໝັ້ນ ແລະ ປະຕິບັດຢ່າງຖືກຕ້ອງ ບັນດາຫຼັກການພື້ນຖານດ້ານການຈັດຕັ້ງ ແລະ ການເຄື່ອນໄຫວຂອງພັກ ນັ້ນຄືຫຼັກການລວມສູນປະຊາທິປະໄຕ, ເວລາໃດກໍຖືສຳຄັນການເສີມຂະຫຍາຍຄວາມສາມັກຄີເປັນເອກະພາບພາຍໃນພັກໃຫ້ໜັກແໜ້ນ; ມີຄວາມຈົງຮັກພັກດີຕໍ່ຜົນປະໂຫຍດລວມຂອງຊາດ, ຂອງປະຊາຊົນ; ເຂັ້ມງວດໃນການຈຳກັດແກ້ໄຂປະກົດການຫຍໍ້ທໍ້ຕ່າງໆພາຍໃນພັກ; ຖືຄຸນທາດການເມືອງ, ຄຸນສົມບັດສິນທຳປະຕິວັດ ເປັນສິ່ງຕັດສິນໃນການເລືອກເຟັ້ນ ແລະ ນຳໃຊ້ພະນັກງານ; ຢຶດໝັ້ນຈິດໃຈຮັກຊາດ, ເອກະລາດເປັນເຈົ້າຕົນເອງ, ເພິ່ງຕົນເອງ ສ້າງຄວາມເຂັ້ມແຂງດ້ວຍຕົນເອງໃຫ້ຫຼາຍຂຶ້ນ.