ພະນັກງານຫຼັກແຫຼ່ງ ຖວທ ສາລະວັນ ຮັບຟັງ ເຜີຍແຜ່ຜົນສຳເລັດກອງປະຊຸມ

ວັນທີ 31 ຕຸລາ ນີ້, ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ(ຖວທ)ແຂວງສາລະວັນ  ໄດ້ຈັດພິທີເຜີຍແຜ່ເຊື່ອມຊຶມ ແລະຜັນຂະຫຍາຍຜົນສຳເລັດກອງປະຊຸມຄົບຄະນະກາງສະໄໝຂອງສູນກາງພັກ ສະໄໝທີ XI ຕິດພັນກັບການເຊື່ອມຊຶມບັນດາຄຳສັ່ງ,  ຄຳແນະນຳວ່າດ້ວຍການກະກຽມ ແລະດຳເນີນກອງປະຊຸມໃຫຍ່ 3 ຂັ້ນຂອງຄະນະພັກຮາກຖານພະແນກ ຖວທ, ໂດຍການເຜີຍແຜ່ເອກະສານຂອງ ທ່ານ ມະໄລວອນ ສີປະເສີດ ກຳມະການພັກແຂວງເລຂາຄະນະພັກຮາກຖານ ຫົວໜ້າພະແນກຖວທ ແຂວງພະນັກງານຫຼັກແຫຼ່ງ, ສະມາຊິກພັກ, ພະນັກງານລັດຖະກອນເຂົ້າຮ່ວມ.
ທ່ານ ສະຫາຍ ມະໄລວອນ ສີປະເສີດ ໄດ້ຍົກໃຫ້ເຫັນເນື້ອໃນບາງຕອນທີ່ສຳຄັນວ່າ:  ກອງປະຊຸມໄດ້ຄົ້ນຄວ້າ ປຶກສາຫາລືບັນຫາສຳຄັນເປັນຕົ້ນ:  ຕີລາຄາການຊີ້ນຳໆພາການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI ຂອງພັກ ໄລຍະເຄິ່ງສະໄໝ, ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໄລຍະເຄິ່ງສະໄໝຕິດພັນກັບການປະຕິບັດສອງວາລະແຫ່ງຊາດ, ຮ່າງມະຕິວ່າດ້ວຍສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ, ສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະຮອບດ້ານໃນການນຳພາຂອງພັກ.
ພ້ອມນັ້ນ, ທ່ານກໍໄດ້ເຜີຍແຜ່ຄຳສັ່ງແນະນຳຂອງສູນກາງພັກວ່າດ້ວຍການເຊື່ອມຊຶມ ແລະຜັນຂະຫຍາຍຜົນສຳເລັດຂອງກອງປະຊຸມຄົບຄະນະກາງສະໄໝຂອງສູນກາງພັກ ສະໄໝທີ XI ຈຸດປະສົງກໍເພື່ອເຮັດໃຫ້ຄະນະພັກທຸກຂັ້ນ, ພະນັງານຫຼັກແຫຼ່ງ ແລະສະມາຊິກພັກ-ພະນັກງານ ໄດ້ຮັບຮູ້ ແລະເຂົ້າໃຈ, ເຊື່ອມຊຶມ, ກຳແໜ້ນຢ່າງເລິກເຊິ່ງ ແລະສາມາດນຳໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງໃນຂອບເຂດຄວາມຮັບຜິດຊອບຂອງຄະນະພັກແຕ່ລະຂັ້ນຢ່າງມີປະສິດທິຜົນສູງ.  ເຜີຍແຜ່ບົດຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ກາງສະໄໝຂອງຄະນະບໍລິຫານງານສູນກາງພັກ ສະໄໝທີ XI, ຕີລາຄາການຈັດຕັ້ງປະຕິບັດ ກາງສະໄໝແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ XI(2021-2025) ຕິດພັນກັບການຈັດຕັ້ງປະຕິບັດ2ວາລະແຫ່ງຊາດ ແລະທິດທາງທ້າຍສະໄໝ ຮອດປີ 2025, ບົດສໍາຫຼວດການນຳພາລວມໄລຍະກາງສະໄໝຂອງຄະນະບໍລິຫານງານສູນກາງພັກ, ບົດຄຳເຫັນສະຫຼຸບເປີດກວ້າງຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ.
ຂ່າວ-ພາບ: ທິດລານີ ໂຄດໂຍທາ.