 |
ທ່ານ ແສງເພັດ ຄໍາສຸກຖາວົງ ໄດ້ກ່າວວ່າ : ກອງປະຊຸມໃນຄັ້ງນີ້ກໍ່ເພື່ອເປັນການສະຫຼຸບຕີລາຄາຄືນວຽກງານຮອບດ້ານໃນຂົງເຂດແຮງງານ ແລະ ສະຫວັດດີການສັງຄົມໃນໄລຍະ 9 ເດືອນ ແລະ ວາງທິດທາງແຜນການ 3 ເດືອນທ້າຍປີ 2026 ພ້ອມທັງຍົກໃຫ້ເຫັນເຖິງຂໍ້ສະດວກ, ຂໍ້ຫຍຸ້ງຍາກ , ບົດຮຽນທີ່ຖອດຖອນໄດ້,ບັນຫາສິ່ງທ້າທາຍ ແລະ ທິດທາງຈຸດສຸມໃນຕໍ່ໜ້າ.
ທ່ານ ລັດທະນົງໄຊ ວົງແກ້ວ ຫົວໜ້າຫ້ອງການບໍລິຫານ ພະແນກແຮງງານ ແລະ ສະຫວັດດີການສັງຄົມແຂວງໄດ້ຜ່ານບົດສະຫຼຸບວຽກງານຮອບດ້ານໃນໄລຍະ 9 ເດືອນຜ່ານມາວ່າ : ຂະແໜງແຮງງານ ແລະ ສະຫວັດດີການສັງຄົມ ໄດ້ເອົາໃຈໃສ່ຕັ້ງໜ້າຈັດຕັ້ງແຜນພັດທະນາແຮງງານ ແລະ ສະຫວັດດີການສັງຄົມ 5 ປີ ຄັ້ງທີ V ( 2026-2030 ) ຕິດພັນກັບແຜນພັດທະນາເສດຖະກິດ-ສັງຄົມຂອງແຂວງຄັ້ງທີ X ( 2026-2030 ) ແລະ ແຜນພັດທະນາວຽກງານແຮງງານ ແລະ ສະຫວັດດີການສັງຄົມປະຈໍາປີ 2026 ຄຽງຄູ່ກັບການຈັດຕັ້ງປະຕິບັດວຽກງານ 2 ວາລະແຫ່ງຊາດ, ວຽກງານ 3 ສ້າງ, ມະຕິ, ຄໍາສັ່ງຂອງຂັ້ນເທິງ ເພື່ອແນ່ໃສ່ການພັດທະນາສີມືແຮງງານເພື່ອຍົກລະດັບສີມືແຮງງານໃຫ້ເທົ່າທຽມກັບບັນດາປະເທດໃກ້ຄຽງ, ການບໍລິການຈັດຫາງານໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ, ຄຸ້ມຄອງ ແລະ ປົກປ້ອງສິດຜົນປະໂຫຍດຂອງຜູ້ໃຊ້ແຮງງານ ແລະ ຜູ້ອອກແຮງງານ, ຄຸ້ມຄອງລະບົບປະກັນສັງຄົມໃຫ້ມີຄວາມເຂັ້ມແຂງ, ປະຕິບັດນະໂຍບາຍຕໍ່ຜູ້ທີ່ມີຜົນງານຮັບໃຊ້ການປະຕິວັດ, ຊ່ວຍເຫຼືອຜູ້ປະສົບໄພທໍາມະຊາດ ແລະ ຜູ້ດ້ອຍໂອກາດທາງສັງຄົມຢ່າງເໜາະສົມ ແລະ ການກວດກູ້ລະເບີດທີ່ບໍ່ທັນແຕກອອກຈາກເນື້ອທີ່ດີນທໍາການຜະລິດຂອງປະຊາຊົນໃຫ້ສາມາດນໍາໃຊ້ຢ່າງປອດໄພ.
ການຈັດຕັ້ງປະຕິບັດວຽກງານໃນໄລຍະ 9 ເດືອນຜ່ານມາແມ່ນໄດ້ຊີ້ໃຫ້ເຫັນເຖິງການຈັດຕັ້ງປະຕິບັດເປົ້າ ໝາຍ, ແຜນວຽກຈຸດສຸມ, ຄາດໝາຍ, ຕົວເລກຊີ້ວັດ ແລະ ວຽກງານຈຸດສຸມຈໍານວນໜຶ່ງເພື່ອເປັນກໍານົດໃຫ້ແກ່ການປະຕິບັດແຜນ 5 ປີ ພ້ອມທັງກໍານົດທິດທາງແຜນການ 3 ເດືອນທ້າຍປີ 2026 .
ໃນກອງປະຊຸມຍັງໄດ້ຮັບຟັງການປະກອບຄໍາເຫັນຈາກບັນດາຂະແໜງການປິ່ນອ້ອມຂອງພະແນກເພື່ອເປັນຂໍ້ມູນໃນການຈັດຕັ້ງປະຕິບັດໃນຕໍ່ໜ້າ ແລະ ໃຫ້ມີຄວາມຖືກຕ້ອງຊັດເຈນ .(ຂ່າວ:ແດງສະຫວັນ)
ຄໍາເຫັນ