ພັກເປັນຕົວແທນແຫ່ງສິດຜົນປະໂຫຍດຂອງປະຊາຊົນບັນດາເຜົ່າ

ໂດຍ:ວັນໄຊ

ທ່ານ ຄໍາສີ ແພງສະຫວັນ ກໍາມະການຄະນະປະຈໍາ ປະທານແນວລາວສ້າງຊາດແຂວງໄຊຍະບູລີ ໃຫ້ຮູ້ວ່າ: ພັກປະຊາຊົນປະຕິວັດລາວໄດ້ຮັບການສ້າງຕັ້ງຂຶ້ນ ໃນວັນທີ 22 ມີນາ 1955, ການກຳເນີດຂຶ້ນ ແມ່ນການສົມທົບແໜ້ນລັດທິມາກ-ເລນິນ ກັບຂະບວນຮັກຊາດ, ເປັນກຳລັງນຳໜ້າທາງການເມືອງ, ເຕົ້າໂຮມກໍາລັງແຮງສັງລວມ ຂອງປະຊາຊົນບັນດາເຜົ່າທີ່ຮັກຊາດ. ພາຍຫຼັງກຳເນີດໄດ້ກາຍເປັນກຳລັງປະຈຳບານຂອງປວງຊົນທັງຊາດ ນຳພາການຕໍ່ສູ້ຕ້ານຈັກກະພັດລ່າເມືອງຂຶ້ນ, ພວກລູກແຫຼ້ງຕີນມືທີ່ມາຮຸກຮານ ຈົນຍາດໄດ້ໄຊຊະນະ ແລະ ສະຖາປະນາ ສປປ ລາວ ຂຶ້ນຢ່າງສະຫງ່າຜ່າເຜີຍ.

ຕະຫຼອດ 69 ປີ ແຫ່ງພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພັກປະຊາຊົນປະຕິວັດລາວໄດ້ຜ່ານຜ່າອຸປະສັກ ແລະ ສິ່ງທົດສອບນາໆປະການ ຍ້ອນມີພັກທີ່ເປັນຕົວແທນແຫ່ງສິດຜົນປະໂຫຍດຂອງປະຊາຊົນບັນດາເຜົ່າ, ມີຄວາມສະຫຼາດສະຫຼຽວ ໄຫວພິບ ສະດຸ້ງໄຫວຕໍ່ສະພາບການຜັນແປຈຶ່ງເຮັດໃຫ້ພັກເຮົາສາມາດ ກຳນົດຍຸດທະສາດ, ແນວທາງນະໂຍບາຍຖືກຕ້ອງ, ສອດຄ່ອງກັບຈຸດພິເສດ ການປະຕິວັດຂອງປະເທດເຮົາແຕ່ລະໄລຍະ ນຳພາເສີມຂະຫຍາຍກຳລັງແຮງພາຍໃນຊາດ ສົມທົບກຳລັງແຮງຂອງຍຸກສະໄໝ.

ດ້ວຍຄວາມຮັບຜິດຊອບຕໍ່ຊາຕາກຳ ກໍຄືພາລະກິດອັນສູງສົ່ງຂອງພັກປະຊາຊົນປະຕິວັດລາວນັ້ນໃນປັດຈຸບັນຍ້ອນຫຼາຍປັດໄຈທັງພາຍໃນ ແລະ ພາຍນອກສົມທົບເຖິງບົດບາດການນຳພາ ຂອງພັກເຮົາ ເວົ້າລວມ, ເວົ້າສະເພາະ ຜົນກະທົບຈາກສະພາບການສາກົນ. ຄວາມຫຍຸ້ງຍາກທາງດ້ານເສດຖະກິດການເງິນ ໄດ້ກະທົບທາງກົງ ແລະ ທາງອ້ອມ ເຖິງສະມາຊິກພັກ, ພະນັກງານ, ປະຊາຊົນລາວບັນດາເຜົ່າ ແຕ່ເຖິງຢ່າງໃດກໍຕາມພາຍໃຕ້ການນຳພາຂອງພັກ ໄດ້ສືບຕໍ່ຄົ້ນຄວ້າ ແນວທາງນະໂຍບາຍ ນຳພາທຸກການຈັດຕັ້ງຂອງພັກເອົາໃຈໃສ່ສ້າງເງື່ອນໄຂສະດວກໃຫ້ທົ່ວປວງຊົນ ກໍຄືວົງຄະນາຍາດແຫ່ງຊາດ ພ້ອມກັນປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ປະກອບສ່ວນເຂົ້າໃນພາລະກິດການຫັນເປັນອຸດສາຫະກຳ ແລະ ທັນສະໄໝຢ່າງບໍ່ຢຸດຢັ້ງ.

ໃນໂອກາດທີ່ທົ່ວພັກ-ທົ່ວລັດ, ປະຊາຊົນ ແຂວງໄຊຍະບູລີ ພ້ອມກັນອອກແຮງແຂ່ງຂັ້ນກັນສ້າງຜົນງານ ຂໍ່ານັບຮັບຕ້ອງກອງປະຊຸມໃຫຍ່ 3 ຂັ້ນຂອງພັກ, ໂອກາດຄົບຮອບ 69 ປີ ວັນສ້າງຕັ້ງພັກ ຂ້າພະຈົ້້າເຊື່ອໝັ້ນວ່າ ພາຍໃຕ້ການນຳພາຂອງພັກປະຊາຊົນປະຕິວັດລາວ ປະເທດຊາດຂອງພວກເຮົາຈະສືບຕໍ່ຮັກສາໄດ້ສະຖຽນລະພາບທາງການເມືອງ-ເສດຖະກິດ ໄດ້ຮັບການພັດທະນາຕາມທິດກຳນົດ ສັງຄົມມີຄວາມສາມັກຄີປອງດອງ ຍຸຕິທຳ ສີວິໄລ ແຕ່ພ້ອມດຽວກັນນີ້ ກໍຍັງມີຫຼາຍບັນຫາທີ່ຕັ້ງຂຶ້ນ ທີ່ສົ່ງຜົນກະທົບຈາກພາຍນອກ ແລະ ພາຍໃນປະເທດ ໃຫ້ພວກເຮົາຕ້ອງສືບຕໍ່ຄົ້ນຄວ້າໃຫ້ເລິກເຊິງ ແລະ ຜັນຂະຫຍາຍໃຫ້ຖືກທິດຕາມມະຕິກອງປະຊຸມໃຫຍ່ ຄັ້ງທີ XI ຂອງພັກໃຫ້ປະກົດຜົນເປັນຈິງ ບັນຫາເສດຖະກິດການເງິນ, ບັນຫາຫຍໍ້ທໍ້ໃນສັງຄົມ, ເງິນເພີ້, ເງິນກີບອ່ອນຄ່າ, ລາຄານໍ້າມັນ, ບັນຫາດັ່ງກ່າວ ພັກ-ລັດຖະບານໄດ້ກຳນົດຈຸດສຸມໃນ 2 ວາລະແຫ່ງຊາດ ເຫັນວ່າສອດຄ່ອງກັບຄວາມເປັນຈິງທີ່ສຸດ ແລະ ພາກປະຕິບັດຕົວຈິງ ໃນບັນຫາຜ່ານມາເຫັນວ່າ ຂະແໜງການທີ່ກ່ຽວຂ້ອງ ປະຊາຊົນ-ສັງຄົມໄດ້ເອົາໃຈໃສ່ ມີການເຂົ້າຮ່ວມຢ່າງກວ້າງຂວາງສົມຄວນ ແຕ່ບັນຫາຕັ້ງຂຶ້ນ ການແກ້ໄຂບັນຫາທີ່ພວກເຮົາປະເຊີນຢູ່ຍັງບໍ່ທັງດີ.

ດ້ວຍຄວາມຮັບຜິດຊອບທາງການເມືອງ ແລະ ຮັບປະກັນການປະຕິບັດບົດບາດສິດໜ້າທີ່ຂອງຕົນ ພວກເຮົາຈະໄດ້ສືບຕໍ່ເພີ່ມທະວີວຽກງານໂຄສະນາປຸກລະດົມຂົນຂວາຍປະຊາຊົນ, ຊັ້ນຄົນ, ສາສະໜາ, ເພດ-ໄວ ໃຫ້ຮັບຮູ້ເຊື່ອມຊຶມແນວທາງນະໂຍບາຍຂອງພັກ-ລະບຽບກົດໝາຍຂອງລັດໃຫ້ທົ່ວເຖິງ ສ້າງໃຫ້ເກີດມີຄວາມເຊື່ອໝັ້ນໃນການນຳພາຂອງພັກ ພ້ອມກັນຜ່ານຜ່າອຸປະສັກຫຍຸ້ງຍາກ ເຂົ້າຮ່ວມພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ປະກົດຜົນເປັນຈິງ.