ເຜີຍແຜ່ວຽກງານການຄຸ້ມຄອງວິທະຍາສາດ, ເຕັກໂນໂລຊີ ແລະ ນະວັດຕະກຳ

ກອງປະຊຸມຄັ້ງນີ້, ຈັດຂຶ້ນເພື່ອເຜີຍແຜ່ຂໍ້ມູນນິຕິກຳ ທີ່ກ່ຽວຂ້ອງກັບວຽກງານຄຸ້ມຄອງວິທະຍາສາດເປັນຕົ້ນ ແຜນຍຸດທະສາດ, ກົດໝາຍ ແລະ ລະບຽບການຕ່າງໆ ໃຫ້ພະນັກງານກະຊວງ ສສກ ແລະ ຂະແໜງການທີ່ກ່ຽວຂ້ອງອ້ອມຂ້າງກະຊວງ ແລະ ນັກສຶກສາ ມຊ ເພື່ອເປັນການແລກປ່ຽນຄວາມຮູ້-ຄວາມເຂົ້າໃຈ ແລະ ປະສົບການ ດ້ານວຽກງານວິທະຍາສາດ, ເຕັກໂນໂລຊີ ແລະ ນະວັດຕະກໍາ, ເພື່ອເປັນການພັດທະນາບຸກຄະລາກອນ ສົ່ງເສີມທັກສະ, ຄວາມຮູ້ຄວາມສາມາດ ແລະ ສ້າງແຮງບັນດານໃຈໃຫ້ນັກຄົ້ນຄວ້າວິທະຍາສາດ, ນັກສຶກສາ ແລະ ສັງຄົມທົ່ວໄປໃນໄລຍະໃໝ່.

ທ່ານ ກິ່ງມະໂນ ພົມມະຫາໄຊ ກ່າວວ່າ: ປັດຈຸບັນ, ພັກ ແລະ ລັດຖະບານໄດ້ເອົາໃຈໃສ່ຕໍ່ການສົ່ງເສີມວຽກງານວິທະຍາສາດ, ເຕັກໂນໂລຊີ ແລະ ນະວັດຕະກຳ ສະແດງອອກໃຫ້ເຫັນໃນແນວທາງນະໂຍບາຍຂອງພັກ, ແຜນຍຸດທະສາດ, ບັນດາກົດໝາຍ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ທີ່ພວມເລັງໃສ່ການພັດທະນາຊັບພະຍາກອນມະນຸດ ແລະ ການສ້າງພື້ນຖານໂຄງລ່າງ ສໍາລັບການຄົ້ນຄວ້າ-ພັດທະນາ ແລະ ນໍາໃຊ້ຄວາມກ້າວໜ້າທາງວິທະຍາສາດ, ເຕັກໂນໂລຊີ ແລະ ນະວັດຕະກຳ. ສຳລັບສິ່ງທີ່ພົ້ນເດັ່ນທີ່ສຸດ ກໍແມ່ນການເຊື່ອມສານວຽກງານວິທະຍາສາດ, ເຕັກໂນໂລຊີ ແລະ ນະວັດຕະກຳ ເຂົ້າກັບຂະແໜງການທີ່ກ່ຽວຂ້ອງ ເພື່ອການພັດທະນາຂະແໜງການດັ່ງກ່າວໃຫ້ມີຄວາມເຂັ້ມແຂງຂຶ້ນກວ່າເກົ່າ ເປັນຕົ້ນຂະແໜງການສຶກສາ, ວິທະຍາສາດ ແລະ ກິລາ, ຂະແໜງເຕັກໂນໂລຊີ ແລະ ການສື່ສານ, ຂະແໜງອຸດສາຫະກຳ ແລະ ການຄ້າ ແລະ ຂະແໜງການອື່ນໆອີກຈໍານວນໜຶ່ງ. ຮຽກຮ້ອງມາຍັງຂະແໜງການທີ່ກ່ຽວຂ້ອງ ແລະ ສະຖາບັນການສຶກສາ ຈົ່ງພ້ອມກັນເພີ່ມທະວີຄວາມເອົາໃຈໃສ່ ໃນການຄົ້ນຄວ້າ-ພັດທະນາ ວິທະຍາສາດຂອງປະເທດເຮົາ ແລະ ຜັນຂະຫຍາຍຈັດຕັ້ງປະຕິບັດຍຸດທະສາດ ແລະ ແຜນພັດທະນາວິທະຍາສາດ ເຕັກໂນໂລຊີ ແລະ ນະວັດຕະກຳແຫ່ງຊາດ 2026-2040 ເພື່ອຮັບໃຊ້ສັງຄົມ, ຕອບສະໜອງຕໍ່ການຂະຫຍາຍຕົວຂອງເສດຖະກິດ ແລະ ເປັນເຈົ້າການຢ່າງຕັ້ງໜ້າ ໃນຂະບວນການພັດທະນາປະເທດຊາດ ເພື່ອຫຼຸດພົ້ນອອກຈາກການເປັນປະເທດດ້ອຍພັດທະນາ.

ໃນພິທີ, ໄດ້ຮັບຟັງການລາຍງານກ່ຽວກັບວຽກງານການຄຸ້ມຄອງ ແລະ ສົ່ງເສີມວຽກງານວິທະຍາສາດ, ເຕັກໂນໂລຊີ ແລະ ນະວັດຕະກຳ ຊຶ່ງລວມມີ 7 ຫົວຂໍ້ຄື: ສະພາບລວມກ່ຽວກັບການຈັດຕັ້ງເຄື່ອນໄຫວວຽກງານວິທະຍາສາດ, ການຄຸ້ມຄອງລັດ ວຽກງານລັງສີ-ນິວເຄລຍຢູ່ ສປປ ລາວ, ການຄຸ້ມຄອງເຕັກໂນໂລຊີ ແລະ ນະວັັດຕະກຳຢູ່ ສປປ ລາວ, ສະພາບການຄົ້ນຄວ້າວິທະຍາສາດ ແລະ ນະວັດຕະກຳ, ການຄຸ້ມຄອງກອງທຶນພັດທະນາວິທະຍາສາດ ແລະ ເຕັກໂນໂລຊີ ແລະ ການສະໜັບສະໜູນທຶນສ້າງຄວາມເຂັ້ມແຂງດ້ານວິທະຍາສາດ ເຕັກໂນໂລຊີ ແລະ ນະວັດຕະກຳ, ຄົ້ນຄວ້າວິທະຍາສາດ ແລະ ບໍລິການວິຊາການຢູ່ ມຊ, ວຽກງານສິດທິບັດ ແລະ ອະນຸສິດບັດຢູ່ ສປປ ລາວ. ພ້ອມນັ້ນ, ຍັງໄດ້ມີການແລກປ່ຽນຄໍາຄິດຄໍາເຫັນ ແລະ ປະສົບການດ້ານຕ່າງໆຈາກ 6 ພາກສ່ວນ ທັງພາຍໃນກະຊວງ ແລະ ຂະແໜງການທີ່ກ່ຽວຂ້ອງອ້ອມຂ້າງ ຊຶ່ງປະກອບມີ ກົມຄຸ້ມຄອງວິທະຍາສາດ, ຫ້ອງການສະພາວິທະຍາສາດແຫ່ງຊາດ, ສະຖາບັນຄົ້ນຄວ້າວິທະຍາສາດ ແລະ ນະວັດຕະກຳ, ມຊ, ກົມເຕັກໂນໂລຊີ ແລະ ນະວັດຕະກຳ ແລະ ກົມຊັບສິນທາງປັນຍາ.

ຂ່າວ: ການຈະນາ ວົງປັນຍາ