ພິທີປະກາດການຈັດຕັ້ງຄະນະກຳມະການສົ່ງເສີມແລະຄຸ້ມຄອງການລົງທຶນ

ໃນພິທີ,ທ່ານສຸລິຍາພົມມີສິດວ່າການແທນຫົວໜ້າກົມຄຸ້ມຄອງພະນັກງານຄະນະຈັດຕັ້ງສູນກາງພັກໄດ້ຂຶ້ນຜ່ານດໍາລັດເລກທີ322/ນຍລົງວັນທີ17/6/2025ວ່າດ້ວຍການສ້າງຕັ້ງຄະນະກຳມະການສົ່ງເສີມແລະຄຸ້ມຄອງການລົງທຶນ, ຜ່ານມະຕິຕົກລົງເລກທີ323/ນຍລົງວັນທີ17/6/2025ວ່າດ້ວຍການແຕ່ງຕັ້ງຮອງລັດຖະມົນຕີ, ຮອງປະທານຄະນະກໍາມະການສົ່ງເສີມແລະຄຸ້ມຄອງການລົງທຶນ, ທັງເປັນຜູ້ປະຈໍາການໂດຍແຕ່ງຕັ້ງທ່ານບຸນເຖິງດວງສະຫວັນຮອງລັດຖະມົນຕີກະຊວງອຸດສາຫະກໍາແລະການຄ້າມາເປັນຮອງລັດຖະມົນຕີຮອງປະທານຄະນະກໍາມະການສົ່ງເສີມແລະຄຸ້ມຄອງການລົງທຶນທັງເປັນຜູ້ປະຈໍາການ.

ໂອກາດນີ້,ທ່ານສະເຫຼີມໄຊກົມມະສິດໄດ້ໃຫ້ກຽດມີຄຳເຫັນໂອ້ລົມໂດຍໄດ້ເນັ້ນໃຫ້ຜູ້ທີ່ໄດ້ຮັບການແຕ່ງຕັ້ງ-ຍົກຍ້າຍແລະພະນັກງານນໍາພາຫຼັກແຫຼ່ງພາຍໃນວ່າ: ການປັບປຸງແຕ່ງຕັ້ງ-ຍົກຍ້າຍຖືເປັນວຽກງານປົກກະຕິຖືກຕ້ອງສອດຄ່ອງກັບແນວທາງນະໂຍບາຍການເມືອງຂອງພັກ-ລັດກໍຄືການຍົກລະດັບວຽກງານສົ່ງເສີມການລົງທຶນໃຫ້ມີບາດກ້າວໃໝ່ຂະຫຍາຍຕົວກ່ອນເກົ່າ. ພ້ອມນັ້ນ, ຍັງໄດ້ເນັ້ນໜັກບາງບັນຫາສໍາຄັນທີ່ຕ້ອງໄດ້ເອົາໃຈໃສ່ໃນຕໍ່ໜ້າດັ່ງນີ້: ໃຫ້ພະນັກງານຫຼັກແຫຼ່ງຂອງກົງຈັກໃໝ່ເອົາໃຈໃສ່ລົງເລິກດ້ານການເມືອງແນວຄິດໃຫ້ອ້າຍນ້ອງພະນັກງານທີ່ຢູ່ໃນເປົ້າໝາຍປັບປຸງສັບຊ້ອນໃຫ້ມີແນວຄິດອຸ່ນອ່ຽນທຸ່ນທ່ຽງຄຽງຄູ່ກັບການຄົ້ນຄວ້າປັບປຸງພາລະບົດບາດ, ກໍານົດຕໍາແໜ່ງງານຕະຫຼອດເຖິງການສັບຊ້ອນຈັດວາງບຸກຄະລາກອນຕາມທິດກະທັດຮັດມີຄຸນນະພາບ, ທາງດ້ານວິຊາສະເພາະກໍຕ້ອງໄດ້ປັບປຸງຂັ້ນຕອນພິຈາລະນາອະນຸມັດການລົງທຶນໃຫ້ມີຄວາມໂລ່ງລ່ຽນຈະແຈ້ງ, ປັບປຸງການບໍລິການປະຕູດຽວໃຫ້ມີລັກສະນະວ່ອງໄວ, ມີຄວາມກົມກຽວດ້ານຂໍ້ມູນເຊື່ອມຈອດກັບຂະແໜງການ, ການຄຸ້ມຄອງ, ຕິດຕາມແລະກວດກາບັນດາໂຄງການທີ່ໄດ້ອະນຸມັດໄປໃຫ້ມີປະສິດທິພາບແລະປະສິດທິຜົນກ່ອນເກົ່າແລະບັນຫາສຸດທ້າຍຕ້ອງປັບປຸງຄືນແບບແຜນວິທີເຮັດວຽກໃຫ້ກົມກຽວປະຕິບັດຫຼັກການລວມສູນປະຊາທິປະໄຕໃນໝູ່ຄະນະ, ຮັກສາໄດ້ຄວາມສາມັກຄີພາຍໃນກົງຈັກໃໝ່ໃຫ້ເປັນປຶກແຜ່ນແໜ້ນໜາເດັດດ່ຽວເຮັດໃຫ້ສຳເລັດໜ້າທີ່ການເມືອງຕາມການມອບໝາຍແນໃສ່ເຮັດໃຫ້ວຽກງານການສົ່ງເສີມການລົງທຶນນັບມື້ນັບເຕີບໃຫຍ່ເຂັ້ມແຂງສາມາດແຂ່ງຂັນກັບບັນດາປະເທດອ້ອມຂ້າງໄດ້.

(ຂ່າວ:ຫ້ອງການສົ່ງເສີມແລະຄຸ້ມຄອງການລົງທຶນ)