 |
ທ່ານ ນາງ ດາລານີ ພົມມະວົງສາກ່າວວ່າ: ຈຸດສໍາຄັນໃນການເຜີຍແຜ່ນິຕິກຳທີ່ກ່ຽວຂ້ອງຂອງກະຊວງ ວທ ແລະ ກະຊງ ກສ ໃຫ້ບັນດາພະນັກງານ, ຂະແໜງການ, ອົງການປົກຄອງຂັ້ນສູນກາງ, ທ້ອງຖິ່ນ, ຜູ້ປະກອບການ ແລະ ພາກສ່ວນອື່ນໆ ໄດ້ຮັບຮູ້, ເຂົ້າໃຈຢ່າງຖືກຕ້ອງ ແລະ ສາມາດນໍາໄປປະຕິບັດໄດ້ຈິງ.ໃນນັ້ນ,ການເຜີຍແຜ່ຄັ້ງນີ້ ບໍ່ຄວນຈຳກັດຢູ່ພຽງແຕ່ການອ່ານ ຫຼື ຮັບຟັງເນື້ອໃນຂອງນິຕິກຳເທົ່ານັ້ນ ແຕ່ຄວນເອົາໃຈໃສ່ ໃຫ້ເຫັນວ່າ: ໃນການດໍາເນີນທຸລະກິດນໍາທ່ຽວ, ການຈັດລາຍການນໍາທ່ຽວ, ຫົວໜ້າຄະນະນໍາພານັກທ່ອງທ່ຽວເຂົ້າ ໄປສູ່ສະຖານທີ່ທ່ອງທ່ຽວທຳມະຊາດ, ວັດທະນະທຳ ຫຼື ພື້ນທີ່ທີ່ມີສັດປ່ານັ້ນ ສິ່ງໃດທີ່ຄວນເຮັດແລະ ຕ້ອງຂໍອະນຸຍາດ ຫຼື ປະສານງານກັບພາກສ່ວນກ່ຽວຂ້ອງ. ພ້ອມນີ້ ຂໍໃຫ້ເອົາໃຈໃສ່ສ້າງຄວາມເຂົ້າໃຈແກ່ຜູ້ປະກອບການທຸລະກິດການທ່ອງທ່ຽວ ແລະ ນັກທ່ອງທ່ຽວ ໃຫ້ເຫັນເຖິງຄຸນຄ່າຂອງສັດປ່າ ແລະ ຊັບພະຍາກອນທຳມະຊາດ. ການທ່ອງທ່ຽວຄວນເປັນກົນໄກສ້າງລາຍຮັບ ແລະ ສ້າງວຽກເຮັດງານທໍາ ຄວບຄູ່ກັບການອະນຸລັກທຳມະຊາດ, ຊີວະນາໆພັນ ແລະ ປົກປັກຮັກສາຊັບພະຍາກອນໃຫ້ມີຄວາມຍືນຍົງ.
 |
ທ່ານກ່າວຕື່ມວ່າ: ໃຫ້ກອງປະຊຸມຄັ້ງນີ້ເປັນເວທີໃນການແລກປ່ຽນບັນຫາ, ອຸປະສັກ, ບົດຮຽນ ແລະ ສະເໜີມາດຕະການທີ່ເປັນຮູບປະທຳ. ໂດຍສະເພາະຄວນກຳນົດແນວທາງຮ່ວມກັນໃນການປ້ອງກັນ ແລະ ແກ້ໄຂບັນຫາ ການສວຍໃຊ້ສັດປ່າຫວງຫ້າມເພື່ອການທ່ອງທ່ຽວ, ການດໍາເນີນທຸລະກິດທີ່ບໍ່ໂປ່ງໃສ ແລະ ພຶດຕິກຳອື່ນໆ ທີ່ອາດກະທົບຕໍ່ພາບພົດ ແລະ ຄວາມຍືນຍົງຂອງການທ່ອງທ່ຽວລາວ ແລະ ພ້ອມກັນປະກອບຄຳຄິດຄຳເຫັນ,ແລກປ່ຽນບົດຮຽນຊຶ່ງກັນ ແລະ ກັນຊອກຫາມາດຕະການທີ່ເໝາະສົມ ເພື່ອໃຫ້ນິຕິກຳທີ່ມີຢູ່ສາມາດນໍາໃຊ້ໄດ້ຢ່າງມີປະສິດທິພາບ.
(ຂ່າວ:ສຳນານ)
ຄໍາເຫັນ