 |
ທ່ານ ນາງ ພອນວັນ ອຸທະວົງ ໄດ້ລາຍງານໂດຍຕໍ່ກອງປະຊຸມວ່າ: ກອງປະຊຸມຄັ້ງທີ 48 ຄະນະກຳມະການຮ່ວມມືທະວີພາຄີ ລາວ-ຫວຽດນາມ ສອງຝ່າຍໄດ້ສຸມໃສ່ທົບທວນ, ຕີລາຄາສູງຕໍ່ໝາກຜົນຂອງການຈັດຕັ້ງປະຕິບັດຂໍ້ຕົກລົງຕ່າງໆ ແລະ ການຮ່ວມມືສອງຝ່າຍ ລາວ-ຫວຽດນາມ ຕະຫຼອດໄລຍະ 2021-2025, ບົດບັນທຶກກອງປະຊຸມຄັ້ງທີ 47 ແລະ ຂໍ້ຕົກລົງ ວ່າດ້ວຍແຜນການຮ່ວມມື ປະຈຳປີ 2025, ອັນພົ້ນເດັ່ນແມ່ນສອງຝ່າຍ ໄດ້ປຶກສາຫາລືແຜນການຮ່ວມມື ປະຈຳປີ 2026 ແລະ ແຜນການຮ່ວມມືໄລຍະ 2026-2030 ໃຫ້ມີການປ່ຽນແປງໄປສູ່ອັນໃໝ່, ມີຄຸນນະພາບໃໝ່, ມີຈຸດສຸຸມ, ມີຮຈຸດໃຈກາງ ແລະ ມີປະສິດທິຜົນສູງ ຕາມຈິດໃຈຊີ້ນຳຂອງສອງກົມການເມືອງ ທີ່ໄດ້ຕົກລົງກັນໃນວັນທີ 2 ທັນວາ 2025 ໃຫ້ເປັນອັນລະອຽດ ແລະ ປະກົດຜົນເປັນຈິງ ນຳເອົາຜົນປະໂຫຍດມາສູ່ປະຊາຊົນສອງປະເທດ.
ດ້ານການຄ້າ; ມູນຄ່າການຄ້າ ລາວ-ຫວຽດນາມ ມີທ່າອ່ຽງເພີ່ມຂຶ້ນໃນແຕ່ລະປີ, ປີ 2025 ສາມາດບັນລຸໄດ້ປະມານ 3 ຕື້ໂດລາ ແລະ ດ້ານການລົງທຶນ ມາຮອດປັດຈຸບັນ,ລັດວິສາຫະກິດຫວຽດນາມເຂົ້າມາລົງທຶນຢູ່ ລາວ ມີ 276 ໂຄງການ, ມູນຄ່າທຶນຈົດທະບຽນທັງໝົດ 6.21 ຕື້ໂດລາ ເປັນອັນດັບ 1 ໃນຈຳນວນ 85 ປະເທດ ຂອງພາກພື້ນ ທີ່ຫວຽດນາມລົງທຶນຢູ່ຕ່າງປະເທດ ຊຶ່ງໃນນັ້ນຫຼາຍໂຄງການລົງທຶນຂອງລັດວິສາຫະກິດຫວຽດນາມຢູ່ລາວເຄື່ອນໄຫວມີປະສິດທິຜົນ ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ, ສ້າງວຽກເຮັດງານທຳ ແລະ ເພີ່ມລາຍຮັບໃຫ້ແກ່ແຮງງານຫຼາຍພັນຄົນ, ສ້າງແຫຼ່ງລາຍຮັບໃຫ້ແກ່ງົບປະມານແຫ່ງລັດຂອງລາວ, ເປັນຕົ້ນແມ່ນຂົງເຂດລາວໂທລະຄົມ, ທະນາຄານ, ປູກຝັງ ແລະ ປຸງແຕ່ງຢາງພາລາ, ຜະລິດ-ປຸງແຕ່ງທັນຍາຫານ, ສະບຽງອາຫານ, ນົມ ແລະ ອື່ນໆ. ສ່ວນໃຫຍ່ແມ່ນສຸມໃສ່ໂຄງການທີ່ມີຄຸນນະພາບ ພັດທະນາແບບຍືນຍົງ, ຂະແໜງການຫຼັກທີ່ ສປປ ລາວ ມີທ່າແຮງຄື: ພະລັງງານສະອາດ, ຂຸດຄົ້ນແຮ່ທາດ ແລະ ກະສິກຳ. ນອກນັ້ນ, ສອງຝ່າຍໄດ້ພະຍາຍາມ ເປັນເຈົ້າການຮ່ວມກັນເພື່ອຊອກຫາກົນໄກ, ທາງອອກ ໃນການຊຸກຍູ້ການຮ່ວມມື-ລົງທຶນຂອງສອງປະເທດ ໃຫ້ມີຄວາມສະດວກ ຄ່ອງຕົວຫຼາຍຂຶ້ນ. ອັນພົ້ນເດັ່ນແມ່ນການລົງທຶນໃນຂົງເຂດພະລັງງານລົມເປັນຕົ້ນພະລັງງານລົມເຈື່ອງເຊີນ, ໂຄງການພະລັງງານລົມ ສະ ຫວັນ 1 ໄດ້ຮັບການຊຸກຍູ້ຈັດຕັ້ງປະຕິບັດໄດ້ເປັນຢ່າງດີ.
 |
ໃນໂອກາດດັ່ວກ່າວ, ທ່ານ ສະເຫຼີມໄຊ ກົມມະສິດ ໄດ້ໂອ້ລົມສະແດງຄວາມຍ້ອງຍໍຊົມເຊີຍຕໍ່ຄະນະກຳມະການຮ່ວມມື ລາວ-ຫວຽດນາມ ທີ່ໄດ້ຈັດຕັ້ງປະຕິບັດໜ້າທີ່ຄວາມຮັບຜິດຊອບຂອງຕົນມີຜົນສຳເລັດເປັນຢ່າງດີ, ແຕ່ເພື່ອຮັບປະກັນໃຫ້ການຈັດຕັ້ງປະຕິບັດຕໍ່ໜ້າໃຫ້ໄດ້ຮັບຜົນດີກວ່າເກົ່າ ຈຶ່ງມີບາງຄຳເຫັນຈະຕ້ອງໄດ້ສືບຕໍ່ເອົາໃຈໃສ່ຊຸກຍູ້ ເພື່ອຈັດຕັ້ງປະຕິບັດແຜນການຮ່ວມມືຂອງສອງລັດຖະບານ ກໍຄືທິດຊີ້ນໍາຂອງການນໍາຂັ້ນສູງສອງປະເທດ ເພື່ອໃຫ້ບັນລຸຈຸດປະສົງລະດັບຄາດໝາຍດັ່ງນີ້. ໜຶ່ງ: ໃຫ້ສືບຕໍ່ຊຸກຍູ້ສາຍພົວພັນດ້ານການເມືອງໃຫ້ເຂົ້າສູ່ລວງເລິກ ແລະ ບັນລຸປະສິດທິຜົນສູງກວ່າເກົ່າ; ຮັກສາກົນໄກການແລກປ່ຽນ ແລະ ການພົບປະຂັ້ນສູງລະຫວ່າງສອງພັກ, ສອງລັດ ໃຫ້ມີຄວາມເປັນປົກກະຕິ ແລະ ມີປະສິດທິຜົນ; ເພີ່ມທະວີການແລກປ່ຽນທິດສະດີ ແລະ ພຶດຕິກຳຕົວຈິງ, ຂໍ້ມູນຂ່າວສານ, ແລກປ່ຽນບົດຮຽນກ່ຽວກັບວຽກງານກໍ່ສ້າງພັກ ແລະ ກໍ່ສ້າງລະບົບການເມືອງ; ພ້ອມກັນນັ້ນ ກໍປະສານສົມທົບກັນຜັນຂະຫຍາຍບັນດາຂໍ້ລິເລີ່ມທີ່ເປັນບາດກ້າວບຸກທະລຸໃນການພັດທະນາເສດຖະກິດ-ສັງຄົມ, ສ້າງສະຖຽນລະພາບດ້ານເສດຖະກິດມະຫາພາກ, ການເຊື່ອມໂຍງສາກົນ ແລະ ບັນດາບັນຫາໃໝ່ທີ່ກອງປະຊຸມໃຫຍ່ຂອງສອງພັກວາງອອກ, ສອງ: ໃຫ້ສືບຕໍ່ເພີ່ມທະວີການ ຮ່ວມມື ແລະ ປະສານສົມທົບຢ່າງແໜ້ນແຟ້ນ ເພື່ອຈັດຕັ້ງປະຕິບັດອະນຸສັນຍາ ແລະ ແຜນການຮ່ວມມື ປະຈຳປີ ລະຫວ່າງ ສອງກະຊວງປ້ອງກັນປະເທດ ແລະ ສອງກະຊວງປ້ອງກັນຄວາມສະຫງົບ ໃຫ້ມີປະສິດທິຜົນ; ປະສານສົມທົບໃນການຄຸ້ມຄອງ ແລະ ປົກປັກຮັກສາເສັ້ນຊາຍແດນໃຫ້ມີສັນຕິພາບ, ສະຖຽນລະພາບ ແລະ ມິດຕະພາບ; ສະກັດກັ້ນ ແລະ ຕ້ານບັນດາອາຊະຍາກຳຂ້າມຊາດ ແລະ ສິ່ງທ້າທາຍດ້ານຄວາມສະຫງົບ ຮູບແບບໃໝ່ ເພື່ອສ້າງພື້ນຖານອັນໜັກແໜ້ນໃຫ້ແກ່ສະພາບແວດລ້ອມແຫ່ງສັນຕິພາບ, ສະຖຽນລະພາບ ແລະ ການພັດທະນາແບບຍືນຍົງຂອງແຕ່ລະປະເທດ, ສາມ: ກ່ຽວກັບການຮ່ວມມືດ້ານເສດຖະກິດ, ຕ້ອງສຸມໃສ່ສ້າງບາດກ້າວຫັນປ່ຽນຢ່າງແຂງແຮງ, ມີລັກສະນະບຸກທະລຸຍຸດທະສາດ ໃນການຮ່ວມມືດ້ານເສດຖະກິດ, ການຄ້າ, ການລົງທຶນ ແລະ ການພັດທະນາພື້ນຖານໂຄງລ່າງ, ເຮັດໃຫ້ຂົງເຂດນີ້ກາຍເປັນເສົາຄໍ້າ ຫຸ້ນສ່ວນຍຸດທະສາດ, ໃຫ້ສົມກັບລະດັບຄວາມສໍາຄັນຂອງສາຍພົວພັນພິເສດ ລາວ-ຫວຽດນາມ. ຈຸດສຸມແມ່ນການເພີ່ມທະວີການເຊື່ອມຈອດ ລະຫວ່າງສອງພື້ນຖານເສດຖະກິດ ທາງດ້ານສະຖາບັນ, ພື້ນຖານໂຄງລ່າງຄົມມະນາຄົມ, ພະລັງງານ ແລະ ໂລຈິສຕິກ, ໂທລະຄົມມະນາຄົມ, ການທ່ອງທ່ຽວ ແລະ ອື່ນໆ, ສີ: ສືບຕໍ່ໃຫ້ເອົາໃຈໃສ່ປະຕິບັດບັນດາມາດຕະການຍົກສູງຄຸນນະພາບການຮ່ວມມືດ້ານການສຶກສາ-ບຳລຸງສ້າງ, ພັດທະນາຊັບພະຍາກອນມະນຸດ, ເພີ່ມທະວີການແລກປ່ຽນວັດທະນະທໍາ ແລະ ການພົບປະແລກປ່ຽນ ລະຫວ່າງປະຊາຊົນ, ໂດຍສະເພາະແມ່ນຄົນຮຸ່ນໜຸ່ມ, ເພື່ອຮັບປະກັນການສືບທອດຢ່າງຕໍ່ເນື່ອງ ແລະ ຍືນຍົງ ຂອງສາຍພົວພັນສອງປະເທດຜ່ານຫຼາຍເຊັ່ນຄົນ, ຫ້າ: ກ່ຽວກັບບັນດາແຜນງານ ແລະ ໂຄງການຮ່ວມມືລະອຽດ ແມ່ນໃຫ້ແຕ່ກະຊວງ, ອົງການ, ຂະແໜງການ ແລະ ທ້ອງຖິ່ນ ກວດກາຄືນປະສິດທິຜົນຂອງການຜັນຂະຫຍາຍບັນດາຂໍ້ຕົກລົງຂັ້ນສູງ, ສັນຍາການຮ່ວມມືສອງຝ່າຍທີ່ໄດ້ລົງນາມຮ່ວມກັນ; ພ້ອມນີ້ ໃຫ້ຄະນະກຳມະການຮ່ວມມື ລາວ-ຫວຽດນາມ ເປັນເຈົ້າການກຳນົດ ແລະ ຊຸກຍູ້ບັນດາໂຄງການຈຸດສຸມ ທີ່ເປັນສັນຍາລັກແຫ່ງສາຍພົວພັນ ຂອງສອງປະເທດ, ເພື່ອແນໃສ່ຫັນປ່ຽນຄໍາໝັ້ນສັນຍາທາງດ້ານການເມືອງໃຫ້ກາຍເປັນໝາກຜົນແຫ່ງການຮ່ວມມືທີ່ແທດຕົວຈິງ, ມີປະສິດທິຜົນ ແລະ ນໍາເອົາຜົນປະໂຫຍດໂດຍກົງມາສູ່ປະຊາຊົນສອງຊາດ ແນໃສ່ປະກອບສ່ວນເຮັດໃຫ້ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລະຫວ່າງສອງປະເທດ ນັບມື້ນັບແຕກດອກອອກຜົນ, ໝັ້ນຄົງຂະໜົງແກ່ນ ຕະຫຼອດກາລະນານ, ຫົກ: ສໍາລັບບັນດາໜ້າວຽກ, ແຕ່ລະບັນຫາທີ່ລັດຖະບານ ໄດ້ຊີ້ນໍາໄປແລ້ວ ຕາມແຈ້ງການ 100/ຫສນຍ ນັ້ນ ກໍຂໍໃຫ້ແຕ່ລະພາກສ່ວນສືບຕໍ່ຈັດຕັ້ງປະຕິບັດຕາມພາລະບົດບາດ - ຄວາມຮັບຜິດຊອບຂອງຕົນເອງ ແລະ ລາຍງານຄວາມຄືບໜ້າໃຫ້ລັດຖະບານຊາບ ແລະ ມີທິດຊີ້ນໍາ ໂດຍຜ່ານຄະນະກຳມະການຮ່ວມມື ລາວ-ຫວຽດນາມ ຢ່າງເປັນປົກກະຕິ; ພ້ອມນີ້, ອີກເທື່ອໜຶ່ງ, ສະເໜີໃຫ້ບັນດາການນໍາຂອງແຕ່ລະກະຊວງ, ອົງການ, ຂະແໜງການ ແລະ ທ້ອງຖິ່ນ ເອົາໃຈໃສ່ຍົກສູງຄວາມເປັນເຈົ້າການ ໃນການຈັດຕັ້ງ ເຜີຍແຜ່ ເຊື່ອມຊຶມເນື້ອໃນຈິດໃຈ ການພົວພັນຮ່ວມມື ລາວ-ຫວຽດນາມ ໃນສະພາບການອັນໃໝ່ ໂດຍສະເພາະແມ່ນສັນຍາຮ່ວມມື 2026-2030 ແລະ ຂໍ້ຕົກລົງແຜນການຮ່ວມມື ລະຫວ່າງ ລາວ-ຫວຽດນາມ ປະຈຳປີ 2026 ໃຫ້ພະນັກງານທຸກເປົ້າໝາຍ ທີ່ນອນຢູ່ໃນຄວາມຮັບຜິດຊອບຂອງຕົນ ໃຫ້ມີຄວາມ ເຂົ້າໃຈເລິກເຊິ່ງ, ກຳແໜ້ນເນື້ອໃນຈິດໃຈແນວທາງ-ນະໂຍບາຍ ທີ່ຂັ້ນເທິງຂອງສອງປະເທດໄດ້ຕົກລົງກັນແລ້ວຢ່າງທົ່ວເຖິງ.
(ຂ່າວ-ພາບ: ຕຸໄລເພັດ)
ຄໍາເຫັນ