ເຜີຍແຜ່ຄຳສັ່ງວ່າດ້ວຍການຈັດຕັ້ງປະຕິບັດນິຕິກຳຄຸ້ມຄອງເງິນຕາຕ່າງປະເທດ

ນະຄອນຫຼວງວຽງຈັນ ໄດ້ຈັດກອງປະຊຸມ  ເຜີຍແຜ່ຄຳສັ່ງວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດສະບັບເລກທີ 10/ນຍ, ລົງວັນທີ 14 ກໍລະກົດ 2023
ຄັ້ງວັນທີ 21 ກໍລະກົດ 2023, ໂດຍພາຍໃຕ້ການເປັນປະທານຂອງທ່ານ ພູວົງ ວົງຄໍາຊາວ ຮັກສາການ ເຈົ້າຄອງ ນະຄອນຫຼວງວຽງຈັນ ຊຶ່ງມີບັນດາພະນັກງານງານການນຳເມືອງ ,ພະແນກ ແລະ ອົງການທຽບເທົ່າເຂົ້າຮ່ວມ.
 ທ່ານ ພູວົງ ວົງຄໍາຊາວ ກ່າວວ່າ:  ສຳລັບວຽກງານໃນຂົງເຂດຄຸ້ມຄອງເງິນຕາຕ່າງປະເທດ ຖືວ່າມີຫຼາຍບັນຫາທີ່ທ້າທາຍຫຼາຍສົມຄວນ ເປັນຕົ້ນ ການນຳໃຊ້ເງິນຕາຕ່າງປະເທດຢູ່ພາຍໃນ, ການຄຸ້ມຄອງເງິນຕາຕ່າງປະເທດດ້ານການຄ້າ, ການລົງທຶນ, ໜີ້ສິນຕ່າງປະເທດ ແລະ ການບໍລິການເງິນຕາຕ່າງປະເທດທີ່ບໍ່ໄດ້ຮັບອະນຸຍາດ ຊຶ່ງທັງໝົດນີ້ ຖືເປັນບັນຫາທີ່ພວກເຮົາພວມປະເຊີນ ທີ່ຕ້ອງແກ້ໄຂຢ່າງຮີບດ່ວນ ແລະ ໃຫ້ທັນສະພາບການ.
 ໃນໄລຍະຜ່ານມາ ທະນາຄານ ແຫ່ງ ສປປ ລາວ(ທຫລ) ໄດ້ມີການຄົ້ນຄວ້າປັບປຸງກົນໄກໃນການຄຸ້ມຄອງເງິນຕາຕ່າງປະເທດ ຊຶ່ງໃນນັ້ນ ໄດ້ມີການປັບປຸງກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ ສຳເລັດໃນປີ 2022, ຫຼັງຈາກນັ້ນ ທຫລ ກໍ່ສຸ່ມໃສ່ຄົ້ນຄວ້າເພື່ອຜັນຂະຫຍາຍເປັນນີຕິກໍາລຸ່ມກົດໝາຍດັ່ງກ່າວ ເພື່ອເຮັດໃຫ້ການຈັດຕັ້ງປະຕິບັດກົດໝາຍມີປະສິດທິພາບຍິ່ງຂຶ້ນ, ຊຶ່ງປັດຈຸບັນພວມຢູ່ໃນຂັ້ນຕອນການຄົ້ນຄວ້າຮ່າງນິຕິກຳ 20 ສະບັບ. 
ຄຳສັ່ງວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ ສະບັບເລກທີ 10/ນຍ,   ລົງວັນທີ 14 ກໍລະກົດ 2023 ແມ່ນເປັນໜຶ່ງໃນນິຕິກໍາທີ່ຜັນຂະຫຍາຍກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ) ຊຶ່ງໄດ້ມີການກໍານົດລະອຽດຕໍ່ກັບທິດທາງການຈັດຕັ້ງປະຕິບັດວຽກງານຄຸ້ມອຄງເງິນຕາຕ່າງປະເທດຂອງບັນດາກະຊວງ,ອົງການ, ສັງຄົມ ໃຫ້ມີຄວາມເປັນເອກະພາບ ເພື່ອຮັບປະກັນໃຫ້ການເຄື່ອນໄຫວເງິນຕາຕ່າງປະເທດສອດຄ່ອງຕາມກົດໝາຍ ແລະ ລະບຽບການກ່ຽວຂ້ອງ. 
    ຢູ່ນະຄອນຫຼວງວຽງຈັນ ໃນປັດຈຸບັນນີ ກຳລັງຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ IX ກາງສະໄໝ ພ້ອມທັງກຳລັງ ຂຸ້ນຂ້ຽວຈັດຕັ້ງປະຕິບັດການເກັບລາຍຮັບທ້າຍປີງົບປະມານ ປີ 2023 ຊຶ່ງໃນປີນີ້ນະຄອນຫຼວງວຽງຈັນ ພວກເຮົາຄາດຄະເນຈະເກັບລາຍຮັບໃຫ້ບັນລຸ 7.431 ຕື້ກີບ ເທົ່າກັບ 127,78% ຂອງແຜນການປີ, ຄາດຄະເນເປັນເງິນລື່ນແຜນ 1.615,43 ຕື້ກີບ ໃນນັ້ນ: ລາຍຮັບພູດສູນກາງ (ພາສີ ) : ຄາດຄະເນສູ້ຊົນປະຕິບັດໝົດປີ 2023 ໃຫ້ໄດ້ 5.295,30 ຕື້ກີບ ເທົ່າກັບ 126,08%, ຄາດຄະເນເປັນເງິນລື່ນ 1.095 ຕື້ກີບ; ລາຍຮັບທ້ອງຖິ່ນ ນວ: ຄາດຄະເນ ສູ້ຊົນປະຕິບັດໝົດປີ 2023 ໃຫ້ໄດ້ 2.136 ຕື້ກີບ ເທົ່າກັບ 132,19% ຂອງແຜນການປີ, ຄາດຄະ ເນເປັນເງິນລື່ນແຜນ 520,13 ຕື້ກີບ.
ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ ທຫລ 
ໄດ້ເນັ້ນໜັກໃຫ້ຂະແໜງການທະນາຄານ ແລະ ທົ່ວສັງຄົມເອົາໃຈໃສ່ວຽກງານຄຸ້ມຄອງເງິນຕາຕ່າງປະເທດເປັນວຽກງານໜຶ່ງທີ່ມີຄວາມສຳຄັນຈຳເປັນຮີບດ່ວນ ແລະ ໃຫ້ປະຕິບັດຕາມກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດເພື່ອນຳໄປຜັນຂະຫຍາຍ ແລະ ຈັດຕັ້ງປະຕິບັດເຂົ້າໃນວຽກງານຂອງຕົນໃຫ້ປະກົດຜົນເປັນຈິງ , ທຸກພາກສ່ວນທີ່ເຂົ້າຮ່ວມກອງປະຊຸມຄັ້ງນີ້ຕ້ອງຊ່ວຍນຳເອົາເນື້ອໃນຈິດໃຈຂອງນິຕິກຳຄຸ້ມຄອງເງິນຕາຕ່າງປະເທດໄປເຜີຍແຜ່ ແລະ ໂຄສະນາ ເພື່ອເປັນການລະດົມໃຫ້ທົ່ວສັງຄົມນໍາເອົາເງິນຕາຕ່າງປະເທດຝາກໄວ້ກັບທະນາຄານ ແລະ ຕິດຕາມກວດກາທຸລະກໍາ ການເຄື່ອນໄຫວເງິນຕາຕ່າງປະເທດໃຫ້ສອດຄ່ອງຕາມກົດໝາຍ ແລະ ລະບຽບການກ່ຽວຂ້ອງ ແລະ ໃຫ້ປະຕິບັດຕາມກົດໝາຍ ແລະ ຄຳສັ່ງສະບັບດັ່ງກ່າວນີ້ຢ່າງເຂັ້ມງວດ. ຂ່າວ:ຕຸໄລເພັດ