ເຜີຍແຜ່ນິຕິກຳຄຸ້ມຄອງໂຮງງານ ແລະ ການນຳໃຊ້ຂໍ້ມູນໂຮງານອຸດສາຫະກຳປຸງແຕ່ງຢູ່ແຂວງອຸດົມໄຊ

ກອງປະຊຸມເຜີຍແຜ່ນິຕິກຳກ່ຽວກັບການຄຸ້ມຄອງໂຮງງານ ແລະ ການນຳໃຊ້ຂໍ້ມູນໂຮງງານອຸດສາຫະກຳປຸງແຕ່ງຢູ່ແຂວງອຸດົມໄຊໄດ້ຈັດຂຶ້ນໃນວັນທີ27 ຕຸລານີ້ທີ່ຫ້ອງປະຊຸມພະແນກອຸສາຫະກຳ ແລະ ການຄ້າແຂວງອຸດົມໄຊ ໂດຍມີ ທ່ານ ນາງ ໄມພອນ ສິລິວົງ ຫົວໜ້າພະແນກອຸດສາຫະກຳ ແລະ ການຄ້າ ແຂວງອຸດົມໄຊ, ມີທ່ານ ສະຫວາດ ຂຸນດາວົງ ຮອງຫົວໜ້າກົມ ອຸດສາຫະກຳ ກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະ, ແຂກເຊີນຈາກບັນດາໂຮງຈັກໂຮງງານ ຜູ້ປະກອບການທຸລະກິດດ້ານການປຸງແຕ່ງ, ຫົວຫນ້າຫ້ອງການອຸດສາຫະກຳ ແລະ ການຄ້າເມືອງ 7 ເມືອງ, ພະແນກການກ່ຽວຂ້ອງເຂົ້າຮ່ວມ.
ກອງປະຊຸມໄດ້ຜ່ານຂໍ້ຕົກລົງ ກຳນົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງການສ້າງຕັ້ງ ແລະ ດຳເນີນກິດຈະການໂຮງງານ ເພື່ອໃຫ້ຖືກຕ້ອງຕາມມາດຕະຖານເຕັກນິກໂຮງງານ ແນໃສ່ຮັບປະກັນໃຫ້ການຜະລິດໄດ້ມາດຕະຖານ, ຜະລິດຕະພັນມີຄຸນນະພາບ, ຮັບປະກັນຄວາມປອດໄພ ແລະ ສຸຂານາໄມ ຂອງຜູ້ ອອກແຮງງານ ແລະ ປົກປັກຮັກສາສິ່ງແວດລ້ອມ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຕາມທິດຫັນເປັນອຸດສາຫະກໍາທັນສະໄໝ, ສີຂຽວ ແລະ ຍືນຍົງ.ຊຶ່ງນິຕິກຳສະບັບນີ້ ລວມມີ VII ພາກ, 67 ມາດຕາ, ພ້ອມນີ້ ຍັງໄດ້ຮັບຟັງການລາຍງານສະພາບການຄຸ້ມຄອງໂຄງງານໃນໄລຍະຜ່ານມາ, ຜ່ານຂໍ້ຕົກລົງວ່າດ້ວຍການຄຸ້ມຄອງໂຮງງານເລກທີ 0166/ອຄ, ຄຳແນະນຳຂໍ້ຕົກລົງວ່າດ້ວຍໂຮງງານ ເລກທີ 01381/ກອຫ.ຄຮ ຂໍ້ຕົກລົງວ່າດ້ວຍມາດຕະການປັບປຸງໃໝ່ ຕໍ່ຜູ້ລະເມີດລະບຽບການດຳເນີນກິດຈະການໂຮງງານ,ຂໍ້ຕົກລົງວ່າດ້ວຍການຮັບຮອງເອົາບັນຊີກິດຈະກຳໂຮງງານອຸດສະຫະກຳປຸງແຕ່ງໃນຕໍ່ໜ້າ. 
(ຂ່າວ-ພາບ: ແສງອາທິດ)