ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຄໍາມ່ວນ ໄດ້ຈັດພິທີປະກາດພະນັກງານຮັບອຸນໜູນບຳນານ ແລະ ສັບປ່ຽນບ່ອນປະຈຳການໃໝ່ ຂອງພະນັກງານ-ລັດຖະກອນ ທີ່ຂຶ້ນກັບພະແນກ (ຖວທ) ແຂວງ ຂຶ້ນເມື່ອບໍ່ດົນມານີ້, ໂດຍການເປັນປະທານຂອງ ທ່ານ ໄຊສົມບູນ ສຸວັນດາລາ ຫົວໜ້າພະແນກ ຖວທ ແຂວງ, ມີຄະນະພະແນກທີ່ກ່ຽວຂ້ອງເຂົ້າຮ່ວມ.
ທ່ານ ພົງສະທອນ ແສງສຸວັນນຸຮັກ ຫົວໜ້າຂະແໜງຈັດຕັ້ງພະນັກງານ ໄດ້ຜ່ານຂໍ້ຕົກລົງຂອງທ່ານເຈົ້າແຂວງຄຳມ່ວນ ວ່າດ້ວຍການອະນຸມັດໃຫ້ພະນັກງານ-ລັດຖະກອນ ທີ່ຂຶ້ນກັບພະແນກ ຖວທ ແຂວງຮັບອຸດໜູນບຳນານ ໃນງວດ IV ປີ 2023 ປະກອບມີ 4 ທ່ານຄື: ທ່ານ ສີວິໄຊ ເສນຈັນທິໄຊ, ທ່ານນາງ ຈິນຕະນາ ໄຊອາລຸນ, ທ່ານນາງ ສົມໃບ ຫອມບຸດສະວົງ ແລະ ທ່ານ ສູນທອນ ແກ້ວມະນີ. ພ້ອມນີ້ໄດ້ຜ່ານຂໍ້ຕົກລົງຂອງທ່ານຫົວໜ້າພະແນກ ຖວທ ແຂວງ ວ່າດ້ວຍການຍົກຍ້າຍ ສັບປ່ຽນບ່ອນປະຈຳການຂອງພະນັກງານ-ລັດຖະກອນຢູ່ບັນດາຂະແໜງການ ແລະ ກອງວິຊາການຂອງພະແນກ ຖວທແຂວງປະກອບມີ: ທ່ານ ສົມສັກດາ ແກ້ວມະນີ ຮອງຫົວໜ້າພະແນກ ຖວທ ແຂວງຮັບຜິດຊອບຊີ້ນຳວຽກງານສື່ມວນຊົນ ໄປຮັບຜິດຊອບຊີ້ນຳວຽກງານທ່ອງທ່ຽວ, ທ່ານ ມະໂນທອງ ພົງສະຫວັດ ຮອງຫົວໜ້າພະແນກ ຮັບຜິດຊອບຊີ້ນຳວຽກງານທ່ອງທ່ຽວ ໄປຮັບຜິດຊອບຊີ້ນຳວຽກງານສື່ມວນຊົນ ນອກນັ້ນຍັງໄດ້ຊັບຊ້ອນວິຊາການ ຈຳນວນໜຶ່ງຕື່ມອີກ.
ໂອກາດນີ້, ທ່ານ ໄຊສົມບູນ ສຸວັນດາລາ ໄດ້ເນັ້ນໜັກສຳ ລັບຜູ້ທີ່ໄດ້ຮັບບຳນານໃຫ້ສືບຕໍ່ເປັນແບບຢ່າງທີ່ດີ ແລະ ຖ່າຍທອດບົດຮຽນໃນດ້ານດີໃຫ້ແກ່ພະນັກງານ-ລັດຖະກອນໃນຮຸ່ນສືບທອດ, ສ່ວນການສັບປ່ຽນບ່ອນປະຈຳການ ຖືເປັນວຽກງານປົກກະຕິ ເພື່ອປັບປຸງການຈັດຕັ້ງໃຫ້ມີຄວາມເຂັ້ມແຂງ, ໜັກແໜ້ນ ເພື່ອເປັນເຈົ້າການນຳພາຈັດຕັ້ງປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ເປັນການຍົກລະດັບຄວາມຮັບຜິດຊອບ ຂອງພະນັກງານໃຫ້ສູງຂຶ້ນ, ສ້າງໃຫ້ພະນັກງານມີຄວາມຊຳນານວຽກຫຼາຍຂຶ້ນ ເພື່ອສ້າງໃຫ້ເປັນພະນັກງານສືບທອດປ່ຽນແທນໃນອະນາຄົດ ພ້ອມນີ້ທ່ານຍັງຮຽກຮ້ອງມາຍັງພະນັກງານ-ສະມາຊິກພັກພາຍໃນພະແນກ ຈົ່ງໄດ້ພ້ອມກັນສືບຕໍ່ເຊີດຊູນໍ້າໃຈຄວາມສາມັກຄີໃຫ້ເປັນປຶກແຜ່ນ ຊ່ວຍເຫຼອຊຶ່ງກັນ ແລະ ກັນ ເພື່ອພ້ອມກັນປະຕິບັດວຽກງານທີ່ໄດ້ຮັບມອບໝາຍ ໃຫ້ມີຜົນສຳເລັດ ແລະ ພັດທະ ນາວຽກງານຕ່າງໆໃຫ້ມີການຂະຫຍາຍຕົວດີຂຶ້ນ.
ຂ່າວ: ກອງຄຳ
ຄໍາເຫັນ